PONGORINAH 4 - BOWOT BOHUA

Ponyembah ang soruga

¹ Uliorih rih ahku dahpot pongorinah hino. Ahku nohto ihco bauntukang bokuap ang soruga. Pongohino konahan huli auh, ijo aang pahtukoh ius bopander, umba ahku kolou auh sorunai. Auh rih nuhtui, ‘‘Has nuhkat ahkan ohtoi. Ahku ahkan ngorinah ahkan'kam inon ijo ahkan nyolung noin.’’

² Turus iou ahku konowasa Roh Pohotala. Turus ahku nohto ang soruga anai ihcokobawak pododusan, tutang anai ihcobehti tuot ang pododusan rih.

³ Muhka ulun rih ngorolondong kolou poromata baiduri pandan, tutang poromata delima. Ihco liu kolou zamrud ngodiling pododusan rih.

⁴ A'ang tapai ngolikar mongodiling pododusan rih, anai duo pulu ohpat pododusan ijo bohkon. Anan tuot duo pulu ohpat okon ijo hopokajan puhti, tutang hapa ahkur bulou.

⁵ Tahkan pododusan rih soluka koloang kilat, tutang auh duhung ijo ngorutung. Tutang ang baun pododusan rih anai pihtu obor ijo honyala, orih kopihtu Roh Pohotala.

⁶ Todahpot ka'a ang boun pododusan rih ang'co, kolou tasik soramin kotining kolou kristal. Ang kodiling pododusan, ang nyinong saraioh, anai ohpat angbolum, ijo hila ang baun tutang hila lihkutoh tuwi umba mahta.

⁷ Aangbolum ijo pahtukoh gihtan kolou singa. Ijo koduooh kolou sahpi dalung. Ijo kotoluoh anaingina baui kolou baun ulun. Ijo koohpatoh, gihtan kolou bulung rajawali ijo rahat na'ang.

⁸ Koohpat angbolum rih, nyinong-nyinong anai onom ilat, tutang hokodilingoh, tutang ang sila luwangoh tuwi umba mahta. Hondou homalom angbolum-angbolum rih, eam tondo-tondooh monyanyi, ‘‘Borasih, borasih, borasih Tuhan, Pohotala Mahakowasa; ijo anai, ijo jari anai, tutang ijo anai toturusoh.’’

⁹ Koohpat angbolum rih monyanyi lagu-lagu tara, horomat tutang torimakasih ahkan Io, ijo tuot ang pododusan rih, yorih Io ijo bolum ahkan turus-jahamoh. Tutang ang ohkot angbolum-angbolum rih monyanyi,

¹⁰ koduo pulu ohpat okon rih, nyuruk-nyundop ang boun ulun ijo tuot ang pododusan rih, turus iro nyembah Io ijo bolum turus-jahamoh. Uliorih iro nyahkah ahkur-ahkur iro, nokuh boun pododusan rih hawui nuhtui,

¹¹ ‘‘Yo Tuhan, yo Pohotalan ihkai! Ihko iourih ijo pahtut norima tara, horomat, tutang kowasa. Kotului Ihko iou pona'oi karo ang'co, tutang ngosan kohondak-Mu ka'a karo ang ang'co rih jari nyolung tutang bolum.’’