PONGORINAH 2 - BOWOT BOHUA

Pohtoh ahkan Epesus

¹ ‘‘Ahkan molehkat ukup ang Epesus, nyurat koloutuh: Tuhrih pohtoh tahkan Io ijo nambit kopihtu potion ang longoi koto'ui-Oh, tutang nyalan ang holat kopihtu owuh sumbu bulou rih.

² Ahku ta'an inon ijo ihkam nguai: Ihkam bogawi paham tutang ihkam tabah samasino. Ahku ta'an ijo ihkam eam nonga ahtoi ahkan ulun ja'at. Tutang ulun-ulun ijo ngahku aropoh rasul, padahal eam, jari ihkam nguji, tutang ihkam nyombang ijo iro bobalik.

³ Ihkam sabar, tutang ihkam ngarot tului Ahku, tutang ihkam eam puhtus asa.

⁴ Tahpi tuh kobahat-Ku toharep'kam: Ihkam eam hino mongasi Ahku kolou pahtuk.

⁵ Tului rih, ingatrih, eam-inon komahcu ihkam jari ngonyahtu! Hubah iou tahkan dusa-dusan'kam rih tutang nguanohrih iou inon ijo ihkam nguaioh pahtuk. Amat eam mahka Ahku ahkan lombut nokuh'kam tutang nyohpit pa'an sumbun'kam rih tahkan unukoh.

⁶ Tahpiolu anai aangihco ijo pios a'ang'kam, iorih: Ihkam bosingi gawin dolang murid Nikolaus ijo Ahku nyingi ka'a.

⁷ Ia-iai dahpot ngonih, hondakrih nohtoani inon ijo tonuhtui bain Roh Pohotala ahkan ukup-ukup! Iro ijo manang, ahkan Ahku ngijin kuman bua tahkan bahtang pombolum ijo tumbu ang Pombulan Pohotala.’’

Pohtoh ahkan Simirna

⁸ ‘‘Ahkan molehkat ukup ang Simirna, nyurat koloutuh: Tuhrih pohtoh tahkan Io ijo pahtuk tutang ijo laiu ijo jari mahtoi tutang bolum hoduli.

⁹ Ahku ta'an kosusah-kosusah ihkam; Ahku ta'an ihkam porosbolum, tahpi kotu'uioh ihkam tahtou! Ahku ta'an patanah-patanah ijo tonyahkah toharep'kam bain ulun-ulun ijo ngahku aropoh Yahudi padahal eam, iro anairih ukup Sehtan.

¹⁰ Ara mihkoh umba karot ijo eam tahi hino ihkam harus nyuruoh. Ingat, Sehtan ahkan moposolong ihcokobagi tahkan ihkam, koluwang sipir ahkan mouji ihkam. Ihkam ahkan mongarot sopulu ondou kotahiuoh. Hondakrih ihkam bokehtep umba Ahku nyiring mahtoi, mahka Ahku ahkan nonga ahkan'mu pombolum sojahti tutang kototahiu kolou hadiah komanang.

¹¹ Ia-iai dahpot ngonih, hondakrih nohtoanioh inon ijo tonuhtui bain Roh Pohotala ahkan ukup-ukup! Iro ijo manang, samasino eam ahkan ngarot ino-inon bain popahtoi ijo ambal duo.’’

Pohtoh ahkan Pergamus

¹² ‘‘Ahkan molehkat ukup ang Pergamus, nyurat koloutuh: Tuhrih pohtoh tahkan Io ijo nambit padang bonjihi ijo hososila.

¹³ Ahku ta'an ang umoh ihkam mohcon, io-rih ang unuk sehtan bopododusan. Ihkam te'et umba Ahku. Malah kotihka Antipas, saksi aik-Ku ijo te'et rih, tomunu ang toharep ihkam ang luwang markas Sehtan, ihkam eam ngulim ijo ihkam porocaya umba Ahku.

¹⁴ Tahpiolu kolourih, anai pira-pira hal ijo Ahku eam ngojorihoh tahkan ihkam: Anai ihcokobagi ulun ang louk ihkam ijo nutut umba ijo tongajar, bain Bileam. Bileam majar Balak koloukuwoh nombohos ukup Israel koluwang dusa; honong ngota'u iro kuman ukun ijo jari tononga ahkan dewa tutang nguan gawi ijo kihal.

