MARKUS 5 - BOWOT BOHUA

Yesus ngopios ulun ijo tonyalung roh ja'at

¹ Pongohuli Yesus tutang murid-murid-Oh johcok ang pohoi Danou Galilea, ang tana Gerasa.

² Kodorih Yesus nosuluh tahkan alut, Io tonokuh ihcobehti ulunbahkas ijo bohua tahkan kolowong tanom.

³ Ulun orih tongowasa bain roh ja'at tutang mohcon ang kolowong tanom. Io jari eam duon tonomanga hino; olu umba ratai.

⁴ Jari bojoin pa'ai tutang longoioh tomanga, tahpi toturus ratai-ratai rih ponahtotoh, tutang sonaman ang pa'aioh ponolotoh. Io kolourih ba'as, nyiring eam aro ihcobehti ka'a duon nahan io.

⁵ Hondou ngolomi io kumbang-kumbanga ang kolowong tutang aang puruk-puruk, hawui bokociak-ciak tutang pohimang behtiuoh umba bahtu.

⁶ Kotihka tahkan mahcu io nohto Yesus lombut, turus nokoru suhkuntu'ut ang tohimo Yesus.

⁷ Umba auh ijo muhing io bokociak, ‘‘Yesus, Anak Pohotala Ijo Pahamisung! Ahkan ihko nguaninonoh ahku tuh? Aang aran Pohotala, ahku nyawot, ararih nyiksa ahku!’’ (

⁸ Ulun rih nuhtui kolouorih, tului Yesus nuhtui umba io, ‘‘Roh ja'at solukarih tahkan ulun tuh!’’)

⁹ Turus Yesus ngisok umba io, ‘‘Iai aran'kam?’’ Ulun rih mutah, ‘‘Aran'kai ‘Legion’ – tului ihkai tuh aro samasino!’’

¹⁰ Dulang-duli io nyawot hawoi paham, mangat Yesus ara nyuhu roh-roh ja'at rih soluka tahkan daerah anan rih.

¹¹ Doni unuk rih anai aro kawanurak ijo rahat ngurah uhkui ang beteng korong puruk.

¹² Roh-roh ja'at rih nyawot umba Yesus, ‘‘Nyuhu ihkai nyolong nokuh luwang urak-urak rih.’’

¹³ Tutang Yesus sotuju. Jadi, roh-roh ja'at rih soluka tahkan ulun rih turus nyolong nokuh luwang urak-urak rih. Paring kawan urak rih nokoru, tutang nyohowu tahkan saran kowang, koluwang danou turus bolonyot – paringoh anai kira-kira duo kujan urak.

¹⁴ Pongindoi-pongindoi urak rih nokoru, monyiar kabar rih nokuh lowu tutang dukuh hokodilingoh. Turus ulun-ulun soluka nohuang nohto inon ijo jari nyolung.

¹⁵ Iro lombut nokuh Yesus, turus nohto ulun nanai ijo tonyalung roh ja'at rih beteng io tuot ang anan, io jari hopokajan tutang tirukoh ka'a jari borondong. Mahka iro paringoh monjadi mihkoh.

¹⁶ Ulun-ulun ijo ius monyaksi bongoi kojodian ijo nyolung tohou ulun rih, tutang urak-urak rih, nyorihtaoh inon ijo jari nyolung.

¹⁷ Turus ulun-ulun daerah orih nyawot umba Yesus mangat nohtah daerah rih.

¹⁸ Ohkot Yesus jahkat ahkan luwang alut, ulun ijo nanaioh ijo tonyalung roh ja'at rih, nyawot umba Yesus, mangat tou umba Io.

¹⁹ Tahpi Yesus eam sotuju, hioi-Oh, ‘‘Bulirih tutang nyiar ahkan injah-jolahan'mu inon ijo ius konuan Tuhan ahkan'kam tutang eaminon kopiosoh Io tohimo ihko!’’

²⁰ Ulun rih ka tulakbuli, tutang nopara monyiaroh, ahkan daerah Sopulu Lowu rih, inon ijo jari konuan Yesus umba io. Paring ulun helan ngonihoh.

Anak Yairus – Ulunbawi ijo ngorimas jubah Yesus

²¹ Yesus buli hino nokuh pohoi danou. Ang saran danou rih aro ulun lombut hokorumbung ang kodiling Yesus.

