LUKAS 8 - BOWOT BOHUA

Ulun-ulun bawi ijo dohop Yesus

¹ Eam tahi pongohuli, Yesus tulak nokuh lowu-lowu tutang kapung-kapung, mangat mborihtaoh Kabar Hinut, ijo Pohotala nopara moretah kolou Lahca. Duo balas murid-Oh homboh umba Io.

² Kolourih ka'a pira-pira ulunbawi ijo jari tongopios tahkan kowasa roh ja'at tutang ponyahkit. Iro rih Maria ijo konohawot Magdalena (pihtu roh ja'at jari dian tahkan io);

³ ka'a Yohana oruh Khuza, pogawai istana Horodes; Susana, tutang aro hino ulunbawi bohkon. Umba mbolanja aropbongoi, iro ndohop Yesus tutang murid-murid-Oh.

Porobasa ulun pongumo

⁴ Ulun-ulun turus iou lombut nokuh Yesus tahkan pira-pira lowu. Tutang aang ohkot, jari aro ulun hopuhpung, Yesus mborihta ahkan iro porobasa uli tuh:

⁵ ‘‘Ihcobehti ulunpongumo tulak nuhkan bonyioh. Kotihka io rahat nuhkan, anai bonyi ijo tonuhkan ang jalan. Tongai toninjak ulun, tutang ijo tongai konukun bulung.

⁶ Anai ka'a tonuhkan ang unuk ijo bobahtu liang. Aang ohkot hoduring bonyi rih molanyu tului tanaoh koring.

⁷ Anai hino bonyi ijo tonuhkan ang tohun ruwut duhi. Ruwut rih bolum homboh bonyi rih, tutang moruwutoh nyiring mahtoi.

⁸ Tahpi anai hino bonyi ijo tonuhkan ang tana ijo subur, turus bolum tutang momua buaoh solahtus lihpet.’’ Uli mborihta porobasa rih, Yesus nuhtui, ‘‘Amat anai tolinga pios ngonih!’’

Ombai Yesus mborihta hapa porobasa

⁹ Murid-murid Yesus ngisok umba Io riman tahkan porobasa rih.

¹⁰ Yesus mutah, ‘‘Ihkam jari tononga pononga ahkan ngota'an ijo bokulim, tohou koloukuwoh Pohotala moretah kolou Lahca. Tahpi ulun-ulun bohkon tongajar umba porobasa, mangat iro nohtoanioh, tahpi eam ta'an inon ijo nyolung; tutang iro ngonih, tahpi eam solembang.’’

Yesus mander porobasa tohou ihcobehti pongumo

¹¹ ‘‘Tuhrih rimai porobasa rih: Bonyi rih iorih auh Pohotala.

¹² Bonyi ijo nuhkan aang jalan nindung ulun-ulun ijo ngonih auh orih. Tahpi Sehtan lombut tutang nahkou auh orih tahkan ahtoi iro, ahkan iro ara porocaya tutang tonyolamat.

¹³ Bonyi ijo tonuhkan ang unuk ijo bobahtuliang, nindung ulun ijo aang ohkot ngonih Kabar Hinut rih, norimaoh hawui sanang ahtoi. Tahpi Kabar Hinut rih eam muhat timbon ang ahtoi'ndo. Iro porocaya honjulu iou, tutang ang ohkot tihkas lombut, iro murtad.

¹⁴ Bonyi ijo nuhkan ang tohun ruwut duhi nindung ulun ijo ngonih Kabar Hinut rih, tahpi mihkoh tohou pombolum'ndo, hawui jolik bolum molowi tutang sanang ang luwang kolunon tuh. Paringoh mohahpit ahtoi'ndo nyiring eam aro momua bua ihco jadi.

¹⁵ Bonyi ijo tonuhkan ang tana ijo subur nindung ulun ijo ngonih Kabar Hinut rih, turus nginaoh luwang ahtoi ijo hinut tutang morong. Iro tahanngarot nyiring nihpun buaoh.’’

Sumbu ijo nyokulop pinda potoran

¹⁶ ‘‘Eam anai ulun ijo nutang sumbu turus nyokulopoh pindaluwang potoran, ata'ai nginaoh ang pinda kahtil. Tahpi Io ahkan nginaoh ang owuhoh, ahkan ulun paring nyolong, duon nohto koloangoh.

¹⁷ Eam anai ijo bosuhuk ijo eam ahkan tonopahjah; tutang eam anai ijo konongulim ijo eam ahkan tonguap tutang tongota'an.

¹⁸ Tului rih nohtoaniohrih pio-pios, inon ijo ihkam ngonih. Tului ulun ijo jari anaingina aang'co, ahkan tononga labih aro hino; tahpi ulun ijo eam anaingina aang'co, honjiot ijo magun anai aang io ahkan konomin ka'a.’’

