MATEUS 13 - BOWOT BOHUA

Porobasa tohou ihcobehti pongumo

¹ Ang ondou rih Yesus nohtah lohpou orih turus tulak nokuh saran danou tutang tuot ang anan.

² Aro samasino ulun ijo hopuhpung ang kodiling Yesus, tului orih Io tuot ang luwang alut, mahka ulun aro rih tombok ang kowang.

³ Turus Yesus majar aro hal ahkan'ndo hapan porobasa. “Ihcobehti ulun pongumo tulak nuhkan bonyiu,” kodorih hion Yesus nopara kesah-Oh.

⁴ “Kotihka uhun nuhkan, anai bonyi torotuhkan ang tohun jalan. Turus bulung lombut tutang bonyi orih iro kumai nyiring lingih.

⁵ Anai ka'a tonuhkan ang tana ijo hobahtu liang ijo tanaoh honjiot. Bonyi-bonyi rih jeleng hoduring, tului kurang tana.

⁶ Tahpi ohkot mahtan ondou jari nyoput, uhat-uhatoh nopara molanyu, turus koring tutang mahtoi, tului uhatoh eam timbon ang tana.

⁷ Anai hino bonyi ijo tomonyi ang tohun ruwut duhi. Ruwut duhi rih hoduring moruwut during bonyi rih nyiring mahtoi.

⁸ Tahpi anai ka'a bonyi ijo tomonyi ang tana ijo bosiwuh, turus momua; anai ijo solahtus, anai ijo onom pulu, tutang anai ijo tolun pulu lihpet karoioh.”

⁹ Uli ngesah porobasa orih Yesus nuhtui hino, “Amat anaingina tolinga, pios ngonih!”

Ombai Yesus majar umba porobasa

¹⁰ Pongohuli murid-murid Yesus lombut tutang ngisok umba Io, “Ombai Amai hapan porobasa amat hopander umba ulun aro rih?”

¹¹ Yesus mutah, “Tului ihkam ius tononga pononga ahkan ngotaan rahasia tutang koloukuwoh Pohotala moretah, rahatoh iro eam.

¹² Tului ulun ijo ius anaingina, ahkan tononga labih aro hino, tutang io ahkan bokolabihoh. Tahpi ulun ijo eam anaingina ino-inon, mahka honjiot, ijo anai ang io malah ahkan tonomin.

¹³ Orih kotuluioh Ahku hapan porobasa amat hopander umba ulun aro, tului iro nohto, tahpi kolou ulun ijo eam nohto; iro ngonih, tahpi kolou ulun ijo eam ngonih tutang eam solembang.

¹⁴ Honong orih nyolung ijo tonujum Nabi Yesaya, ‘Pohotala nuhtui: Iro ahkan toturus ngonih tahpi eam horahti; iro ahkan toturus nopahjah tahpi eam kota'an ijo nyolung.

¹⁵ Tului tiruk ulun-ulun tuh ius monjadi tapak, tolingan iro ius monjadi borengen tutang mahtan iro jari tongomihcop. Orih nyalung, mangat mahtan iro ara nopahjah, tolingan iro ara ngonih, tiruk iro ara horahti, tutang ara hoduli ahkak-Ku, turus Ahku ngopios iro.’ ”

¹⁶ “Tahpi eam-inon ko-utungoh ihkam,” hion Yesus umba murid-murid-Oh, “kotului ihkam tu'u-tu'u nohto tutang ngonih.

¹⁷ Ingatrih, aro nabi tutang ulun ijo te'et umba Pohotala, jolik nohto ijo ihkam nohto uhuntuh, tahpi iro eam nohtooh. Iro jolik ngonih ijo ihkam ngonih uhuntuh, tahpi iro eam ngonihoh.”

Yesus monarang porobasa tohou ihcobehti ulun pongumo

¹⁸ “Ngonihrih, inon rimai porobasa tohou pongumo rih.

¹⁹ Bonyi ijo tonuhkan ang jalan, nindung ulun-ulun ijo ngonih Kabar Hinut, tohou koloukuwoh Pohotala moretah, tahpi eam solembang. Ang ja'at rih lombut tutang mosuwit inon ijo ius tomonyi ang ahtoi'ndo.

²⁰ Bonyi ijo tonuhkan ang unuk ijo bobahtu liang, nindung ulun-ulun ijo ngonih Kabar Hinut orih, jion norimaoh hawoi jolik ahtoi.

