PILIPI 1 - BOWOT BOHUA

¹ Konduang-konduang ukup Pohotala, paringoh ijo mohcon ang Pilipi, tutang ijo jari hihco umba Kristus Yesus. Ka'a Konduang-konduang okon hawui pondohop ukup! Ahku, Paulus tutang Timoteus karon-jihpon Kristus Yesus,

² bokoharap, keleh Pohotala, Amai ihto, tutang Tuhan Yesus Kristus, nonga borehkat tutang kosanang ahkan ihkam.

Do'a Paulus ahkan ukup

³ Nyinong tikat ahku ingat umba ihkam, ahku ngohawot torimakasih ahkan Pohotala.

⁴ Tutang nyinong tikat ahku bodo'a ahkan Konduang paringoh, ahku bodo'a honong sanang ahtoi.

⁵ Ahku botorimakasih ahkan Pohotala kotului tahkan ondou pahtukoh nyiring huntuh, ihkam jari dohop ahku mborihta Kabar Hinut tahkan Pohotala.

⁶ Pohotala bongoi ijo monopara gawi ijo pios rih aang'kam. Tutang ahku yahkin Io ahkan noturus karon gawi orih rih nyiring tondo aang Ondou Kristus Yesus lombut hoduli.

⁷ Puna aang unukoh ahku anai mokomo kolourih toharep ihkam, tului Konduang paringoh toturus doni ang ahtoi'ku. Ka'a bain ihkam umba norima hombo-homboh ahku, pononga ijo Pohotala nonga ahkak'ku, pios huntuh tuh pondehan ahku ang luwang sipir oluka ang ohkot ahku anai ang luar, ahkan mbela tutang tehen nyaksi Kabar Hinut rih.

⁸ Pohotala kota'an ijo ahku tu'u-tu'u rindu sino umba'kam, umba nanyam kasih-mesra tahkan Kristus Yesus bongoi.

⁹ Tuhrih do'a'ku ahkan ihkam; keleh ihkam mahi-mahi monyita Pohotala tutang hawuiarop tutang turus ndahang timbon pongotaan ijo morong tutang topahjah ijo kopihtar.

¹⁰ Honong kolourih ihkam ta'an mitih inon ijo kopiosoh, tutang pombolum'kam borasih tahkan cela'an, ata'ai dawa'an inon ka, ka'a ang ondou Kristus lombut hoduli.

¹¹ Pombolum'kam ahkan momurai umba karogawi ijo tu'u-tu'u pios, ijo baya dahpot tomutik bain Yesus Kristus bongoi; mahka Pohotala ahkan tonohajo tutang tohonara-nara.

Bolum ahkan Kristus

¹² Ahku kani ihkam ngota'an, ijo hal-hal ijo ius nyolung aang ahku, justru kotuluioh labih aro ulun ngonih tutang porocaya ahkan Kabar Hinut rih.

¹³ Kojodiaioh, paring ponjaga istana tutang ulun-ulun bohkonoh, ang lowu tuh ngota'an, ijo ahku tonohukum tului ahku mohalu Kristus.

¹⁴ Tutang konohukum'ku, jari kotuluioh, arotu'u tahkan ulun-ulun Kristen ang lowu tuh, monjadi labih yahkin hino ahkan Tuhan, nyiring iro mahi bohanyi mborihtaoh pohtoh Pohotala honong eam aro mihko-mihkoh.

¹⁵ Puna anai pira-pira ang parak iro ijo mborihta Kristus tului hiri ahtoi, tutang kani hojawab, tahpi ijo bohkon mborihta Kristus, tului anai maksud ijo hinut.

¹⁶ Ulun-ulun tuh molalusoh tului iro mongasih Pohotala tutang ahku, bain iro ngota'an ijo Pohotala jari nyuhu ahku ahkan mongo ngorinah, ijo Kabar Hinut rih morong.

¹⁷ Tahpi ulun bohkon mborihta Kristus umba maksud ijo eam pios; iro mborihtaoh ahkan gunan aiubongoi. Umba orih iro, boharep dahpot nguan ahku labih susah ang luwang sipir.

¹⁸ Tahpi eam ombai! Kotului koloukuwohka ka'a, pios orih tonguan hawui maksud ijo borasih, oluka umba maksud ijo sala, tuh Kristus ijo tomborihta ka'a; jadi ahku sanang iou. Tutang ahku tahtap anyam kolouorih,

¹⁹ bain ahku ta'an ijo umba do'a-do'a'kam, tutang pondohop tahkan Roh Yesus Kristus, ahku ahkan tomorodehka.

²⁰ Ijo ahku paham jolik tutang harapoh, iorih mangat ara sasino-sino ahku gagal a'ang tugas'ku. Sabalikoh ahku bokoharap mangat nyinong wayah, ijo mombahtang sino huntuh, ahku honong sikap bohanyi, nyiring hopus homboruak behtik'ku – pios ahku bolum ata'ai ahku mahtoi – Kristus tonohajo.

²¹ Tului ahkak'ku, tihtun pombolum aik'ku tihkas Kristus! Tutang mahtoi rimaioh utung.

²² Tahpi amat umba pombolum ang kolunon tuh, ahku dahpot nguan gawi ijo labih boguna, mahka ahku eam ta'an, amoh ijo harus ahku mihtih.

²³ Ahku tonyomba'an tahkan duo pihak. Ahku jolik sino nohtah kolunon tuh, mangat tulak mohcon umba Kristus, kotului orihrih ijo paling pios.

²⁴ Tahpi ahkan kogunan'kam, labih pios amat ahku te'et mohcon ang kolunon.

²⁵ Ahku yahkin ahkan hal orih. Orih kotuluioh ahku ta'an, ahku ahkan tohtap mohcon umba Konduang paringoh; mangat dahpot dohop ihkam nyolung mahi ba'as, tutang mahi sanang a'ang porocaya umba Tuhan.

²⁶ Kobain orih, amat ahku noin hoduli nokuh'kam, ihkam ijo jari hihco umba Kristus Yesus, ahkan anai labih aro hino sokehta ahkan komo tamam ngosan arop'ku.

²⁷ Nah, ijo boguna huntuh iorih, ijo ihkam bolum sorurui umba inon ijo tonutut bain Kabar Hinut tohou Kristus rih. Honong kodorih, inonrih ahku dahpot hosombang umba ihkam ata'ai eam, ahku ahkan ngonih ijo ihkam ba'as angkohihco tutang kolahi sama-sama ahkan baya ihco maksud tutang ihco kojolik; yorih ahkan kepercayaan ijo sorurui umba Kabar Hinut tahkan Pohotala rih.

²⁸ Hondakrih ihkam toturus bohanyi, a'ai mihkoh toharep polawan-polawan'kam. Honong kodorih ihkam ngorinah ijo iro musti ahkan kalah, tutang ihkam ahkan manang, kotului Pohotala bongoi ijo nonga komanangan ahkan'kam.

²⁹ Kotului Pohotala jari nonga pononga ahkan'kam, eam tihkas ahkan porocaya umba Kristus, tahpi ka'a ahkan komo kokarot bagi Kristus.

³⁰ Huntuh ihkam ka'a homboh umba ahku a'ang kolahi ijo sama iorih ijo ihkam pu'u nohto ahku ngalahioh lomoi, tutang ijo magun ahku tohtap ngalahioh johcok huntuh, kolou ijo ihkam huntuh ius ngonih.