MATEUS 9 - BOWOT BOHUA

Yesus ngopios ihcobehti bolomu

¹ Yesus jahkat nokuh luwang alut, turus mitah danou, buli nokuh lowu-humai-Oh.

² Ang anan ulun ngomin nokuh Io, ihcobehti bolomu ijo kaling ang kahcangoh. Ohkot Yesus nohto eam inon kohajon koharap ulun-ulun rih. Io nuhtui umba ulun bolomu rih, “Tabah iou anak-Ku! Dusa-dusan'mu ius tongapun.”

³ Pira-pira guru-agama ijo anai ang anan nuhtui aang ahtoi, “Ulun tuh mohina Pohotala!”

⁴ Yesus kota'an tiruk'ndo, nyolung Io nuhtui, “Ombai tiruk'kam koja'at orih?

⁵ Umoh ijo labih hinut, ngohawot, ‘Dusan'mu ius tongapun’, ata'ai nuhtui, ‘tombok tutang nyalan’?

⁶ Tahpi huntuh Ahku ahkan ngorinah ahkan'kam, ijo ang ngosan tana tuh Anak Ulun bokowasa ahkan ngapun dusa.” Turus Yesus nuhtui umba ulun bolomu rih, “Kuat ngohtun kahcang'mu tutang buli!”

⁷ Ulun bolomu rih ka kuat, tutang buli nokuh lohpouoh.

⁸ Ohkot ulun-ulun nohto ang nyolung rih, iro mihkoh tutang monara Pohotala, kotului Pohotala ius nonga kowasa ijo kodorih hajo ahkan kolunon.

Yesus na'ah Mateus

⁹ Pongohuli Yesus nohtah unuk rih. Pondehan nyalan, Io nohto ihcobehti ponagih pajak bogare Mateus, rahat tuot ang kantor pajakoh. Yesus nuhtui umba io, “Olai, umba Ahku!” Mahka Mateus tombok tutang ngahasu Yesus.

¹⁰ Kotihka Yesus rahat kuman ang lohpou Mateus, lombut aro ponagih pajak, tutang ulun-ulun ijo tongohu eam pios, bain ulun aro, umba kuman hombo-homboh Yesus tutang murid-murid-Oh.

¹¹ Tohko ulun-ulun Parisi ijo nohto hal orih. Turus iro ngisok umba murid-murid Yesus, “Ombai sababoh guru'kam kuman hombo-homboh umba ponagih pajak tutang ulun-ulun eam pios?”

¹² Yesus ngonih kisok'ndo turus mutah, “Ulun ijo borigas eam perulu dokter, tihkas ulun ijo ngarot iou.

¹³ Solidik iou inon rimai ayat Surat Borasih tuh, ‘Ahku nohuang kasihsayang tutang eam porahpah ohcin’. Kotului Ahku lombut eam ahkan na'ah ulun ijo ngohu aropoh ius pios, molekan ulun ijo ngohu aropoh hina.”

Kisok tohou puasa

¹⁴ Uliorih murid-murid Yohanes Popondus lombut nokuh Yesus. Turus iro ngisok, “Ombai ihkai tutang ulun-ulun Parisi puasa, tahpi murid-murid Amai eam?”

¹⁵ Yesus mutah, “Koloukuwoh tiruk'kam? Tou karon pakin ang pesta kawin poros ahtoi'ndo amat pongaten bahkas magun anai hihcoumba iro? Tatu eam! Tahpi ahkan johcok ohkot ponganten bahkas rih tonomin tahkan iro. Ohkot rih punan iro puasa.

¹⁶ Eam aro ulun ijo nupang hatiu ijo jari usang, umba ihco benang ijo magun bohua. Kotului benang tupang rih ahkan ngorunyut tutang morutat hatiu rih, nyiring kojoriaioh rutat hatin ijo labih kohajoioh.

¹⁷ Kodorih ka'a eam aro ulun ijo nyuang anggur bohua, aang tolehkunguhpak ijo usang. Tului tolehkung rih ahkan borutat tutang rusak, turus angguroh botuhak. Anggur ijo bohua harus tonyuang ang tolehkunguhpak ijo bohua ka'a, mangat koduo-duooh tohtap tahan.”