²¹ Tahpi kabar orih eam muhat timbon ang ahtoi'ndo tului orih eam tahan tahi. Kodorih iro ngarot kosusah ata'ai tonoporos bain Kabar Hinut orih, nyolung iro murtad.

²² Bonyi ijo tonuhkan ang tohun ruwut duhi, nindung ulun-ulun ijo ngonih kabar orih, tahpi mihkoh tohou pombolum iro tutang jolik bolum molowi. Tului orih kabar tahkan Pohotala tonohahpit ang luwang ahtoi iro nyiring eam momua.

²³ Tutang bonyi ijo tomonyi ang tana ijo bosiwuh, nindung ulun-ulun ijo ngonih kabar orih, tutang ngumangoh. Iro mua aro, anai ijo solahtus, anai ijo onom pulu, tutang anai ijo tolun pulu lihpet buaoh.”

Porobasa tohou tingon louk gandum

²⁴ Yesus ngesah hino ihco porobasa ahkan ulun aro, hioi-Oh, “Amat Pohotala moretah, ang-konuai kolou porobasa tuh: Ihcobehti pongumo miwit bonyiu ijo pios ang umoioh.

²⁵ Ang sino ngolomi, uhun paring ulun uras ngarok, musuh ulun pongumo orih lombut, morawuh paung tingon ang louk gandum rih, turus nohtahoh.

²⁶ Kotihka karo-kombulan orih bolum tutang during-duringoh nopara soluka, gihtan ka'a tingon-tingon rih.

²⁷ Turus ulun-ulun upahan ain pongumo rih lombut nokuh tehpun umo tutang nuhtui, ‘Tuan, eamkah Tuan ijo miwit bonyi ijo pios ang umon Tuan? Koloukuwoh konjadioh, nyiring anai tingon-tingon ang anan?’

²⁸ Pongumo rih mutah, ‘Orih ang konuan musuh.’ Turus ulun-ulun upahan pongumo rih ngisok hino, ‘Tuan, kani ihkai tulak morunatmawau tingon rih?’

²⁹ ‘Ara,’ hioioh, ‘tului amat tingon-tingon rih tongomawou noin gandumoh tosohpit.

³⁰ Nauhoh tingon-tingon rih bolum hombo-homboh nyiring uhun kohtom. Noin Ahku ahkan nuhtui umba ulun-ulun ijo ngohtom: Nipun ih soun tingon-tingonoh, mohtong, turus nyahaoh. Uliorih nipun gandumoh, turus nginaoh ang luwang koraking.’ ”

Porobasa tohou luang sawi

³¹ Yesus nyorihta hino ijo porobasa ahkan ulun aro, hioioh, “Amat Pohotala moretah ang konuaioh kolou porobasa tuh: Ihco luang sosawi omin bain ihcobehti ulun, turus konombulan ang umoioh.

³² Luang sosawi orih, luang bonyi ijo paling koik. Tahpi amat jari hoduring, io monjadi ihco pokohajoi ang louk karo-kombulan. Io monjadi bahtang, nyiring bulung-bulung lombut ngosalah ang da'ai-da'aioh.”

Porobasa tohou ragi

³³ Anai ihco porobasa bohkon ijo ngesah Yesus ahkan ulun aro. “Amatmira Pohotala moretah, koada'aioh kolou ragi ijo omin bain ihcobehti ulunbawi, turus pohicooh umba ohpat pulu tahkar golahpung gandum nyiring kamir paringoh!”

Ombai Yesus monguna porobasa

³⁴ Paringoh tongajar Yesus ahkan ulun aro honong hapan porobasa.

³⁵ Tului kodorih nyolung ijo tonuhtui bain nabi, “Ahku hapan porobasa amat hopander umba iro; Ahku ahkan momborihta hal-hal ijo bosuhuk tahkan uhun tona'oioh tana tuh.”

Yesus monarang porobasa rih tohou tingon louk gandum

³⁶ Uliorih Yesus nohtah ulun aro rih, turus nyolong lohpou. Murid-murid-Oh lombut tutang ngisok, “Tou Amai narang ahkan 'kai, riman porobasa orih tohou tingon ang louk gandum rih.”

³⁷ Yesus mutah, “Ulun ijo miwit bonyi ijo pios orihrih Anak Ulun.

³⁸ Umo rih, iorih kolunon tuh. Bonyi ijo pios rih io rih ulun-ulun ijo monjadi ukup ain Pohotala. Tingon orihrih ulun-ulun ijo hobarih hihco sehtan.

