MARKUS 9 - BOWOT BOHUA

¹ ‘‘Kota'anrih!’’ hion Yesus, ‘‘tahkan louk ihkam ang ohtoi anai ijo eam ahkan mahtoi, sounumba nohto Pohotala moretah honong kowasa!’’

Yesus konohajo

² Onom ondou pongohuli Yesus ngomin Petrus tutang Yakobus tutang konduangoh Yohanes, bongoniro nokuh ihco puruk ijo isung. Ang tohimo mahtan iro Yesus hubah tapai.

³ Hahtiu-Oh monjadi puhtiletah mokilat. Eam aro ihcobehti muhpuk hatin ka ang kolunon tuh ijo duon borasih kolou kopuhtiletah orih.

⁴ Pongohuli iro tolu behti murid-Oh rih nohto Yesus bopander umba Elia tutang Museh.

⁵ Mahka Petrus nuhtui umba Yesus, ‘‘Amai Guru, momih samasino, ihto ang ohtoi. Pios ihkai nombok tolu kemah: ihco ahkan Amai, ihco ahkan Museh, tutang ihco hino ahkan Elia.’’

⁶ Kotu'uioh Petrus eam ta'an, inon ijo io harus nuhtuioh, tului io tutang koduo injahoh rih, rahat mihkoh samasino.

⁷ Pongohuli bounondou ngolindung iro tutang tahkan bounondou rih konahan auh ijo nuhtui, ‘‘Tuhrih Anak-Ku, ijo Ahku ngasihoh. Ngonih Io!’’

⁸ Jele-jeleng iro, nohto kodiling iro, tutang eam hino nohto, iai beweu, ang anan hihco iro, sobali Yesus iou.

⁹ Ohkot iro mosuluh tahkan puruk rih Yesus mopingat iro, ‘‘Ara momborihta ahkan iai ka, inon ijo ihkam jari nohtooh nanai, sounumba Anak Ulun tonokuat tahkan popahtoi.’’

¹⁰ Iro tehen umba pohtoh orih, tahpi ang louk iro bongoi, iro nopara hokisok inon konohuang Yesus umba ‘‘bolum hoduli tahkan popahtoi.’’

¹¹ Mahka iro ngisok umba Io, ‘‘Ombai guru-guru agama nuhtui ijo Elia lombut labih houn?’’

¹² Yesus mutah, ‘‘Elia puna lombut labih soun, ahkan ngomorong karo aangihco. Tahpi koloukuwoh haloh umba Anak Ulun? Inon sabab ang luwang Surat Borasih tonyurat, ijo Io ahkan aro ngarot tutang konohina ulun?

¹³ Tahpi Ahku nuhtui umba'kam: Elia jari lombut, tutang ulun-ulun nguanumba io numbun konohuang iro. Orih hotohorong umba ijo jari tonyurat luwang Surat Borasih tohou aropoh.’’

Yesus ngopios anak ijo nyorupang roh ja'at

¹⁴ Kotihka Yesus tutang kotolu murid-Oh jari anai hoduli hihco murid-murid-Oh ijo bohkon, iro nohto aro ulun ang anan. Pira-pira guru agama rahat hojawab umba murid-murid Yesus rih.

¹⁵ Kodorih ulun-ulun rih nohto Yesus, iro torongong, turus nokoru naharang Io.

¹⁶ ‘‘Inon ijo ihkam nyoal jawaboh umba guru-guru agama rih?’’ hion Yesus umba murid-murid-Oh.

¹⁷ Ihcobehti tahkan louk ulun aro rih mutah, ‘‘Amai Guru, ahku ngomin anak'ku nokuh Amai. Io bisu tului nyorupang roh ja'at.

¹⁸ Amat roh rih nyalung io, behtiuoh tomingas-manduk kotana, bauioh hole'e, nyihpoioh ngoret tutang sohopus behtiuoh monjadi kohejang. Ahku nyawot murid-murid Amai muhko roh ja'at orih, tahpi iro eam duon nguanumbaoh.’’

¹⁹ Mahka Yesus nuhtui umba iro, ‘‘Eaminon ihkam tuh! Ihkam tu'u-tu'u ulun ijo eam porocaya. Johcok mira Ahku harus mohcon hihco ihkam tutang bosabar nohimo ihkam? Ngomin anak rih nokuh ohtoi!’’

²⁰ Iro ka'a ngomin anak orih ahkan Yesus. Kodorih roh ja'at rih nohto Yesus, io nguan behtin anak orih konyereng-kohejang nyiring anak orih ngonyahtu pole-polek ang tana. Nyamaioh hole'e.

²¹ Turus Yesus ngisok umba amaioh, ‘‘Jari pira kotahiu io koloutuh?’’ ‘‘Tahkan io honong koik!’’ hion amaioh.

²² ‘‘Jari bojoin roh ja'at rih kani munu io tuh, hawui monahakoh nokuh luwang baho ata'ai nokuh luwang danum. Tahpi amat Amai duon dohop, sudirih Amai masi ihkai tutang dohop ihkai!’’

²³ ‘‘Inon hion'mu? Amat Amai duon?’’ hion Yesus. ‘‘Koparing orih duon, amat ulun tu'u-tu'u porocaya!’’

²⁴ Toturus amai orih ngociak, ‘‘Tuhan, ahku porocaya tahpi kaporocaya'ku rih tahpas. Dohoprih ahku mangat labih porocaya hino!’’

