PONGORINAH 11 - BOWOT BOHUA

Duo behti saksi

¹ Uliorih rih, ahku tononga cokotohtok kahju ijo mirip doroh sukah ponihpong, turus tonyuhuoh, ‘‘Tulak nihpong Lohpou Pohotala tutang mesbeh. Lehkenrih pira ulun-ulun ijo sombayang ang luwangoh.

² Tahpi ara nihpong konaha ang sila luar Lohpou Pohotala rih, tului bagian orih jari tonosorah ahkan ulun-ulun ijo eam kosono Tuhan. Iro ahkan nihcak-ngihik lowu ijo borasih rih, kotahin ohpat pulu duo bulan.

³ Ahku ahkan nyuhu duo behti saksiaik-Ku ijo hapa pokahjan bidak, tutang iro ahkan mborihta Kabar Hinut tahkan Pohotala, kotahin, sokuhjan duo rahtus onom pulu ondou.’’

⁴ Duo saksi rih anai duo bahtang pu'un zaitun tutang duo totahan pa'an sumbu ijo dahpot ang toharep Tuhan semesta alam.

⁵ Amat ulun mocoba nguan ang'co ijo eam pios, toharep iro, mahka tahkan nyaman iro bolua baho, ijo morusak musuh-musuhoh. Umba cara kolourih, paring ulun ijo kani ngoporos iro ahkan tomunu.

⁶ Iro anaingina kowasa ahkan ngahtop langit, mangat ara uhjan kotahin iro mborihta, borihta tahkan Pohotala. Iro anaingina ka'a kowasa ngosan paring sahai danum, tutang ngubah danum monjadi daha. Tutang iro anaingina hino kowasa ahkan nahup tana umba mahca-mahcam porusak, mira iou iro tou nguaioh.

⁷ Uli iro ohpah mborihta borihtan iro, ohcin ijo bolua tahkan lowun popahtoi ahkan molawan iro.

⁸ Tutang otun iro, ahkan borolatung ang jalan rami lowu hajo, ang amoh Tuhan iro tomahpak. Aran tindung lowu rih Sodom ata'ai Misir.

⁹ Ulun-ulun tahkan paring nogara, suku, basa, tutang uhtus, ahkan nohto otun iro kotahin tolu sotongah ondou, tutang eam mongijin otu-otu rih tonanom.

¹⁰ Ponduduk tana ahkan hokojorih ngosan popahtoi koduo saksi rih. Iro ahkan mestaoh tutang saling mongirim hadiah, tului koduo behti nabi rih, mopolombut aro siksa ahkan paring ulun ang tana.

¹¹ Uli tolu sotongah ondou, lombut hasong bolum tahkan Pohotala, tutang nyolong hino koluwang koduo behti nabi rih. Iro ka hikat tombok, nyiring paring ulun ijo nohto iro, nyolung mihkoh samasino.

¹² Pongohuli koduo behti nabi rih, ngonih auh hajo ijo na'ah iro tahkan soruga, ‘‘Olai, nuhkat nokuh ohtoi!’’ Turus ang toharep mahtan musuh-musuh iro, iro ka'a hogahtang nokuh soruga, tongolindung bain bounondou.

¹³ Mahka ang ohkot rih nyolung tana moruguh ijo paham. Sepersopulu kobagi tahkan lowu rih luhtek, tutang pihtu kuhjan behti palus, bain tului tana moruguh rih. Ulun-ulun bohkonoh nyolung mihkoh samasino, turus iro monara kohajon Pohotala ang soruga.

¹⁴ Colahka ijo koduooh jari tonguha. Tahpi nohto hino! Colahka ijo kotolu eamtahi hino ahkan ngahasu.

Sorunai jo kopitu

¹⁵ Turus molehkat ijo kopihtu mohpos sorunaioh, mahka ang soruga konahan auh-auh muhing samasino ijo nuhtui, ‘‘Kokuwasa'an ahkan moretah kolunon, anai huntuh a'ang longon Tuhan ihto, tutang Lahca Ponyolamat, ijo tonobowot-Oh. Io ahkan moretah ahkan turus-jahamoh!’’

¹⁶ Mahka koduo pulu ohpat okon, ijo tuot ang pododusan iro ang tohimo Pohotala, suhkuntu'ut tutang nyembah Pohotala.

¹⁷ Iro nuhtui, ‘‘Tuhan, Pohotala Mahakowasa, ijo anai, tutang ijo jari anai! Ihkai botorimakasih ahkan-Mu kotului Ihko jari hapa kowasan-Mu ijo hajo, tutang jari nopara moretah!

¹⁸ Ulun-ulun ijo eam kosono Tuhan, ngamuk kotului jari ohkotoh Ihko nusuh kosangit-Mu, tutang jari hino ohkotoh Ihko mosara ulun-ulun mahtoi. Tuh rih wayahoh ahkan nonga upah ahkan jihpon-jihpon-Mu nabi-nabi, tutang ahkan paring ukup-Mu, yorih paring ulun ijo sombayang ahkan-Mu hajo oluka koik. Tuh rih ohkotoh ahkan molonyuh ulun-ulun ijo molonyuh tana!’’

¹⁹ Mahka tokuaprih Lohpou Pohotala ang soruga, tutang gihtanrih Pohti Bowot ang luwangoh. Turus nyolung kilat tutung-hotutung, tutang auh duhung guhu-guhup tutang ngorutung, hawui tana hogerek tutang uhjan es ihco labat.