³⁹ Musuh ijo morawuh luang tingon, orih rih Sehtan. Ohkot kohtom io rih Ondou Kiamat, tutang ulun-ulun ijo ngohtom orihrih molehkat-molehkat.

⁴⁰ Koloumba tingon-tingon ijo tonipun tutang tonyaha ang luwang baho, kodorih ka'a ang Ondou Kiamat noin.

⁴¹ Anak Ulun ahkan nyuhu molehkat-molehkat-Oh nipun tahkan louk ukup aiuoh paring ijo kotuluioh ulun nguan dusa, tutang paring ulun bohkonoh ijo nguan koja'at.

⁴² Iro paring ahkan tonyahkah nokuh luwang tuku hobaho ijo bohu-bohung; ang anan iro ahkan nangih tutang ngarot.

⁴³ Tutang ulun-ulun ijo nguan kohondak Pohotala ahkan ngorolondang kolou mahtan ondou ang luwang Kolunon Bohua Ain Pohotala, Amai iro. Jadi amat anaingina tolinga, ngonihoh!”

Porobasa tohou ponahtou ijo bocuhuk

⁴⁴ “Amat Pohotala momoretah, koada'aioh kolou porobasa tuh: anai ponahtou ijo bosuhuk ang luwang tana, turus tonyombang bain ihcobehti ulun, tutang sonuhukoh huli nokuh luwang tana. Pongohino tului kojorihoh, ulun rih tulak bodagang opah ponahtou-ponahtou aiouoh, turus hoduli tutang moli tana rih.”

Porobasa tohou mutiara ijo komok

⁴⁵ “Amat Pohotala moretah, ijo koada'aioh kolou porobasa tuh: Ihcobehti podagang ngurah mutiara-mutiara ihco borega.

⁴⁶ Kotihka io nyombang ihcokoluang mutiara ijo luar biasa kokomokoh, jeleng io tulak tutang bodagang paring ponahtou aiouoh turus moli mutiara ijo ihco rih.”

Porobasa tohou monjala

⁴⁷ “Amat Pohotala moretah, koada'aioh kolou porobasa umba jala ijo tonimbai nokuh danou, turus ngondahpot aro mahcam ohcin.

⁴⁸ Uli jala rih tuwi, jala orih konuhut nokuh isung tana, bain pongohcin-pongohcin umba-ohcin. Pongohuli iro tuot tutang ngopili ohcin-ohcin orih: Ijo pios, konina iro aang potoran, tutang ijo eam pios dian'ndo.

⁴⁹ Kodorih haloh ang Ondou Kiamat, molehkat-molehkat ahkan tulak ngopili ulun-ulun ijo ja'at tahkan ulun-ulun ijo numbun kohondak Pohotala.

⁵⁰ Pongohuli ulun-ulun ja'at orih tonyahkah nokuh luwang baho. Ang anan iro ahkan nangih tutang ngarot koporos.”

Ramu bohua tutang ramu usang

⁵¹ “Inon ihkam solembang paringoh rih?” Yesus ngisok. “Solembangrih Amai!” hion'ndo.

⁵² Turus Yesus nuhtui, “Bain orih nyinong guru agama, ijo ius monjadi barih Pohotala, sama umba ihcobehti tepun lohpou mopolua tahkan unuk ponahtouoh, ponahtou-ponahtou bohua tutang usang.”

Yesus eam tonorima ang Nasaret

⁵³ Ulirih Yesus umbot mongesah porobasa rih, Io nohtah unuk orih,

⁵⁴ turus hihkas nokuh lowu-humai-Oh. Ang anan Io tulak majar ang lohpou sombayang, tutang ulun-ulun ngonih Io ang anan, helan samasino. Iro nuhtui, “Tahkan umoh ulun tuh, duon kosolembang koloutuh? Tutang tahkan amoh Io duon kowasa ahkan nguan karo-tandahelan?

⁵⁵ Eamkowa Io anak tuhkang kahju? Eamkowa Maria inai-Oh tutang konduang-konduang-Oh orihrih Yakobus, Yusep, Simon tutang Yudas?

⁵⁶ Tutang eamkah konduang-konduangoh bawi, mohcon ang ohtoi louk ihto ka'a? Tahkan amoh Io duon paring orihrih?”

⁵⁷ Mahka iro nulak Yesus. Turus Yesus nuhtui umba iro, “Ihcobehti nabi tomohoromat ang amo-amoh, kocoali ang lowu-humaoh, tutang ang lohpou-kosalah aiu bongoi.”

⁵⁸ Tului orih Yesus eam nguan aro tandahelan ang anan bain iro eam porocaya.