MARKUS 4 - BOWOT BOHUA

Porobasa tohou ihcobehti pongumo

¹ Yesus majar hino ang saran Danou Galilea. Aro samasino ulun hopuhpung ngodiling Io. Tului rih Io tulak tuot ang luwang ihco alut ang ngosan danum, tutang ulun aro rih tombok ang saran danou.

² Turus Yesus majar aro hal ahkan iro, hawui umba porobasa ka'a. Koloutuh Io majar iro.

³ ‘‘Ngonihrih! Anai 'cobehti pongumo tulak monyi bonyiu.

⁴ Kotihka io uhun nuhkan, anai bonyi rih ijo toponyi ang tohun jalan. Turus lombut bulung tutang bonyi rih konukun'ndo nyiring opah.

⁵ Anai ka'a yo toponyi ang unuk hobahtu-liang ijo tanaoh nihpih. Bonyi-bonyi rih jeleng ijo bolum, tului kurang tanaoh,

⁶ tahpi kotihka mahtan ondou notang, during-during bonyi rih nopara molanyu uliorih koring tutang mahtoi tului uhatoh eam timbon.

⁷ Anai hino bonyi ijo toponyi ang unuk pulou ruwut-duhi. Ruwut duhi rih bolum tutang ngohuwut karon-during bonyi rih nyiring eam duon mua.

⁸ Tahpi anai ka'a bonyi ijo toponyi ang tana ijo bosiwuh. Bonyi orih tumbu monjadi hajo, turus mua, anai ijo tolun pulu, anai yo onom pulu, anai ijo solahtus lihpet buaioh.’’

⁹ Uli nyorihta dolang porobasa orih, Yesus nuhtui, ‘‘Amat ihkam anai tolinga, pios ngonihoh!’’

Ombai Yesus hapan porobasa

¹⁰ Kotihka Yesus bongoi, ulun-ulun ijo jari ngonih karon-ajar-Oh, lombut nokuh Io homboh koduo balas murid-Oh. Iro nyawot Io monarang riman porobasa rih.

¹¹ Mahka Yesus nuhtui umba iro, ‘‘Ihkam jari tononga pononga, mangat ngota'an dolang bokulim tohou koloukuwoh Pohotala moretah. Tahpi ulun-ulun ijo luar, tonongajar umba porobasa,

¹² mangat, ‘Iro ahkan turus ngorondongoh tahpi eam kota'an inon ijo nyolung, iro ahkan toturus ngonih, tahpi eam iro horahtioh, tuh nyolung mangat iro ara nohto tutang horahti tutang ara lombut nokuh Pohotala tutang Pohotala ngapun iro.’ ’’

Yesus monarang porobasa tohou ihcobehti pongumo

¹³ Pongohuli Yesus nuhtui umba iro, ‘‘Amat ihkam eam horahti porobasa rih, koloukuwoh ihkam horahti porobasa-porobasa ijo bohkon?

¹⁴ Pongumo orih, iorih ulun ijo mborihta kabar tahkan Pohotala.

¹⁵ Bonyi ijo tomonyi ang jalan nindung ulun-ulun ijo ngonih borihta tohou koloukuwoh Pohotala moretah. Kolourih ngonih, sehtan lombut tutang ngomin inon ijo jari konombulan luwang ahtoi iro.

¹⁶ Bonyi ijo tomonyi ang tana bahtu liang, tanaoh nihpih nindung ulun-ulun ijo ngonih kabar rih, tutang turus norimaoh honong jorih ahtoi.

¹⁷ Tahpi kabar rih eam nguhat timbon aang ahtoi'ndo, nyiring eam tahan tahi. Kodorih iro ngarot kosusah ata'ai tongoporos bain norima kabar rih, turus iro murtad.

¹⁸ Bonyi ijo toponyi ang tohun unuk ruwut duhi rih, nindung ulun-ulun ijo ngonih kabar rih,

¹⁹ tahpi mihkoh tohou pombolum iro tutang jolik bolum labih tahtou. Kojolik ahkan mahca-mahcam hal, nyolong nokuh luwang ahtoi'ndo. Tului rih kabar tahkan Pohotala, tongohuwut ang luwang ahtoi'ndo, nyiring eam momua.

²⁰ Tutang bonyi ijo toponyi ang tana ijo bosiwuh rih, nindung ulun-ulun ijo ngonih kabar orih tutang norimaoh, iro mua aro, anai ijo tolun pulu, anai ijo onom pulu, anai ijo solahtus tikat lihpet karon-buaoh.’’

