LUKAS 24 - BOWOT BOHUA

Komonyun Yesus

¹ Aang ondou Minggu, homboh-ngohkos, ulunbawi-ulunbawi rih tulak nokuh tanom ngomin kasairorapah ijo jari iro nyodiaoh.

² Ang tanom, iro dahpot bahtu ponuhtup kolowong jari konokila.

³ Turus iro nyolong ahkan luwang lowong rih, tahpi eam nyombang otun Tuhan Yesus ang anan.

⁴ Pondehan iro tombok ang anan tutang torongo-rongong niruk hal rih, songela duo behti honong pokahjan puhti tombok doni iro.

⁵ Iro mihkoh samasino, turus nyembah suhkuntu'ut ang tana, pondehan koduo ulun rih nuhtui ahkan'ndo, ‘‘Ombai ihkam ngurah ulun bolum ang louk ulun mahtoi?

⁶ Io eam anai ang ohtoi. Io jari monyun! Ingat, inon ijo jari tonuhtui-Oh ahkan'kam ang ohkot Io magun ang Galilea,

⁷ ijo, ‘Anak Ulun harus tonosarahoh ahkan ulun bodusa, turus tomahpak, tutang aang ondou ijo kotolu Io ahkan monyun.’ ’’

⁸ Mahka topoingat ulunbawi-ulunbawi rih ahkan tuhtui-tuhtui Yesus.

⁹ Uli buli tahkan tanom rih, iro monyorihtaoh paring ang nyolung orih ahkan kosobalas rasul rih, tutang paring murid-murid-Oh ijo bohkonoh.

¹⁰ Ulunbawi-ulunbawi rih ijo monyiaroh paring orih ahkan murid-murid Yesus, iorih: Maria Magdalena, Yohana tutang Maria inai Yakobus, honong ulunbawi-ulunbawi bohkonoh ijo homboh umba iro.

¹¹ Tahpi rasul-rasul rih ngohu ulunbawi rih tihkas momander ijo eam-eam ih. Iro eam porocaya umba auh ulunbawi-ulunbawi rih.

¹² Tahpi Petrus hihkat tutang nokoru nokuh tanom. Honong njonguk ahkan luwang lowong turus nohto, tihkas benang pombungkus otu ang anan. Petrus helan samasino, turus buli honong aro kisokoh ang luwang ahtoioh, tohou inon ijo jari nyolung.

Ang beteng jalan nokuh Emaus

¹³ Aang ondou orih ka'a, duo behti murid Yesus rahat nyalan nokuh ihco desa ijo bogare Emaus, kira-kira sobalas kilomehter komahcuioh tahkan Yerusalem.

¹⁴ Sambir nyalan iro bopande-pander tohou karon angihcojari ijo nyolung rih.

¹⁵ Pondehan iro bopande-pander tutang ngurahtiruk, Yesus songela lombut tutang nyalan homboh iro.

¹⁶ Iro nohto Yesus, tahpi anai angihco ijo nguan iro eam kosono Io.

¹⁷ Turus Yesus nuhtui, ‘‘Inon ijo ihkam manderoh ang beteng jalan tuh?’’ Iro tondo pander tutang bauioh mosom.

¹⁸ Turus ihcobehti tahkan iro ijo bogare Kleopas, ngisok umba Yesus, ‘‘Amairih ihcobehti ulun bohkonuhtus ang Yerusalem ijo eam kota'an karon angihcojari ijo nyolung ang anan aang lainondou tuh?’’

¹⁹ ‘‘Angihcojari inon?’’ hion Yesus. ‘‘Angihcojari ijo nyolung umba Yesus, ulun tahkan Nasaret orih,’’ mutah iro, ‘‘Io Nabi. Auhtuhtui-Oh tutang karon gawi-gawi-Oh bokowasa samasino – pios numbun topahjah Pohotala, oluka numbun topahjah paring ulun.

²⁰ Imam-imam kopala tutang okon-okon utus ihto nyarah Io ahkan tomohukum mahtoi, tutang iro mahpak Io!

²¹ Podahal ihkai moharap ijo Iorih, ijo ahkan moliwus Israel! Tutang ondou tuh ondou kotolu tahkan hal orih nyolung.

²² Mahi hino, pira-pira ulunbawi tahkan barih ekai jari nguan ihkai tokohcit. Homboh ngohkos samasino iro nokuh kolowong,

²³ tahpi eam nyombang otui-Oh ang anan. Turus iro buli tutang nuhtui ijo iro nohto molehkat, tutang molehkat-molehkat rih nuhtui ijo Yesus bolum.

²⁴ Pira-pira ulun tahkan barih ekai turus hihkas ahkan tanom tutang nyombang ijo inon, ijo tonuhtui ulunbawi-ulunbawi orih puna kolourih, baya iro eam nohto Yesus.’’

²⁵ Turus Yesus nuhtui umba iro, ‘‘Ihkam puna balehoh! Dalou dandah ihkam porocaya paring ijo jari tonuhtui nabi-nabi!

²⁶ Eamkah Lahca Ponyolamat harus komo houn karot rih, punai norima kohajoi-Oh?’’

