PONGORINAH 19 - BOWOT BOHUA

¹ Uliorih rih ahku ngonih angihco kolou auh koridu ulun aro tahkan soruga ijo bososurak, ‘‘Tara Pohotala, Pohotalan ihto anairih Pohotala ijo monyolamatoh; Io Pohotala ijo hajo tutang bokowasa!

² Pomosara-Oh adil tutang bijaksana! Io jari ngonyahtu hukum-Oh ngosan sundal ijo hajo ijo morusak kolunon umba kosundaloh. Pohotala jari mohukum sundal rih, tului io munu jihpon-jihpon Pohotala.’’

³ Turus auh ulun aro rih bososurak hino, ‘‘Tara ahkan Pohotala! Asop tahkan baho ijo mahpong lowu hajo rih ahkan nyolobuwuk eam tondo-tondooh!’’

⁴ Mahka koduo pulu ohpat okon, tutang koohpat angbolum ijo kodiling pododusan rih suhkuntu'ut tutang nyembah Pohotala ijo tuot ang ngosan pododusan. Iro nuhtui, ‘‘Amen! Tara Pohotala!’’

Pesta kawin Anak Tobiri

⁵ Turus konahan, tahkan pododusan rih naing auh ijo nuhtui, ‘‘Tara Pohotala, o paring jihpon Pohotala, tutang paring ulun – hajo, koik – ijo nyembah Pohotala!’’

⁶ Uliorih ahku ngonih angihco kolou auh ihco ko pulou ulun ijo aro samasino; naingoh kolou golombang ijo holuhcak, tutang kolou auh duhung mongorutung. Ahku ngonih iro nuhtui, ‘‘Tara Pohotala! Tului Tuhan, Pohotalan ihto Ijo Mahakowasa rih huntuh moretah!

⁷ Olairih ihto jori-jorih tutang sanang; olairih ihto momuji kohajoi-Oh! Kotului jari johcok ondou pongawin ijo nambit galar Anak Tobiri rih, tutang pongahten-Oh jari tahtap molalus pongawin-Oh.

⁸ Pokahjan lena ijo hogining jari tononga ahkai-Oh ahkan tongepai.’’ (Pokahjan lena rih anairih gawi-gawi hinut ijo konuan bain ukup ain Pohotala.)

⁹ Turus molehkat rih nuhtui ahkak'ku, ‘‘Nyurat tuh: ‘Kosanang rih ulun ijo tonorawe nokuh pesta pongawin Anak Tobiri rih.’ ’’ Pongohuli molehkat rih monambah hino, ‘‘Tuhrih kabar hinut tahkan Pohotala.’’

¹⁰ Ahku tosuhkutu'ut ang husuk molehkat rih kani nyembahoh, tahpi io nuhtui umba ahku, ‘‘Ara! Ara nyembah ahku, sembah rih Pohotala! Kotului ahku ka jihpon sama kolou ihko, tutang kolou paring konduang'mu, ijo nambit segah ang kosaksian Yesus.’’ Tului kosaksian Yesus orihrih ijo moilham ulun-ulun ijo monujum.

Ponunggang kuda puhti

¹¹ Pongohuli ahku nohto soruga bokuap, turus gihtan ihcokungan kuda puhti. Ponunggang-Oh konohawot Ijo Bokehtep tutang Ijo Morong. Io adil a'ang mutusoh hukum, tutang a'ang kolahi ijo tonolalus-Oh.

¹² Mahta-Oh kolou konyelak baho, tutang ang kuhung-Oh Io hapa aro ahkur. Ang behtiu-Oh tosurat ihco aran, tutang tihkas Io bongoi ijo ngota'an aran rih.

¹³ Kolambipanjang ijo tohapa-Oh jari tocolop a'ang daha. Tutang Io konohawot, ‘‘Auh Pohotala’’.

¹⁴ Kawan kolahi soruga, ngahasu Io honong nunggang kuda-kuda puhti, tutang hopokajan lena ijo puhti borasih.

¹⁵ Tahkan nyamai-Oh soluka 'cokobilap padang ijo bonyihi, tutang umba padang orih, Io ahkan pokalahoh uhtus-uhtus, tutang Io ahkan moretah iro, umba sukah bosi. Io ahkan mohapit anggur, ang luwang pokahkas pohapit anggur kosangit Pohotala Ijo Mahakowasa.

¹⁶ Aang jubah-Oh, tutang aang sahpak-Oh tosurat aran rih, ‘‘Lahca kokaron lahca, tutang Tuhan kokaron tuan.’’

¹⁷ Turus ahku nohto ihcobehti molehkat tombok ang ngosan mahtanondou. Umba auh ijo muhing io na'ah, umba paring bulung ijo na'ang ang udara, ‘‘Olai, hopuhpung umba tihpen pesta hajo ijo ain Pohotala!

¹⁸ Olai kuman usin lahca-lahca, usin pokolima-pokolima, tutang usin pohlawan-pohlawan; olai kuman usin-usin dolang ponunggang kudaoh, hawui usin karon-kudaoh, tutang usin ukup-ukup kolunon, hajo tutang koik, jihpon tutang morodehka!’’

¹⁹ Pongohuli ahku nohto ohcin rih, tutang lahca-lahcan tana, honong kawan-kolahi iro, hopuhpung ahkan tulak hokolahi molawan Io, ijo nunggang kuda puhti rih, tutang karo kawan-kolahi-Oh.

²⁰ Mahka ohcin rih, totawan homboh umba nabi alik ijo jari nguan tandahelan-tandahelan ang toharep ohcin rih. (Umba tandahelan-tandahelan orihrih ohcin rih, mobalik ulun-ulun ijo anai tanda ohcin rih, tutang ulun-ulun ijo nyembah kopahtung ohcin rih.) Turus ohcin rih tutang nabi alik rih ndian bolu-bolum nokuh tohun tasik baho ijo ngonjelak umba sondawa.

²¹ Tutang kawan kolahi, iro tomunu umba padang ijo soluka tahkan nyaman ponunggang kuda puhti rih. Mahka bulung-bulung ka lombut tutang kuman honong lingih usin iro ijo tomunu orih.