²⁵ Ohkot Yesus nohto ijo ulun aro nopara lombut hopuhpung, Io moretahoh roh ja'at rih honong tuhtui, ‘‘Roh borengen tutang bisu, Ahku moretahoh ihko soluka tahkan anak tuh, tutang ara samasino nyolong huli nyorupang io!’’

²⁶ Roh ja'at rih ngociak, turus nguan behtin anak rih konyereng-kohejang, pongohino soluka tahkan anak rih. Anak orih topahjah kolou mahtoi, nyiring paring ulun nuhtui, ‘‘Io jari mahtoi!’’

²⁷ Tahpi Yesus nambit longoi-Oh tutang dohop io kuat. Anak orih rih ka kuat.

²⁸ Uli Yesus jari nyolong ahkan lohpou, murid-murid-Oh lombut toni-tonih nokuh Io tutang ngisok, ‘‘Inon kotului ihkai eam duon muhko roh ja'at rih?’’

²⁹ Yesus mutah, ‘‘Roh ja'at rih eam duon tomuhko umba cara inon ka'a, bohkonumba hapan do'a.’’

Yesus hopander hino tohou popahtoi-Oh

³⁰ Yesus tutang murid-murid-Oh nohtah unuk rih tutang noturusoh ponyalan nyuru Galilea. Yesus eam kani ulun kota'an ang umoh Io anai,

³¹ kotului Io beteng majar murid-murid-Oh, ‘‘Anak Ulun ahkan tonyarah nokuh kowasan kolunon,’’ kolourih hion Yesus, ‘‘tutang Io ahkan tomunu, tahpi aang ondou ijo kotolu Io ahkan tonombolum!’’

³² Murid-murid-Oh eam solembang inon ijo tonyorihta bain Yesus, tahpi iro mihkoh ngisok umba Io.

Iai ijo paling hajo?

³³ Iro johcok ang Kapernaum. Uli ang lohpou, Yesus ngisok umba murid-murid-Oh, ‘‘Ihkam hojawab tohou inon ang beteng jalan nanai?’’

³⁴ Iro eam mutah, tului ang beteng jalan iro hojawab tohou iai ijo palinghajo.

³⁵ Yesus tuot, turus na'ah koduo balas murid-Oh rih. Io nuhtui umba iro, ‘‘Ulun ijo kani monjadi ijo numur ihco, io harus monjadi ijo laiu tutang harus monjadi pohalu paring ulun.’’

³⁶ Pongohuli Yesus ngomin ihcobehti anak-inyam, tutang potombok anak-inyam rih ang tohun, tohimo iro paring. Yesus kihpit anak orih rih tutang nuhtui umba murid-murid-Oh,

³⁷ ‘‘Ulun ijo monorima 'cobehti anak koloutuh tului Ahku, rimai norima Ahku. Tutang ulun ijo norima Ahku, io eam norima Ahku beweu, tahpi norima ka'a Io ijo nyuhu Ahku.’’

Iai ijo eam molawan ihto, hobarih umba ihto

³⁸ Turus Yohanes nuhtui umba Yesus, ‘‘Amai Guru, ihkai nohto ihcobehti muhko sehtan hapan aran Amai. Tutang ihkai baca io, bain io eam tahkan ihto.’’

³⁹ Tahpi Yesus nuhtui, ‘‘Ara baca io, tului eam ihcobehti ka ijo nguan kahtahelan ngosan arak-Ku, duon toturus ngonjilok-njilok Ahku.

⁴⁰ Tului ulun ijo eam hokolawan umba ihto, rimai hobarih umba ihto.

⁴¹ Ingat ih! Ulun ijo nonga korih ahkan'kam tului ihkam murid Lahca Ponyolamat, io musti ahkan norima uhpahoh.’’

Hal-hal ijo kotuluioh ulun napa dusa

⁴² ‘‘Iai kotuluioh anai ihco tahkan ulun-ulun ijo koik tuh, eam porocaya hino umba Ahku, labih pios amat bahtu hajo ngahut ang ujatoh, tutang io ponolahtong nokuh luwang tasik.

⁴³ Amat longon'mu nguan ihko bodusa, tohtok longo orih! Labih pios ihko bolum umba Pohotala earo longom silai tului tahkan ihko anai duo hososila longon'mu nyolong nokuh norahka, iorih baho ijo kototahiu. [

⁴⁴ Ang anan baho eam dahpot bolop tutang ulot eam tou mahtoi.]

⁴⁵ Tutang amat pa'an'mu nguan ihko rih bodusa, nohtok pa'am rih. Labih pios ihko bolum umba Pohotala earo silai pa'an'mu, tahkanumba ihko anai koduo kososila pa'an'mu todian ihko nokuh luwang norahka. [

⁴⁶ Ang anan baho eam tou bolop tutang ulot eam tou mahtoi.]

⁴⁷ Amat mahtan'mu, kotuluioh ihko bodusa, ngoruit dian orih! Labih pios ihko nyolong Kolunon Bohua Ain Pohotala eam aro ihcoluang mahtan'mu, tahkan ihko anai koduo luang mahtan'mu todian nokuh luwang norahka.

⁴⁸ Ang anan baho eam duon bolop tutang ulot eam duon mahtoi.

⁴⁹ Nyinong ulun ahkan konorasih umba baho, kolou pononga ijo konorasih umba tonyu.

⁵⁰ Tonyu rih pios, tahpi amat monjadi tawah, dahpotrih konomohit huli? Jadi, kohondakoh ihkam monjadi kolou tonyu – bolum hopahkat tutang hokobuah.’’