²⁷ Pongohino Yesus nyorihta ahkan iro inon ijo tonyurat ang luwang koparing Surat Borasih tohou arop-Oh, nopara tahkan buhku Museh tutang buhku nabi-nabi.

²⁸ Pondehan orih iro ngondoni lowukoik titun iro. Yesus nguan kolou-kolouoh kani nyalan toturus,

²⁹ tetapi iro nahan Io, ‘‘Mohcon ang unuk ekai,’’ hion iro umba Io, ‘‘uhuntuh jari doni cohit, tutang jari nopara ngalomi ka'a.’’ Mahka Yesus nyolong ahkan umba tiruh ang unuk rih.

³⁰ Aang ohkot tuot kuman homboh iro, Yesus ngomin luhte, ngohawot torimakasih ahkan Pohotala, mbola-bolah luhte rih umba longoi-Oh, turus nonga ahkan iro.

³¹ Pongohino iro borondong ijo orih Yesus. Tahpi Io dilap tahkan topahjah iro.

³² Hion iro, ihco umba ijo bohkon, ‘‘Eamkah nanyam ahtoi ihto kolou jorihtu'u, kotihka Io bopander umba ihto ang beteng jalan, tutang monyorihta usin Surat Borasih ahkan ihto?’’

³³ Uhun orih ka'a iro kuat turus buli nokuh Yerusalem. Ang anan iro nyombang kosobalas murid Yesus rih beteng hokupur umba ijo bohkon.

³⁴ Iro rih nuhtui, ‘‘Puna morong Tuhan jari bolum huli! Io jari ngorinah arop-Oh ahkan Simon!’’

³⁵ Koduo murid Yesus ijo punai lombut rih turus mborihta ang posuru iro ang beteng jalan, tutang koloukuwoh iro ngosono Tuhan aang uhun Io mbola-mbolah luhte.

Yesus ngorinah arop-Oh ahkan murid-murid-Oh

³⁶ Pondehan iro magun hopander, songela Yesus bongoi tombok ang tohun iro tutang nuhtui, ‘‘Kosanang ahkan'kam!’’

³⁷ Iro tokohcit tutang mihkoh, tului ngohu iro nohto otu.

³⁸ Tahpi Yesus nuhtui, ‘‘Ombai ihkam mihkoh? Ombai lombut kobembang-bembang ang ahtoi'kam?

³⁹ Topahjah longok-Ku, tutang topahjah pa'ak-Ku. Ngota'anrih ijo Ahku bongokrih tuh! Gayaprih tutang nohto, tului otu eam anai usiou ata'ai tulang, kolou ijo ihkam nohto aang Ahku.’’

⁴⁰ Yesus nuhtui kolourih hawui pokarah ahkan iro longoi tutang pa'ai-Oh.

⁴¹ Tutang pondehan iro magun jaham duon porocaya, tului karas kojorih tutang kohelan, Yesus ngisok iro, ‘‘Inon ihkam anai ngina ukun ang ohtoi?’’

⁴² Iro nonga ahkai 'cokungan uhcin goreng.

⁴³ Yesus ngomin ohcin rih, turus kumai-Oh ang toharep iro.

⁴⁴ Uliorih Io nuhtui ahkan'ndo, ‘‘Tuhrih hal-hal ijo jari Ahku manderoh ahkan'kam ohkot Ahku magun hihcoumba ihkam: ijo nyinong hal ijo tonyurat tohou Ahku aang buhku-buhku Museh, tutang nabi-nabi tutang Masmur, harus nyolung.’’

⁴⁵ Pongohuli Yesus nguap tiruk iro ahkai horahti kohondak Surat Borasih.

⁴⁶ Turus Io nuhtui umba iro, ‘‘Ang Surat Borasih tonyurat tohou Lahca Ponyolamat harus ngarot, tutang harus monyun huli tahkan popahtoi aang ondou ijo kotoluoh.

⁴⁷ Ka'a ijo ngosan aran Lahca Ponyolamat rih koharusoh tomborihta ahkan uhtus-uhtus, ijo ulun harus hubah, tutang ijo Pohotala ngapun dusa-dusa. Tutang borihta rih harus tomborihta nopara tahkan Yerusalem.

⁴⁸ Ihkamrih saksi-saksi tahkan paringoh rih.

⁴⁹ Tutang Ahku bongok ahkan ngirim ahkan'kam inon ijo jari tonobowot bain Amai. Tahpi ihkam harus tahtap ngindoi ang lowu tuh, nyiring kowasa tahkan Pohotala monyokuwung ihkam.’’

Yesus hogahtang nokuh soruga

⁵⁰ Uliorih Yesus ngomin iro nokuh luar lowu johcok Betania. Ang anan Yesus ngahtang longoi-Oh, turus momborehkat iro.

⁵¹ Pondehan Io nguan orih rih, Io hogahtang nokuh soruga, turus hopisah tahkan iro.

⁵² Iro suhkuntu'ut nyembah Io, pongohuli rih buli nokuh Yerusalem hawui ahtoi ijo jorih-jirah samasino,

⁵³ tutang hototurus monara Pohotala, ang luwang Lohpou Tuhan.