Anak okon lohpou sombayang – tutang ulunbawi ijo nokawet jubah Yesus

¹⁸ Pondehan Yesus bopander umba murid-murid Yohanes Popondus lombut ihcobehti okon lohpou sombayang. Io suhkuntu'ut ang husuk Yesus hawui homauh, “Anak aik'ku ijo bawi, punai iou palus. Tahpi sudikah lombut ahkan nambitoh mangat ia bolum huli.”

¹⁹ Yesus kuat tutang homboh murid-murid-Oh tulak umba ulun rih.

^20-21 Ang beteng jalan, anai ihcobehti bawi ijo jadi duo balas toun kotahiu poros tongondaha ijo lombut ngondoni Yesus tahkan hila lihkut. Tului io niruk, “Asar ahku nokawet jubah-Oh ih, ahku musti pios.” Turus io nokawet lain jubah Yesus.

²² Uhunrih, Yesus ngulos tutang nohto bawi orih turus nuhtui umba io, “Tanggar ahtoi'mu anak-Ku! Tului ihko porocaya umba Ahku, ihko pios!” Ang ohkot orih ka'a ulunbawi rih pios.

²³ Pongohino Yesus johcok ang lohpou okon lohpou sombayang rih. Kotihka Io nohto pomain-pomain musik kindoiotu tutang aro ulun ijo paham boho,

²⁴ Io nuhtui umba iro, “Soluka ihkam paring! Anak tuh eam palus tahpi io tuh tihkas tiruh iou.” Iro paringoh ngotao Yesus.

²⁵ Uli ulun-ulun rih soluka, Yesus nyolong nokuh tahkun anak rih tutang nambit longoioh. Turus kuat anakbawi rih.

²⁶ Kabar rih tosiar'kanhopus tana rih.

Yesus ngopios duo behti bobulen

²⁷ Yesus tulak tahkan anan tutang ang beteng jalan anai duo behti bobulen ngahasu Io. Iro ngoriak, “Anak Dawid, masi ihkai!”

²⁸ Kotihka Yesus nyolong nokuh lohpou, koduo behti bobulen rih lombut nokuh Io. Yesus ngisok umba iro, “Inon ihkam porocaya ijo Ahku dahpot ngopios ihkam?” “Porocaya Amai!” hion'ndo.

²⁹ Turus Yesus ninjok mahtan iro hawoi nuhtui, “Tului ihkam porocaya, nyolung, inon ijo ihkam harapoh.”

³⁰ Mahka iro tou nohto. Yesus pingat iro honong karas, mangat ara monyiar borihta hal orih ahkan iai ka'a.

³¹ Tahpi iro tulak nyiar borihta tohou Yesus nokuh hopus tana orih.

Yesus ngopios ulun bisu

³² Ohkot koduo ulun rih tulak, tohko ihcobehti bisu ijo konowasa bain roh ja'at omin ulun nokuh Yesus.

³³ Yesus muhko roh ja'at rih tutang ang uhun orih rih ka'a ulun rih tou bopander hino. Ulun aro rih helan tutang nuhtui, “Jaha pu'u ihkai nohto kojadian sama koloutuh ang Israel!”

³⁴ Tahpi ulun-ulun Parisi nuhtui, “Kopala roh-roh ja'at ijo nonga Ahkai kobasa ahkan muhko roh-roh ja'at rih.”

Yesus ngasi nohto ulun aro

³⁵ Kodorih Yesus tulak hokodiling, tahkan ihco lowu ahkan lowu ijo bohkon tutang tahkan ihco dukuh nokuh dukuh ijo bohkon. Io mongajar ang lohpou-lohpou sombayang, tutang momborihta Kabar Hinut tohou koloukuwoh Pohotala moretah kolou Lahca. Io ngopios ulun-ulun ijo ngarot kokaro mahcam ponyahkit tutang cahcat behtiu.

³⁶ Ohkot Yesus nohto ulun aro rih, Io masi umba iro, tului iro torongong tutang eam anai koba'asoh, kolou tobiri ijo eam aro sokahtikoh.

³⁷ Turus Yesus nuhtui umba murid-murid-Oh, “Aangkonohtomoh aro tahpi ulun pongohtomoh tihkas honjiot.

³⁸ Tului rih nyawot umba tepun umo rih mangat ngirim ulun pongohtom ahkan ngohtom hasil umoioh.”