PONGORINAH 3 - BOWOT BOHUA

Pohtoh ahkan Sardis

¹ ‘‘Ahkan molehkat ukup ang Sardis, nyurat koloutuh: Tuhrih pohtoh tahkan Io ijo tepun kopihtu roh tahkan Pohotala tutang kopihtu potion rih. Ahku kota'an inon ijo ihkam nguaioh. Hioioh ihkam bolum, padahal ihkam mahtoi!

² Tului orih, kuatrih, tutang ngomba'asiou, inon ijo magun anai ang ihkam, hounumba orih mahtoi samasino. Tului Ahku nyombangrih ijo inon ijo ihkam nguaioh, jaha ihco ka ijo soporuna ang toharep Pohotala.

³ Jadi, ingat rih hoduli ahkan inon ijo jari tongajar ahkan'kam lomoi, tutang inon ijo jari ihkam ngonih. Molalusohrih rih, tutang hubah iou tahkan dusa-dusan'kam. Amat ihkam eam kuat, Ahku ahkan lombut nokuh'kam kolou ponahkou; tutang ihkam eam ahkan kota'an, mira ohkotoh Ahku lombut.

⁴ Tahpi ang tohun-tohun ihkam ang Sardis, magun tohko ulun ijo bojaga, mangat kolambiuoh tahtap borasih.

⁵ Iro rih ahkan nyalan hombo-homboh Ahku hawui hopokajan puhti tului iro layak ahkan rih. Ahkan iro ijo manang, ahkan tomokahjan jubah puhti. Aran iro eam ahkan Ahku ngudapoh, tahkan Surat Ulun Bolum. Tutang ang toharep Amai-Ku, tutang molehkat-molehkat-Oh, Ahku ahkan ngahku ijo iro anairih aik-Ku.

⁶ Ia-iai dahpot ngonih, hondakrih nohtoani inon ijo tonuhtui bain Roh Pohotala ahkan ukup-ukup!’’

Pohtoh ahkan Piladelpia

⁷ ‘‘Ahkan molehkat ukup ang Piladelpia, nyurat koloutuh: Tuhrih tahkan Io ijo borasih tutang sojahti. Iorih ponambit kuhci ijo tongina Dawid; amat Io nguap, eam aro ihcobehti ka dahpot ngahtopoh, tutang amat Io ngahtopoh, eam ihcobehti ka dahpot nguapoh.

⁸ Ahku kota'an inon ijo ihkam nguai. Ahku kota'an ijo ihkam eam popira koba'as; ihkam, jari numbun ajar-Ku, tutang tehen umba Ahku. Bagin ihkam jari Ahku nguap ihco bauntukang, ijo eam dahpot tongahtop bain iai ka ka'a.

⁹ Ingatrih tuh: Ulun-ulun ijo monjadi ukup Sehtan rih, pobalik-pobalik ijo ngohawot aropoh Yahudi podahal bohkon, ahkan Ahkunguan, nyiring iro lombut suhkuntu'ut ang toharep'mu. Tutang iro ahkan kota'an ijo Ahku ngasi ihkam.

¹⁰ Bain kotului ihkam jari numbun poretah-poretah-Ku mangat bokehtep, Ahku ka ahkan ngolindung ihkam tahkan wayah kosusah, ijo ahkan nopahas sohopus kolunon. Hal orih ahkan nyolung unuk nikos paring ulun ang tana.

¹¹ Ahku bojoin lombut! Jagarih pio-pios inon ijo ihkam anaitepuioh, mangat eam ihcobehti ka mosopit hadiah komanang'kam.

¹² Ulun ijo manang ahkan Ahku ngonjorian kolou johi a'ang Lohpou Borasih Ain Pohotala-Ku, tutang io ahkan mohcon ang unuk rih turus-jahamoh. Aran Pohotalak-Ku, tutang aran lowun Pohotalak-Ku – yorih Yerusalem bohua ijo ahkan nosuluh tahkan soruga, tahkan Pohotalak-Ku – ahkan Ahku nyurat aang behtin ulun rih. Ka'a arak-Ku ijo bohua ahkan Ahku nyuratoh aang aropoh.

¹³ Ia-iai dahpot ngonih, hondakrih io nohtoani inon ijo tonuhtui bain Roh Pohotala ahkan ukup-ukup!’’

Pohtoh ahkan Laodekia

¹⁴ ‘‘Ahkan molehkat ukup ang Laodekia, nyurat koloutuh: Tuhrih pohtoh tahkan Sang Amen, Saksi ijo bokehtep tutang morong tohasak kokaro aang'co, ijo tona'oi bain Pohotala.

¹⁵ Ahku kota'an inon ijo ihkam nguai; Ahku kota'an ihkam eam sorongin eam ka'a podih. Koharusoh ihkam anai ihcooh!

¹⁶ Tahpi ihkam podi-podih kuhku; podih eam, sorongin ka eam. Orih tuluioh ihkam, ahkan Ahku nokahakoh soluka, tahkan luwang nyamak-Ku.

¹⁷ Ihkam nuhtui, ‘Ihkai tahtou tutang uras sukup; ihkai eam tahpas ino-inon.’ Tahpi ihkam eam kota'an eaminon komolarat tutang eaminon kosedihoh koada'an'kam! Ihkam porosbolum, hoburang, tutang bobulen.

¹⁸ Tului orih Ahku ningak ihkam mangat moli tahkanumba Ahku bulou, yorih bulou ijo borasih, mangat ihkam monjadi tahtou. Moli ka'a pokahjan puhti ijo tahkan aang Ahku, mangat ihkam hopokajan, tutang nuhtup keada'an'kam, ijo hoburang tutang ngomia. Tutang molirih hino totamba ahkan tomalit ang mahtan'kam, mangat ihkam dahpot nopahjah.

¹⁹ Ulun-ulun ijo Ahku ngasioh; iro ijo Ahku ningak tutang Ahku mahcatoh. Tului orih hondakrih ihkam bosomangat, tutang hubah tahkan dusa-dusan'kam.

²⁰ Nohto! Ahku tombok ang baun bauntukang tutang negah. Amat anai ulun ijo ngonih auh-Ku, tutang nguap bauntukang, Ahku ahkan nyolong nyombang io; Ahku ahkan kuman hombo-homboh io, tutang io kuman sama-sama Ahku.

²¹ Iro ijo manang, ahkan Ahku ngijin-Oh tuot ang pododusan Aik-Ku hihco Ahku, sama kolou Ahku bongok ka jari manang, tutang huntuh tuot hihco Amai-Ku ang pododusan-Oh.

²² Ia-iai dahpot ngonih, hondakrih nohtoani inon ijo tonuhtui bain Roh Pohotala ahkan ukup-ukup!’’