MARKUS 16 - BOWOT BOHUA

Yesus bolum hoduli

¹ Kotihka ondou Sabat jari nokalou, Maria Magdalena, Maria inai Yakobus tutang Salome hihkas moli minyak ngaramas otun Yesus.

² Homboh-ngohkos samasino ohkot mahtan-ondou boloang, ang ondou ijo pahtok minggu rih iro hihkas nokuh tanom.

^3-4 Ang behteng jalan iro pander sama aropoh, ‘‘Iai ijo dohop ihto molinang bahtu ahtop aang baunlowong tanom?’’ Tului bahtu rih hajo samasino. Tahpi sojohcokoh ang anan iro nohto bahtu rih jari hokisat.

⁵ Turus iro nyolong koluwang tanom rih. Ang luwangoh, sila kotou, iro nohto ihcobehti ulunbiou ijo hapan jubah puhti rahat tuot tutang iro tokohcit.

⁶ Ulunbiou rih nuhtui, ‘‘Ara mihkoh! Ahku kota'an ihkam ngurah Yesus ulun Nasaret ijo jari tonyopolahki. Io eam aro ang ohtoi. Io jari bolum! Nohtorih iou, tuh lohkun unuk ulun pokaling Io.

⁷ Uhuntuh tulakrih nyiar iou kabar tuh ahkan murid-murid-Oh, ahkan Petrus. Manderrih, ‘Io tulak hounumba ihkam nokuh Galilea. Ang anan ihkam ahkan nohto Io ijo jari tomohtoh-Oh ahkan'kam.’ ’’

⁸ Mahka iro soluka tahkan tanom rih turus nokoru tului tokohcit tutang mihkoh. Iro eam momander ino-inon ahkan iai ka, tului mihkoh. [

LAIN KARANGAN MARKUS NUMBUN NASKAH IJO HOUN Yesus ngorinah arop-Oh ahkan Maria Magdalena

⁹ Uli Yesus monyun tahkan louk ulun mahtoi, homboh ngohkos ang ondou Minggu, Io pahtok-Oh pokarah arop-Oh ahkan Maria Magdalena. (Tahkan Maria orih pu'u Yesus muhko pihtu roh ja'at.) Ulun-ulun bawi tulak nokuh Petrus tutang injah-injah, turus nyorihtaoh honong iwak, paring ijo jari tonyorihtaoh ahkan iro bain ulun biou rih.

¹⁰ Mahka Maria Magdalena tulak nyiaroh kojodian rih ahkan injah-jolahan Yesus, ijo rahat porosahtoi tutang nangih. Uliorih Yesus bongoi nguha murid-murid-Oh, momborihta tahkan timur nokuh barat, borihta ijo borasih tutang abadi orih tohou kosolamatan ijo kototahiu.]

¹¹ Tahpi kotihka iro ijo ngonih Yesus bolum, tutang ijo Maria jari nohto Io, iro eam porocaya.

Yesus ngorinah behtiu ahkan duo behti murid-Oh

¹² Uliorih rih Yesus ngorinah arop-Oh ahkan duo behti murid-Oh umba cara ihco bohkon. Orih nyolung kotihka koduo behti murid-Oh nyalan nokuh ihco lowu.

¹³ Turus iro hoduli tutang momborihta hal orih ahkan ijo bohkonoh. Tahpi iro eam porocaya.

Yesus ngorinah arop-Oh ahkan murid-murid-Oh

¹⁴ Kojoriaioh Yesus ngorinah arop-Oh ahkan murid-murid-Oh sobalas behti, kotihka iro beteng kuman. Io ningak iro bain iro kurang porocaya, tutang turus mahang ahtoi'ndo, nyiring eam porocaya umba ulun-ulun ijo jari nohto bongoi ijo Yesus bolum.

¹⁵ Turus Yesus nuhtui umba iro, ‘‘Tulak'kam, nokuh sohapus kolunon, tutang momborihta ohrih Kabar Hinut tahkan Pohotala rih, ahkan paring ukup kolunon.

¹⁶ Ulun ijo eam porocaya ahkan tonohukum, tahpi ulun ijo porocaya tutang tonopondus ahkan solamat.

¹⁷ Monjadi kahta ijo iro porocaya, ulun-ulun rih ahkan muko roh ja'at ngosan arak-Ku; iro ahkan hopander a'ang basa-basa ijo eam iro pu'ungosonooh.

¹⁸ Amat iro nambit lohi ata'ai ngorih sowui, iro eam ahkan buah colahka. Amat iro ngina longoi ang ngosan ulun-ulun ijo poros, ulun-ulun rih ahkan pios.’’

Yesus hogahtang nokuh soruga

¹⁹ Limbah Tuhan Yesus hopander umba iro, Io hogahtang ahkan soruga. Ang anan Io moretah hihco umba Pohotala.

²⁰ Mahka murid-murid-Oh tulak momborihta Kabar Hinut tahkan Pohotala nokuh umo-umoh. Tutang Tuhan ka umba bogawi homboh umba iro, tutang ngorinah nguha kahtahelan-kahtahelan, ijo tononyiar iro rih tu'u.] [