MATEUS 23 - BOWOT BOHUA

Popingat mangat bua-buah toharep guru-guru agama tutang ulun-ulun Parisi

¹ Turus Yesus nuhtui ahkan ulun aro tutang ahkan murid-murid-Oh,

² “Guru-guru agama tutang ulun-ulun Parisi duon kowasa ahkan monapsir hukum Museh.

³ Tului orih mone'et tutang numbun paringoh ijo tomoretah'ndo. Tahpi ara nguan, inon ijo tonguan'ndo, tului iro eam nguan gawiu kolou ijo tongajaroh.

⁴ Iro nyawot hal-hal ijo bohali, tutang nonga poroturan-poroturan ijo bahat, tahpi honjiot ka, iro eam dohop ulun nguaioh.

⁵ Paring ijo tonguan'ndo baya unuk ponopahjah ulun ih. Iro ha'at hapan tali sombayang ijo lumbah, tutang pokombu rumbai-rumbai jubah iro!

⁶ Iro jolik unuk ijo pio-piosoh ang pesta-pesta, tutang korusi ijo tamam ang lohpou-lohpou sombayang.

⁷ Iro sanang tu'u tomohoromat bain ulun ang pasar-pasar, tutang tona'ah, ‘Amai Guru.’

⁸ Tahpi ihkam ara kani tona'ah, ‘Amai Guru,’ bain Guru'kam, tihkas anai ihco tutang ihkam paring hokonduang.

⁹ Tutang ara ihkam tona'ah ihcobehti ka ang kolunon tuh, ‘Amai’ bain Amai'kam tihkas ihco, iorih Amai ijo ang soruga.

¹⁰ Tutang ara ihkam kani tona'ah ulun ‘Okon’, tului okon tihkas anai ihco, io rih Lahca Ponyolamat ijo tonobowot bain Pohotala.

¹¹ Ulun ijo pongohajo ang louk ihkam koharusoh monjadi pohalu'kam.

¹² Ulun ijo ngondiang aropoh ahkan tongopinda, tutang ulun ijo ngominda aropoh ahkan tongahtang.”

Yesus nosalan sihpat pura-pura

¹³ “Colahka ihkam guru-guru agama tutang ulun-ulun Parisi! Ihkam guru pura-pura. Ihkam ngapeng ulun monjadi uhkup ain Pohotala. Ihkam bongom eam kani monjadi anak uhkup ain Pohotala, tutang ulun bohkon ijo kani, ihkam ngapengjalaioh. [

¹⁴ Colahka ihkam guru-guru agama tutang ulun-ulun Parisi: Ihkam tuhkang pura-pura. Ihkam ngobalik balu-balu tutang morapas lohpouoh, tutang ahkan nuhtup koja'at orih, ihkam bodo'a ombu-ombu. Tului orih hukum ihkam noin bahat!]

¹⁵ Colahka ihkam guru-guru agama tutang ulun-ulun Parisi! Ihkam tuhkang pura-pura! Ihkam tulak mahcu-mahcu mihtah tasik, tutang nomuoi soup tanadanum baya tihkas ahkan nguan ihcobehti nyolong agama'kam. Tutang uli ulun nyolong agaman'kam, ihkam nguan io bakal nyolong norahka ijo duo tikat molobien koja'atoh tahkanumba ihkam bongon!

¹⁶ Colahka ihkam okon-okon ijo bobulen! Ihkam majar tuh, ‘Amat ulun nulut aropoh nitu Lohpou Tuhan, ulun orih eam bocahu ang tulutoh; tahpi amat io nulut aropoh nitu bolou ang Lohpou Tuhan, io bocahu tului tulutoh rih.’

¹⁷ Ihkam ulun-ulun uong ijo bobulen! Umoh ijo labih boguna: bulouoh ata'ai Lohpou Tuhan ijo ngonjorian bulou rih borasih?

¹⁸ Ihkam majar jituh ka'a, ‘Amat ihcobehti monulut nitu mesbeh, ulun rih eam bocahu bain tulutoh rih; tahpi amat io monulut nitu pononga ang ngosan mesbeh rih, io bocahu bain tulutoh rih.’

¹⁹ Eam inon kobobulenoh ihkam! Umoh ijo molobien gunaioh? Ponongaoh ata'ai mesbeh ijo ngonjorian pononga rih borasih?

²⁰ Bain orih, amat ihcobehti monulut nitu mesbeh rih, rimai io monulut aang aran mesbeh, tutang aang aran paring pononga ijo anai ang ngosanoh.

²¹ Tutang amat ihcobehti monulut nitu Lohpou Tuhan rih, rimai io monulut aang aran Lohpou Tuhan rih tutang aang aran Pohotala ijo mohcon ang anan.