Sumbu ijo tonokulop umba potoran

²¹ Turus Yesus nuhtui hino, ‘‘Pu'u ulun nuhtang sumbu turus nyokulopoh umba potoran ata'ai nginaoh ang pinda kahtil? Kuwoh io eam ngina sumbu orih ang owuhoh?

²² Eam aro ijo bosuhuk ino-inon ijo eam ahkan tonohto; tutang eam anai ijo bokulim ijo eam ahkan botarang.

²³ Tului orih amat anai tolinga hinut io ngonih!’’

²⁴ Turus Yesus nuhtui hino, ‘‘Nohtoanirih, inon ijo ihkam ngonihoh tuh! Tihpong ijo hapan ihkam nihpong ulun bohkon, ahkan hapan ka'a bain Pohotala ahkan nihpong ihkam – tutang mahi molowi karoi hino.

²⁵ Tului ulun ijo jari anaingina, ahkan tononga labih aro hino; tahpi ulun ijo eam arongina, isut ijo anai ang io ahkan kononin ka'a.’’

Porobasa tohou bonyi ijo bolum

²⁶ Yesus nutung tuhtui-Oh hino, ‘‘Amat Pohotala moretah kolou Lahca, koada'anoh tou tonindung kolou ihcobehti ijo nawur bonyiu ang umoioh.

²⁷ Ngolomi ondou io tiruh; boloangondou io monyun. Tutang pondehan orih, bonyi-bonyi rih turus bolum tutang nyolung hajo. Tahpi koloukuwoh caraoh, bonyi-bonyi orih bolum tutang monjadi hajo, ulun orih eam kota'an.

²⁸ Tana orihrih ijo honong bongoi nonga hasir: ang pahtu-pahtuk pahtingoh, uliorih luangoh, turus buaoh.

²⁹ Tutang amat gandum rih jari botuo, ulun rih ka'a nopara ngohtom, tului jari ohkotoh ahkan ngohtom.’’

Porobasa luang sosawi

³⁰ ‘‘Amat Pohotala moretah, umba inon ihto duon nindungoh?’’ Yesus ngisok hino. ‘‘Sutu inon ijo tou ihto hapaoh ahkan monarang orihrih?

³¹ Amat Pohotala moretah, ang konuai kolou porobasa tuh: Ihco koloang sosawi kononin bain ihcobehti pongombulan turus tonanomoh ang tana. Luang sosawi rih luang ijo pongokoikoh ang kolunon tuh.

³² Tahpi amat jari bolum, io monjadi ijo pongohajoi ang louk komulan-komulan. Da'ai-da'aioh kodorih borakap, nyiring bulung-bulung duon lombut, tutang napa kosalahoh ang da'ai, ang pinda kosingouoh.’’

³³ Kolouorih Yesus majar ulun honong hapa aro porobasa kolou rih, komahcu umoh iro duon horahti.

³⁴ Yesus turus mohapan porobasa amat Io majar ulun-ulun rih. Tahpi amat Io bongoi honong murid-murid-Oh, Io monarang paringoh ahkan iro.

Yesus potondo bohiu bolowut

³⁵ Aang ngolomi ondou rih ka'a, Yesus nuhtui umba murid-murid-Oh, ‘‘Olai rih, ihto bolayar mihtah nokuh pohoi danou.’’

³⁶ Mahka Yesus jahkat alut tutang murid-murid-Oh, nohtah ulun-ulun aro ang saran danou, turus jahkat alut ijo sama. Alut-alut bohkon anai ka'a ang anan. Pongohuli Yesus tutang murid-murid-Oh nopara bolayar.

³⁷ Eam tahi pongohuli lombut bahiu bolowut. Lucok nopara nahpuk alut tutang nyolong nokuh luwang, manyou alut rih nyiring tuwi umba danum.

³⁸ Ang komburi alut rih, Yesus rahat tiruh, tutang kuhung-Oh ang isun karuk. Murid-murid-Oh ngomonyun Io. Iro nuhtui, ‘‘Amai Guru, inonkah Amai eam poduli, ihto colahka?’’

³⁹ Yesus kuat, turus nokonyat bohiu rih, tutang nuhtui umba danou, ‘‘Tondo, tenengrih!’’ Bahiou ka tondo, tutang danou monjadi paham teneng.

⁴⁰ Turus Yesus nuhtui umba murid-murid-Oh, ‘‘Ombai ihkam mihkoh? Ombai ihkam eam porocaya umba Ahku?’’

⁴¹ Mahka iro monjadi mihkoh tutang nuhtui umba sama aropoh, ‘‘Iairih kotu'uioh ulun tuh, nyiring bahiu tutang lucok ka'a te'et umba auh-Oh.’’