¹⁵ Kolourih ka'a anai ang louk ihkam, ulun-ulun ijo nambit aang ajar dalang murid Nikolaus.

¹⁶ Tului orih hubah tahkan dusa-dusan'mu! Amat eam, honjulu hino Ahku ahkan lombut nokuh ihkam tutang ngolahi ulun-ulun rih umba padang ijo anai ang nyamak-Ku.

¹⁷ Ia-iai dahpot ngonih, hondakrih nohtoanioh inon ijo tonuhtui bain Roh Pohotala ahkan ukup-ukup! Iro ijo manang, ahkan Ahku ngijin kuman manna ijo bosuhuk, tutang nyino-nyinong ahkan norima tahkan Ahku ihco koluang bahtu puhti. Aang bahtu rih tonyurat ihco aran ijo bohua, ijo eam tongota'an bain iai ka'a, bohkonumba bain ulun ijo norimaoh.’’

Pohtoh ahkan Tiatira

¹⁸ ‘‘Ahkan molehkat ukup ang Tiatira, nyurat koloutuh: Tuhrih pohtoh tahkan Anak Pohotala, ijo mahtai-Oh ngonjelak-jelak kolou baho, tutang pa'ai-Oh mokilat kolou tombaga tonanak.

¹⁹ Ahku ta'an paring ijo ihkam nguaioh – Ahku ta'an ihkam ngasi sosama'mu, ihkam dehen, ihkam bogawi, tutang ihkam tahan ngarot. Ahku ta'an ihkam huntuh bogawi labih aro tahkan houn.

²⁰ Tahpi tuh kobahat-Ku toharep'mu, Ihkam nonga ahtoi ahkan Isabel, ulunbawi ijo ngaku aropoh suruhan Pohotala rih. Jari aro jihpok-jihpok-Ku ijo tonoalikoh, tutang tongajaroh ahkan nguan kihal, tutang ahkan kuman ukun ijo jari tonyorah ahkan songiangdewa.

²¹ Jari Ahku nongaoh ahkaioh, kosapet ahkan hubah tahkan dusai-dusaioh, tahpi io eam jolik tondo, nguan hal-hal ijo kihal rih.

²² Ingatrih! Ahku ahkan mohopas io nyiring poros ang unukoh kaling. Ang anan io, tutang ulun-ulun ijo hobandung umba io, ahkan ngarot samasino. Paring orih ahkan Ahku nguai uhuntuh – kocoali amat iro tondo nguaioh hal-hal ijo ja'at sama-sama umba io.

²³ Dolang muridoh ahkan Ahku munu ka'a mangat paring ukup borondong ijo Ahku rih Io ijo nosot tiruk tutang ahtoi kolunon. Ihkam ahkan Ahku malos numbun gawin ihkam nyino-nyinong.

²⁴ Tahpi ihkam ijo bohkon-bohkonoh ang Tiatira eam umba ajar ijo ja'at rih, tutang eam balajar ilmu-ilmu Sehtan. Ahku nuhtui, ijo Ahku eam ahkan nambah ahkan'kam puat ijo ngombahat.

²⁵ Tahpi johcok ang ohkot Ahku lombut noin, hondakrih ihkam tohtap nutut inon ijo jari ihkam tepuioh.

^26-27 Iro ijo manang, tutang ijo johcok laiu, turus nguan inon ijo Ahku ngohondakrih, ahkan Ahku nonga kowasa ijo sama kolou Ahku norima tahkan Amai-Ku. Iro akhan norima kowasa tahkanumba Ahku, ahkan moretah uhtus-uhtus umba suhkah bosi, tutang ahkan molonyuh uhtus-uhtus rih kolou kobali tana.

²⁸ Iro ahkan norima potiontimur tahkanumba Ahku.

²⁹ Ia-iai dahpot ngonih, hondakrih nohtoani inon ijo tonuhtui bain Roh Pohotala ahkan ukup-ukup!’’