PILIPI 3 - BOWOT BOHUA

Komorong ijo sojahti

¹ Laiuoh, Konduang-konduang'ku hondakrih ihkam hokojorih kotului ihkam jari hihco umba Tuhan. Ahku eam nanyam bahat ahkan nokoduli inon ijo jari ahku nyuratoh ahkan'kam houn; kotului hal orih pios ahkan kosolamat'kam.

² Rondo-rondong toharep ulun-ulun ijo nguan hal-hal ijo ja'at, ulun-ulun ijo pantas tonohawot ‘asu’. Iro hojojuan mangat ulun-ulun tonyunat.

³ Podahar ihto ulun-ulun ijo jari norima sunat ijo sojahti, bohkon iro. Ihto nyembah Pohotala hawui toniting Roh Pohotala bongoi, tutang ihto norimakasih kotului ihto bolum hihco umba Kristus Yesus. Ihto eam bokuak umba upacara ijo bosipat 'jogihtan.

⁴ Kotu'uioh ahku dahpot iou bokuak umba upacara orih. Bain amat anai ihcobehti, ijo nanyam io anai alasan ahkan bokuak umba upacara ijo bosipat 'jogihtan, ahku labih hino.

⁵ Ahku tonyunat ohkot umur jalu ondou. Ahku konanak kolou ihcobehti Israel, tahkan lihit Benyamin; ahku ulun Ibrani asli. A'ang hal kote'et aang hukum-hukum agama Yahudi, ahku anairih 'cobehti barih Parisi.

⁶ Ahku malah kolourih bosomangat, nyiring ahku ngoporos ukup. Amat morehken tahkan hila hukum agama Yahudi, ahku anai ihcobehti ulun pios ijo eam bosala.

⁷ Tahpi tului Kristus, mahka paringoh ijo houn ahku ngohuoh, kolou angihco ijo nongautung, huntuh monjadi angihco ijo morugioh iou.

⁸ Eam baya hal-hal orihrih; tahpi malah hal-hal ijo ahku ngohuoh kolou hal-hal ijo baya morugi iou. Ijo ahku tepui huntuh anairih labih borega, yorih kosono Yesus Kristus, Tuhan'ku. Kotului Kristus, mahka ahku jari molohkakoh paring-paringoh. Ahku ngohu paringoh rih, kolou puhuk iou, mangat ahku tou ngondahpot Kristus,

⁹ tutang tu'u-tu'u hihco umba Io. Kohihco ijo pios umba Pohotala eam hino ahku usaharih bongok umba jalan te'et ahkan hukum agama. Huntuh ahku anairih kohihco ijo pios umba Pohotala, kotului ahku porocaya umba Kristus. Jadi, kohihco ijo morong rih lombut tahkan Pohotala, tutang hogalang porocaya umba Yesus Kristus.

¹⁰ Ihco-ihcooh ijo ahku jolikrih, iorih mangat ahku kosono Kristus, tutang nyuru kowasa ijo mbolum Io tahkan popahtoi. Ahku jolik umba karot homboh Io, tutang monjadi sama kolou Io aang popahtoi-Oh.

¹¹ Tutang ahku boharap ijo ahku bongok, ahkan tonombolum hoduli tahkan popahtoi.

Nokoru johcok titun

¹² Ahku eam nuhtui ijo ahku jari bohasir, ata'ai jari monjadi soporuna. Tahpi ahku toturus iou ngurahjalan nyomba'an pononga ijo tonahtap bain Kristus Yesus. Ahkan orihrih Io jari nyomba'an ahku tutang napa ahku aiu-Oh.

¹³ Botatuoh, Konduang-konduang, ahku tu'u-tu'uoh eam komo ijo ahku jari bohasir nyomba'an hodiah rih. Ahkan tahpi anai ihco hal ijo ahku nguai, yorih ahku nolingou inon ijo anai ang lihkut'ku, tutang ngurahjalan paham ngojohcok inon ijo anai ang baun.

¹⁴ Orih kobaiuoh ahku nokoru toturus nitu titui laiu, ahkan duon komanang, yorih pombolum ijo ang soruga; ahkan orihrih Pohotala na'ah ihto nguha Kristus Yesus.

¹⁵ Ihto paringoh ijo jari oko cara rohani, harusrih bogawi kodorih. Tahpi amat ang marak ihkam anai ijo niruk bohkon, mahka Pohotala ahkan monarangoh ka'a ahkan'kam.

¹⁶ Oluaang hal tuh, hondakoh nohtoani: Ihto harus magun bolum numbun poroturan ijo jari ihto umbaoh, nyiring wayah tuh.

¹⁷ Konduang-konduang paring! Numbunrih sutu angahku. Ihkai jari nonga sutu ijo morong, tului rih nohtoanirih pio-pios ulun-ulun ijo nutut sutu ihkai rih.

¹⁸ Ahku ius kinjap tikat mborihta ahkan'kam, tutang huntuh ahku nokolulioh hino hawui nangih, ijo anai aro ulun ijo pombolumoh morusak riman popahtoi Kristus ijo nyopolahki.

¹⁹ Pombolum ulun-ulun kolourih ahkan kolaiou honong koluhtek, tului pohotalan iro anairih kojolik bereng iro bongoi. Hal-hal ijo mopomia, justru ijo orihrih ijo iro monamamrih, kotului iro niruk baya hal-hal ijo tohorong umba kolunon tuh iou.

²⁰ Tahpi ihto anai rih waris kolahcan soruga. Tahkan anan ka'a Lahca Ponyolamat ihto, Tuhan Yesus Kristus, ahkan lombut. Iorih ijo ihto ngindo-ngindoi honong rindu.

²¹ Behtin ihto ijo bolomu tutang duon maram tuh, ahkan konubah bain Kristus monjadi kolou behtin Aiu bongoi ijo borasih. Io dahpot nguan orih kotului Io anai-ngina kowasa duon pominda kokaro aangihco.