Inai tutang konduang-konduang Yesus

¹⁹ Inai tutang konduang-konduang Yesus lombut nokuh Io, tahpi iro eam tou nyolong nokuh Io tului ulun dalou aro.

²⁰ Mahka anai ihcobehti ijo nuhtui ahkan Yesus, ‘‘Amai, inai-Mu tutang konduang-konduang Amai anai ang kanaha. Iro jolik nyombang umba Amai.’’

²¹ Tahpi Yesus nuhtui umba iro, ‘‘Ulun-ulun ijo ngonih auh Pohotala tutang numbun orih, iro rih inai tutang konduang-konduang-Ku.’’

Yesus potondo bahiu bolowut

²² Ang sino ondou Yesus tutang murid-murid-Oh jahkat alut. ‘‘Olai, ihto tulak nokuh pohoi danou,’’ hion Yesus umba iro. Mahka iro turus ka'a tulak.

²³ Aang ohkot iro rahat bolayar, Yesus tiruh. Songela bahiu bolowut paham napuh danou rih. Danum nopara nyolong nokuh luwang alut nyiring mocolahka iro paringoh.

²⁴ Murid-murid Yesus hihkas nokuh-Oh ngomonyun Io. Iro nuhtui, ‘‘Amai Guru, Amai Guru, ihto colahka!’’ Yesus monyun turus ningak bahiu tutang lucak ijo rahat holucak rih. Bahiu tutang lucak rih ka'a tondo turus danou nyolung teneng tu'u.

²⁵ Turus Yesus nuhtui umba murid-murid-Oh, ‘‘Ombai ihkam eam porocaya umba Ahku?’’ Iro monjadi helan tutang mihkoh. Tutang hopander iro sama arop'ndo, ‘‘Iai kotu'ui ulun tuh nyiring nonga poretah ahkan bahiu tutang lucak, tutang Io ka tonote'et!’’

Yesus ngopios ulun ijo sonorupang roh ja'at

²⁶ Yesus tutang murid-murid-Oh, turus bolayar johcok tanah daerah Gerasa, ang pohoi Danou Galilea.

²⁷ Aang ohkot Yesus sohowu ahkan kowang, Io tonokuh bain ihcobehti bahkas ijo sonorupang roh ja'at. Ulun rih tahkan lowu. Jari tahi io eam hopokajan tutang eam kani mohcon ang lohpou. Io tihkas kani mohcon ang lowong-lowong unuk tanom.

²⁸ Kotihka io nohto Yesus, io ngoriak turus suhkuntu'ut nyembah ang toharep Yesus honong na'ah, ‘‘Yesus Anak Pohotala Ijo Ijo Palingisung! Ahkan Ihko inonoh ahku tuh? Ahku nyawot ara monyiksa ahku!’’

²⁹ Ulun rih nuhtui kolourih, tului Yesus moretah roh ja'at rih, soluka tahkanumba io. Jari bojoin io konowasa roh ja'at rih, nyiring oluka longoi tutang pa'aioh jari masung umba ratai bosi tutang io tomojaga tu'u-tu'u, io magun ka'a duon mahtot ratai bosi rih turus omin roh ja'at rih nokuh padang balambah.

³⁰ Yesus ngisok umba ulun rih, ‘‘Iai aran'kam?’’ ‘‘Arak'ku ‘Legiun’,’’ putah ulun rih – tului anai aro roh ja'at ijo jari nyolung kohuang behtiuoh.

³¹ Roh ja'at rih nyawot honong paham, mangat Yesus ara muko iro nokuh luwang Lowong Popahtoi.

³² Doni unuk rih anai aro samasino urak ijo rahat ngurah uhkui ang kowang puruk. Roh-roh ja'at rih nyawot honong paham umba Yesus mangat nongaijin nyolong nokuh luwang kawan urak rih. Tutang Yesus sotuju.

³³ Mahka roh-roh ja'at rih soluka tahkan ulun rih, tutang nyolong koluwang kawan urak rih. Turus urak-urak rih nokoru tutang nomarang tahkan saran korong nokuh luwang danou, pongohino bolonyot.

³⁴ Ulun-ulun pengindoi urak rih nohto, inon ijo jari nyolung. Mahka iro nokoru tutang monyiar kabarrih nokuh lowu tutang duhkuh kodilingoh.

³⁵ Turus ulun-ulun soluka ahkan nohto inon ijo nyolung. Iro lombut nokuh Yesus, tutang ang anan iro nyombang ulun ijo jari, bokuhkoi tahkan roh-roh ja'at rih, rahat tuot doni pa'an Yesus. Io jari hopokajan tutang tirukoh jari morong. Iro monjadi mihkoh.

