MATEUS 14 - BOWOT BOHUA

Tohou pompahtoi Yohanes Popondus

¹ Aang uhun orih Horodes, pongowasa tana Galilea ngonih, tohou Yesus.

² Horodes bopander umba okon-okonoh, “Musti tuh Yohanes Popondus ijo jari bolum hoduli! Orih kotuluioh Io tepun kowasa napa tandahelan.”

³ Tului sounumba rih Horodes jari nyuhu nawan Yohanes tutang mangaoh turus posolongoh nokuh luwang sipir. Horodes nguan kolouorih tului Herodias oruh konduangkuhungoh iorih Pilipus.

⁴ Bain pu'u Yohanes nuhtui kolihtuh umba Horodes, “Eam tou ihko kawin umba Herodias!”

⁵ Kotu'uioh Horodes jolik munu Yohanes, tahpi io mihkoh umba ulun-ulun, bain iro ngohu Yohanes nabi.

⁶ Ang ohkot Horodes pesta ang ondou ulang tounoh, anak bawi Herodias narinasai ang toharep ulun tipen. Tarinasai orih paham ngojorih ahtoi Horodes,

⁷ nyiring Horodes mbowot umbaoh hapan tulut, inon beweu ijo io nyawot ahkan tononga ahkaioh.

⁸ Tului sonuhu bain inaioh, anakdara rih ngohawot, “Ahku nyawot kuhung Yohanes Popondus tonga ahkak'ku huntuh ka'a ang ngosan talam!”

⁹ Ngonih sawot orih, Horodes sedih samasino. Tahpi tului io jari nulut aropoh ang toharep uluntipenoh, io moretah numbun sawot anakdara rih.

¹⁰ Io nyuhu ulun tulak nokuh sipir ahkan nohtok kuhung Yohanes.

¹¹ Pongohuli kuhung Yohanes rih, onin nyolong ang ngosan talam tutang nonga ahkan anakdara rih. Turus anak dala rih ngominoh kuhung Yohanes Popondus ahkan inaioh.

¹² Uliorih rih murid-murid Yohanes lombut ngomin buhkang Yohanes tutang nanomoh. Turus iro tulak tutang narung hal rih ahkan Yesus.

Yesus nonga ukun ahkan limo kujan behti

¹³ Kotihka Yesus ngonih tarung rih, Io jahkat alut bongoi tutang nohtah unuk orih, turus tulak nokuh ihco unuk ijo tonih. Tahpi kotihka ulun-ulun ngonih tohou hal orih, iro nohtah lowun-lowun'ndo tutang tulak ngohasu Yesus nyuru jalan tana.

¹⁴ Ohkot Yesus jahkat tahkan alut tutang nohto ulun aro rih, Io ngasi umba iro. Turus Io ngopios ulun-ulun ijo mondam ang louk iro.

¹⁵ Cohit ondouoh, murid-murid Yesus lombut tutang nuhtui umba Io, “Ondou jari cohit, tutang unuk tuh mahcu. Labih pios Amai nyuhu ulun-ulun tuh tulakbuli, mangat duon moli ukun ang desa-desa.”

¹⁶ “Eam usah iro buli,” hion Yesus, “ihkam iou nonga iro ukun.”

¹⁷ “Ihkai tihkas ngina limo luhte tutang duo ohcin!” mutah murid-murid Yesus rih.

¹⁸ “Omin kanohtoi,” hion Yesus.

¹⁹ Pongohino Yesus nyuhu ulun aro rih tuot ang ngosan uru. Turus Io ngomin limo luhte tutang duo ohcin rih, turus nokara nokuh langit tutang ngohawot torimakasih ahkan Pohotala. Ulimbarih Io nyila-nyila luhte rih umba longoi-Oh, tutang nonga orih ahkan murid-murid-Oh ahkan'ndo mbagi-mbagioh ahkan ulun aro rih.

²⁰ Iro rih paringoh, kuman nyiring bosuh. Ulijadi murid-murid Yesus nipun kolowin ukun ulun aro rih, anai duobalas tahcung tuwi.

²¹ Ijo kuman ang ohkot orih, anai kira-kira limo kujan behti, jaha tongiso ulunbawi tutang anak-inyam.

Yesus nyalan ang isun danum

²² Uliorih rih Yesus nyuhu murid-murid-Oh jahkat alut tutang houn mihtah danou, pondehan Io nyuhu ulun aro rih buli.

²³ Ulimba ulun aro rih buli, Yesus nuhkat ihco puruk, bongoi, kani bodo'a. Kotihka ondou kani pindong, Yesus magun anai ang anan bongoi iou.

²⁴ Pondehan orih alut ijo tongojahkat murid-murid Yesus jari mahcu ang tohun-tohun danou. Alut rih kulak-kalik tonahpi luhcak, tului alut rih nohusung bahiu.

²⁵ Holang jam tolu umba jam onam topolaoi, Yesus lombut nokuh iro nyalan ang ngosan danum.

²⁶ Kotihka murid-murid-Oh nohto Io nyalan ang ngosan danum, iro tokohcit samasino. “Otu!” koriak'ndo mihkoh.

²⁷ Tahpi Yesus turus na'ah iro, “Tenengrih! Ahku Yesus. A'ai mihkoh!”

²⁸ Turus Petrus nuhtui, “Amat ihko puna Yesus, nyuhu ahku nokuh nyalan ang ngosan danum.”

²⁹ “Nokuhrih,” hion Yesus. Mahka Petrus nusuluh tahkan alut, nyalan ang ngosan danum tutang nokuh Yesus.

³⁰ Tahpi uhun Petrus nohto eaminon kohajon lucak bohiu ang danou orih io mihkoh, tutang nopara bolonyot, “Tuhan, dohop!” kociakoh.

³¹ Yesus jeleng notahjuk longoi-Oh, tutang nambit io hawui nuhtui umbaoh, “Petrus, Petrus ihko tuh kurang porocaya. Ombai ihko bembang nokuh Ahku?”

³² Turus Yesus doro Petrus jahkat alut tutang bohiu ka tondo.

³³ Mahka murid-murid-Oh suhkuntu'ut nyembah Yesus. Iro nuhtui, “Tu'u-tu'u Io Tuhan Anak Pohotala!”

Yesus ngopios ulun-ulun poros ang Genesaret

³⁴ Ohkot iro johcok ang pohoi danou, iro jahkat ang kowang Genesaret.

³⁵ Tutang kotihka ulun-ulun ang anan, nohto ijo io ijo lombut rih, Yesus, iro narung borihta rih nokuh paring daerah ang kodiling lowu rih. Turus paring ulun poros tongitot nokuh Yesus.

³⁶ Tutang iro nyawot umba Io mangat dahpot ngaweng jubah-Oh, olu baya putingoh. Turus paring ijo ngawengoh nyolung pios.