²² Lombutrih ihcobehti ijo bogare Yairus. Io orih ihcobehti ohkon lohpou sombayang ang lowu rih. Kotihka io nohto Yesus, io suhkuntu'ut ang tohimo Yesus,

²³ tutang nyawot honong paham, ‘‘Amai, anak bawi aik'ku poros paham. Kanirih kowa lombut ahkan nambitoh, mangat io pios tutang eam mahtoi!’’

²⁴ Mahka Yesus ka'a tulak homboh Yairus. Aro ulun ngohasu Io tutang ngonohkin Io tahkan kokaro hila.

²⁵ Ang loukoh iro anai hino ihcobehti ulunbawi ijo jari duo balas toun tongondaha ijo hotuhtung umba polombutbulanoh.

²⁶ Paring ponahtouoh jari ohpah hapaoh ahkan bayar dokter-dokter, tahpi eam aro ijo duon ngopios io, ponyahkitoh botambah malah koporosoh mondahang hototurus.

²⁷ Ulunbawi rih jari ngonih aro tohou Yesus. Mahka ang tohun ulun aro orih, io ngasak aropoh ngondoni Yesus tahkan lihkut,

²⁸ tului io niruk, ‘‘Asar ahku ngorimas kolambiu-Oh, ahku ahkan pios!’’

²⁹ Io ngendeh jubah Yesus, tutang kotihka orih ka'a tongondahaoh tondo. Io nginyam ijo io jari pios.

³⁰ Aang wayah rih ka'a Yesus nginyam anai ihcokowasa ijo soluka tahkan arop-Oh. Mahka Io ngulos nokuh ulun aro rih tutang ngisok, ‘‘Iai ijo ngendeh jubah-Ku?’’

³¹ Murid-murid-Oh nuhtui, ‘‘Amai nohto bongon, anai koloutuh aro ulun ijo ngasak. Tutang Amai magun ngisok iai ijo ngendeh Amai?’’

³² Tahpi Yesus turus iou nohto hokodiling-Oh ahkan ngurah ulun ijo jari ngendeh-Oh.

³³ Ulunbawi orih ijo kota'an inon ijo jari nyolung umba aropoh hawoi hogenjeh tutang kihkoh io suhkuntu'ut ang tohimo Yesus tutang ngahku paringoh.

³⁴ Turus Yesus nuhtui umba ulunbawi rih, ‘‘O anak-Ku tului ihko porocaya umba Ahku, ihko pios! Tulak honong solamat. Ihko jari pios samasino!’’

³⁵ Pondehan Yesus bopander, pira-pira ulun ijo sonuhu tahkan lohpou Yairus, ‘‘Anak tuan jari palus,’’ hion iro umba Yairus. ‘‘Eam usah tuan ngobo'o Amai Guru hino.’’

³⁶ Earo poduli inon ijo tonuhtui ulun-ulun rih, Yesus nuhtui umba Yairus, ‘‘Ara mihkoh, porocaya iou!’’

³⁷ Turus Yesus nyalan hototurus, tahpi Io eam nyuhu ihcobehti ka umba Io, tihkas Petrus doro Yakobus tutang Yohanes konduangoh.

³⁸ Kotihka iro johcok ang lohpou Yairus, Yesus nohto ulun-ulun surang-siruk, tutang ngonih tangih tutang tahtum ijo paham.

³⁹ Turus Yesus nyolong tutang nuhtui umba iro, ‘‘Ombai dalou boho tutang nangih? Anak rih eam palus; io baya tiruh!’’

⁴⁰ Iro ngota'o auh Yesus. Mahka Io nyuhu iro paring soluka. Turus Yesus ngomin inai-amai anak rih tutang iro tolu murid-Oh nyolong nokuh luwang tahkun anak rih.

⁴¹ Yesus nambit longon anak orih turus nuhtui umba io, ‘‘Talita kum,’’ ijo rimai, ‘‘Anak bawi, Ahku nuhtui umba'ko, kuat!’’

⁴² Anak bawi rih jeleng kuat, tutang nyalan. (Umuroh jari duo balas toun.) Paring ijo nyaksi kojadian rih paham helan!

⁴³ Tahpi Yesus honong paham baca iro monyiar hal orih ahkan ia-iai ka. Turus hioi-Oh, ‘‘Nonga anak rih kuman.’’