PONGORINAH 18 - BOWOT BOHUA

Bolinangoh lowu Babel

¹ Uliorih rih ahku nohto ihcobehti molehkat bohkon nosuluh tahkan soruga. Io anai bokowasa ijo hajo tutang sewutoh nguan hopus tana monjadi boloang.

² Umba auh ijo hajo, io na'ah, ‘‘Jari bolinangoh! Babel hajo jari bolinang! Huntuh io monjadi unuk sehtan-sehtan tutang roh-roh ja'at. Ang luwangoh bolum mahca-mahcam bulung ijo pali tutang ijo kobele ulun.

³ Kotului kokaron uhtus jari ngorih anggur kojorikbalai ponyundalanoh. Lahca-lahcan kolunon nguan sundal umbaoh, tutang podagang-podagang ang tana monjadi tahtou bain kojolikbolaioh ijo eam duon tongondalioh.’’

⁴ Turus ahku ngonih auh bohkon, tahkan soruga nuhtui, ‘‘Soluka, ukup aik-Ku! Soluka tahkan luwangoh! Ara ihkam ngohasu dusa-dusan iro, tutang umba ngohtun hukumoh!

⁵ Tului dusaioh botuyuk-tuyuk johcok nokuh langit, tutang Pohotala ingat ahkan koja'atoh.

⁶ Nguanohrih io koloukuwoh io jari monguanoh ihkam; malosrih io duo tikat lihpet ahkan paring ijo jari tonguaioh. Nyuang pihkanoh umba korih ijo duo tikat labih kokarasoh tahkanumba korihoh, ijo tonyodiaoh ahkan ihkam.

⁷ Tongarih ahkaioh kongarot tutang koporosahtoi, ijo sama karoioh umba kohajoi tutang kolobienoh ijo tonongaoh ahkan aropoh bongoi. Tului io hototurus iou nuhtui umba aropoh, ‘Ahku tuh lahtu ijo momoretah! Ahku tuh eam balu; ahku eam ahkan nyuru kokarotahtoi!’

⁸ Kotului hal orihrih, mahka aang ihco ondou iou io ahkan tonopahas kosusah, – ponyahkit, kosedihan, tutang bolo'u. Tutang io ahkan tomahpong umba baho, kotului bokowasarih Tuhan Pohotala ijo mosaraoh rih.’’

⁹ Lahca-lahcan kolunon ijo umba a'ang gawin-gawin kosundal orih, tutang kojolikbolai ulunbawi rih, ahkan nangih tutang nahtum lowu rih, amatmira iro nohto asep nyolobuwuk tahkan baho ijo mahpongoh rih.

¹⁰ Iro ahkan tombok tahkan mahcu, tului iro mihkoh tokona karotporosoh. Iro nuhtui, ‘‘Akai, eam inon colahkaoh lowu ijo bosewut rih – lowu Babel ijo ba'as! A'ang ihco jam iou hukum'mu jari nyolung!’’

¹¹ Dolang podagang ang tana ka nangih tutang nahtum tului ulunbawi rih, bain eam anai ihcobehti ka hino, ijo moli ramun-ramun podagang iro.

¹² Eam aro ijo moli bulou, perak, bahtu poromata, tutang mutiara iro, ka'a benang lena, benang ungu, sutara tutang benang bohandang botuo, dolang mahcam kahju ijo jarang tonyombang; ramu-ramu tahkan gading, tutang tahkan kahju ijo hajo regai, tahkan tombaga, bosi tutang pualam;

¹³ uhpak kahju manis, karon-rorapah, setanggi, minyak mur, tutang manyan, anggur, tutang undus, gelapung tutang gandum, sahpi tutang tobiri, kuda tutang korehta, jihpon-jihpon, dahang hino hasong ulun ka.

¹⁴ Dolang podagang nuhtui umba ulunbawi rih, ‘‘Paring ijo ihkai jolik tepuioh jari earo hino, tutang kokaro kolobienoh, tutang kobohinoi'mu jari dilap. Ihko eam ahkan monyombangoh hino!’’

¹⁵ Dolang podagang ijo jari monjadi tahtou, tului bodagang ang lowu rih, ahkan tombok tahkan mahcu, tului iro mihkoh kona kokarotoh. Iro ahkan nangih tutang nahtum,

¹⁶ turus nuhtui, ‘‘Akai, eam inon colahkaoh lowu ijo bosewut tuh! Bahutoh io hapa pokahjan benang lena, benang ungu tutang benang bohandang botuo; bahutoh io tuwi umba pokahjan bulou, poromata tutang itan!

¹⁷ Tahpi aang ihco jam iou io jari dilap dolang ponahtouoh rih!’’ Paring ijo nahoda kapal, ponumpang, tutang anak kapal, hawui paring ulun ijo ngurah usahaoh ang tasik, tombok tahkan mahcu.

¹⁸ Tutang bokociak, ang ohkot iro nohto asep nyolobuwuk, tahkan baho ijo mahpong lowu rih. Iro na'ah, ‘‘Eam pu'u anai lowu bohkon kolou lowu ijo hajo tuh!’’

¹⁹ Mahka iro noburan awu ang kuhung iro, kolou tanda iro porosahtoi, turus nangih tutang bokocia-ciak, ‘‘Akai, eam inon colahkaoh lowu ijo hajo rih! Ponahtouoh jari napa paring ulun ijo anaingina kapal-kapal ang tasik monjadi tahtou! Tahpi a'ang ihco jam iou io jari dilap paringoh!’’

²⁰ Oh soruga, jori-jorih iou ihko ngosan kolonyuh lowu hajo rih! Oh ukup Pohotala, rasul-rasul tutang nabi-nabi jori-jorih iou! Kotului Pohotala jari mohukum io, kolou pombalos ngosan inon ijo tononguaioh toharep ihkam!

²¹ Uliorih rih, ihcobehti molehkat ijo mamut ngahtang ihcokobuhtup bahtu – kohajon bahtu gilingan ijo hajo – turus nyakahoh nokuh luwang tasik hawui hioioh, ‘‘Koloutuh caraoh lowu Babel ijo bosewut rih ahkan tonyahkah hawui paham nyiring ahkan eam duon tonyombang hino.

²² Auh musik tahkan ponowah kocahpi, tahkan dolang ponyanyi, tahkan pomohpos suling, tutang tahkan pomohpos sorunai, eam ahkan konahan hino ang luwang'mu! Eam ahkan tonyombang ka'a, ihcobehti ulun ponggawi ahli ka ang anan, tutang auh bahtu monggiling ka, eam ahkan konahan hino.

²³ Ulun eam ahkan nohto hino koloang sumbu ang luwangoh; tutang eam ahkan hino konahan korami pesta pongawin ang anan. Podagang-podagang'mu anairih ulun-ulun ijo paham bosewut ang tana, tutang honong ilmu-ilmu gaib'mu, ihko mobalik kokaro uhtus ang kolunon!’’

²⁴ Babel tonohukum, bain ang luwang lowu rih jari tosombang daha nabi-nabi, dahan ukup ain Pohotala – pandakoh dahan paring ulun ijo jari tomunu ang ngosan tana.