²² Tutang amat ihcobehti monulut nitu soruga, orih rimai io monulut aang aran pododusan Tuhan, tutang ang aran Pohotala ijo tuot ang pododusan orih.

²³ Colahka ihkam guru-guru agama tutang ulun-ulun Parisi! Ihkam tuhkang pura-pura. Karo-rarampah kolou selasih, adas manis, tutang jintan ka, ihkam nonga sepersopuluoh ahkan Tuhan. Padahar hal-hal ijo boguna ang hukum-hukum agama, kolou jahkaoh: Koadilan, balos kasih, tutang kosotiaan, eam ihkam podulioh. Padahar orih ijo koharusoh ihkam nguai, eam mohonou ijo bohko-bohkon ka'a.

²⁴ Ihkam okon-okon ijo bobulen! Langou ijo ang korih'mu ihkam nyaringoh, podahar unta bolu-bolum ihkam nolonoh!

²⁵ Colahka ihkam guru-guru agama tutang ulun-ulun Parisi! Ihkam tuhkang pura-pura! Pikan-pikan tutang piring-piring'kam, ihkam muhioh borasih-rasih hila luaroh, padahar luwangoh kojilok samasino umba hal-hal ijo ihkam dahpotoh hapan kokarasan tutang kokuhu'kam.

²⁶ Parisi bobulen! Muhi soun borasih-rasih hila luwangoh tahkan pikan-pikan tutang piring-piring'kam, mangat hila luaroh monjadi borasih ka'a!

²⁷ Colahka ihkam guru-guru agama tutang ulun-ulun Parisi! Ihkam tuhkang pura-pura! Ihkam kolou tanom-tanom ijo bosahpu puhti; ang luaroh topahjahoh tamam, tahpi ang luwangoh tuwi kobain tulang tutang paringoh ijo maram-buhok.

²⁸ Kodorih ka'a ihkam. Tahkan luaroh ihkam, topahjahoh pios ahkan ulun; tahpi ang luwang ahtoi, ihkam tuwi umba alik tutang polanggaran-polanggaran.”

Yesus nujum tohou hukum ijo buah guru-guru agama tutang ulun-ulun Parisi

²⁹ “Colahka ihkam guru-guru agama tutang ulun-ulun Parisi! Ihkam tuhkang pura-pura! Ihkam mangun lowong-tanom pios ahkan nabi-nabi, tutang mihtik tugu-tugu pongingat, tahkan ulun-ulun ijo pombolumoh pios.

³⁰ Tutang ihkam nuhtui, ‘Jahkaoh ihkai bolum ang jaman tahtu ajuh 'kai lomoi, ihkai eam ahkan umba ulun ijo munu nabi-nabi.’

³¹ Jadi ihkam mongahku bongon ijo ihkam uhtus ulun-ulun ijo munu nabi-nabi!

³² Amat kolourih, toturusoh tutang ngonyolung dusa-dusa ijo jari tonopara bain tahtu ajuh'kam rih!

³³ Ihkam ja'at tutang puna uhtus ulun ja'at! Koloukuwoh ka'a ihkam duon monyolamat arop'kam tahkan hukuman ijo ang norahka?

³⁴ Ngonihrih tu'u-tu'u: Ahku ahkan ngirim nabi-nabi, ulun-ulun pitar tutang guru-guru; ihcokobarih tahkan iro ahkan ihkam munuoh, tutang ihcokobarih ijo bohkon, ahkan ihkam nyalipoh. Anai ijo ahkan ihkam nyiksaoh ang lohpou-lohpou sombayang, tutang ihkam hodulu-duluoh tahkan ihco lowu nokuh lowu ijo bohkon.

³⁵ Tului orih, ihkam ahkan tomohukum tului pomunu ijo konuan'kam toharep paring ulun ijo eam bosala – nopara tahkan pomunuoh Abel ijo eam bosala, nyiring pomunuoh Sakharia anak Berekia, ijo ihkam munuoh ang holat Lohpou Tuhan, umba mesbeh.

³⁶ Porocayarih: Paringoh rih ahkan tongohtun bain ulun-ulun jaman tuh!”

Yesus ngasi umba Yerusalem

³⁷ “Yerusalem, Yerusalem! Nabi-nabi ihko munuoh. Suruhan-suruhan Pohotala ihkomukah umba bahtu nyiring mahtoi. Jari pira tikat Ahku jolik ngohihco paring ulun ponduduk'kam kolou pohukmanuk nguhkup anak-anakoh ang pinda ilatoh, tahpi ihko eam kani!

³⁸ Tului rih Pohotala eam hino homboh'kam.

³⁹ Kota'an iou: Nopara tahkan huntuh ihko eam ahkan nohto Ahku hino nyiring ihkam nuhtui, ‘Tomborehkat rih Io ijo lombut ngosan aran Tuhan.’ ”