³⁶ Iro ijo nohto kojodian rih, nyorihta ahkan ulun-ulun, koloukuwoh ulun orih konopios.

³⁷ Turus paring ulun hapus tanah Gerasa rih, nyawot honong paham mangat Yesus nohtah unuk rih, tului iro paring mihkoh samasino. Jadi, Yesus lupat alut kani buli.

³⁸ Ulun ijo jari bokuhkoi tahkan roh-roh ja'at rih nyawot umba Yesus, mangat io tou ngohasu. Tahpi Yesus nyuhu io tulak buli, hioi-Oh,

³⁹ ‘‘Bulirih tutang nyiar ahkan iai, inon ijo jari konuan Pohotala ahkan'kam.’’ Mahka ulun orih hihkas monyiar nokuh hapus kodiling lowu, inon ijo jari konuan Yesus umba io.

Anak Yairus – Ulunbawi ijo ngendeh Yesus

⁴⁰ Kotihka Yesus buli nokuh pohoi danou, Io tonoharang honong jorih-jirah bain ulun-ulun tului iro ngindo-ngindoi Io.

⁴¹ Turus lombut ihcobehti kopala lohpou sombayang ang anan. Araioh Yairus. Io suhkuntu'ut ang tohimo Yesus tutang nyawot honong paham, mangat Yesus lombut nokuh lohpouoh,

⁴² tului ihco-ihcooh anak bawioh ijo boumur duo balas toun, doni palus. Podehan Yesus nyalan nokuh lohpou Yairus, ulun-ulun paham nyihki Yesus tahkan hoponyila.

⁴³ Ang loukoh anai hino ihcobehti ulunbawi ijo jari duo balas toun poros tongondaha ijo hotutung umba kobulanan. Io jari ngo'opah karon-ramuioh tului botawas umba dokter, tahpi eam aro ijo tou ngopios io.

⁴⁴ Ulunbawi rih ngondoni Yesus tahkan hila lihkut, turus nokawet lain jubah Yesus. Ang kotihka orih tongondaha ulunbawi rih tondo.

⁴⁵ Yesus ngisok, ‘‘Iai ijo nokawet Ahku?’’ Paring ulun eam ngahku. Turus Petrus nuhtui, ‘‘Amai anai aro ulun nyihki, ang kodiling Amai; iro monyihki Amai!’’

⁴⁶ Yesus nuhtui, ‘‘Tahpi anai ulun ijo nokawet Ahku. Ahku ta'an orih, tului anai kowasa ijo soluka tahkan behtik-Ku.’’

⁴⁷ Ulunbawi rih borondong, ijo konuaioh jari kota'an. Io nokuh tutang tohcotoh, turus suhkuntu'ut ang pa'an Yesus. Mahka io ngahku ang toharep paring ulun, ombai io nokawet Yesus, tutang ijo ponyahkitoh pios aang wayah rih ka'a.

⁴⁸ Yesus nuhtui umba io, ‘‘Anak-Ku, tului ihko porocaya umba Ahku, ihko pios. Tulak honong solamat.’’

⁴⁹ Podehan Yesus magun hopander, ihcobehti ulun tonyuhu lombut tahkan lohpou Yairus. Io nuhtui umba Yairus, ‘‘Anak bawi tuan jari palus. Eam usah tuan ngombo'o Amai Guru hino.’’

⁵⁰ Kotihka Yesus ngonih orih, Io nuhtui umba Yairus, ‘‘Ara mihkoh. Porocaya iou tutang anak'mu ahkan pios.’’

⁵¹ Uli johcok ang lohpou Yairus, Yesus em mongijin ihcobehti ka nyolong umba Io, tihkas Petrus, Yohanes tutang Yakobus tutang inai amai anak-inyam orih beweu.

⁵² Paring ulun uhun nangih tutang nahtum tului kopahtoi 'nakinyam orih. Tahpi Yesus nuhtui, ‘‘Ara nangih, 'nakinyam tuh eam mahtoi, io baya tiruh!’’

⁵³ Iro ngota'o auh Yesus, tului iro kota'an anak bawi orih jari palus.

⁵⁴ Pongohino Yesus nambit longon anak rih tutang nuhtui, ‘‘Monyun ihko anak!’’

⁵⁵ Hasong 'nakinyam rih huli ahkan 'nakinyam rih, tutang ang kotihka rih ka'a io kuat. Pongohino Yesus nyuhu nonga ukun ahkan anak rih.

⁵⁶ Ulun oko 'nakinyam rih helan samasino. Tahpi Yesus baca iro mborihta angjarinyolung rih ahkan iai ka.