LUKAS 20 - BOWOT BOHUA

Kisok tohou hak Yesus

¹ Aang sino ondou, Yesus rahat mongajar tutang mborihtaoh Kabar Hinut tahkan Pohotala ahkan ulun-ulun ang luwang Lohpou Tuhan. Imam-imam kopala, guru-guru agama, hawui okon-okon Yahudi lombut

² tutang nuhtui umba Yesus, ‘‘Cuba monyorihta ahkan ihkai ngosan galang inon Ihko nguan paringoh tuh? Iai ijo nonga hak rih ahkan'mu?’’

³ Yesus mutah, ‘‘Ahku jolik ngisok. Cuba nonga ahkak-Ku,

⁴ Yohanes mopondus hapan hak iai? Pohotala ata'ai kolunon?’’

⁵ Mahka nopararih iro hopahkat, ‘‘Amat ihto nuhtui, ‘Umba hak Pohotala,’ Io ahkan nuhtui, ‘Amat kolourih ombai ihkam eam porocaya umba Io?’

⁶ Tahpi amat ihto nuhtui, ‘Umba hak ulun,’ paring ulun ahkan mukah ihto hapan bahtu, tului iro porocaya ijo Yohanes ihcobehti nabi.’’

⁷ Jadi iro mutah, ‘‘Ihkai eam kota'an.’’

⁸ Mahka Yesus nuhtui umba'ndo, ‘‘Amat kolourih Ahku ka'a eam ahkan nuhtui ahkan'kam hapan hak iai Ahku nguan paringoh tuh.’’

Porobasa ponyewa-ponyewa kobun anggur

⁹ Yesus mander ahkan ulun-ulun rih, porobasa pongo tuh, ‘‘Anai ihcobehti ijo ngomulan ihcokolambar kobun anggur. Io monyewaoh kobun rih, ahkan pira-pira ponggawi-ponggawi, turus botulak nokuh lowu bohkon, tutang mohcon tahi ang anan.

¹⁰ Kotihka jari ohkotoh nguhtoi bua anggur, tepun kombulan rih ngirim pohaluoh nokuh ponggawi-ponggawi orih ahkan norima hasir ahkaioh. Tahpi ponggawi-ponggawi rih nahup pohalu orih tutang nyuhu io buli hawui longoi buang.

¹¹ Mahka tepun kobun rih, ngirim hino pohalu ijo bohkon; tahpi pohalu orih ka tonahup ka'a tutang tomohina bain ulun ijo ponggawi-ponggawi orih, turus nyuhu buli hawui longoi buang.

¹² Pongohino tepun kobun rih ngirim pohalu ijo kotolu. Tahpi pohalu orih ka tonahup ka'a bain ponggawi-ponggawi pomulan rih, tutang ngindiou soluka kobun rih.

¹³ Kojoriaioh tepun kobun rih nuhtui, ‘Ahku harus nguan inon hino? Ahku ahkan ngirim anak'ku bongok, ijo ahku ngasioh. Musti io ahkan iro mohoromatoh!’

¹⁴ Tahpi kotihka ponggawi-ponggawi pomulan rih, nohto anak tepun kobun rih, iro hotohou sama aropoh, ‘Atuh io ijo mowarisoh. Olai ihto munu io, ahkan ihto ngomin warisoh.’

¹⁵ Mahka iro nawan tutang ngomin io nokuh luar kobun orih turus munu io.’’ Turus Yesus ngisok, ‘‘Nah, amat tepun kobun orih buli, io ahkan nguan inon nohimo ponggawi-ponggawi pombulan rih?

¹⁶ Musti io ahkan lombut tutang munu ponggawi-ponggawi pomulan rih, turus nyarah pomulan rih ahkan ponyewa-ponyewa pumbulan ijo bohkon.’’ Ngonih orih, nuhtuirih ulun-ulun ahkan Yesus, ‘‘Samasino eam!’’

¹⁷ Yesus nopahjah iro turus nuhtui, ‘‘Amat kolourih, inon rimai ayat Surat Borasih tuh? ‘Bahtu ijo eam gunai bain tuhkang mangun, jari monjadi bahtu ijo pahtukoh.’

¹⁸ Paring ulun ijo ngonyahtu notarang bahtu orih ahkan lonyuh; tutang iai ijo tonopahas bahtu rih ahkan tokole'et monjadi korawu.’’

Tohou mombayar pajak

¹⁹ Guru-guru agama tutang imam-imam kopala ta'an ijo porobasa orih tonitu Yesus ahkan iro. Tului orih iro jolik nawan Io uhun orih ka'a, tahpi iro mihkoh umba ulun aro.

²⁰ Jadi, iro ngurah kosapet ijo pios. Iro nyuruk ulun mangat nguan kolou ulun ijo ihlas, tutang nyuhu ulun-ulun rih nyokohtung Yesus umba kisok-kisok, mangat iro duon monyarah Yesus nokuh wewenang tutang kowasa gubernur.

²¹ Mahka ulun-ulun ijo jari kuman suruk rih nuhtui umba Yesus, ‘‘Amai Guru, ihkai kota'an, paring ijo Amai ngohawot tutang majaroh rih morong. Ihkai kota'an ka'a Amai majar hapan torus-tarang tohou kohondak Pohotala ahkan ulunkolunon, tului Amai eam nopahjah kolunoi.

²² Tului orih cuba Amai nuhtui ahkan ihkai, numbun hadat agama ihto, toukah mombayar pajak ahkan Kaisar ata'ai eam?’’

²³ Tahpi Yesus ta'an orih tihkos iro. Tului orih Io nuhtui,

²⁴ ‘‘Cuba pokarah ahkak-Ku ihcokobitap duit perak. Gambar tutang aran iai tuh?’’ ‘‘Kaisar!’’ hion'ndo.

²⁵ ‘‘Amat kolourih,’’ hion Yesus umba iro, ‘‘nonga ahkan Kaisar inon ijo ain Kaisar, tutang ahkan Pohotala inon ijo ain Pohotala.’’

²⁶ Gihtan aang tohimo ulun aro rih, iro eam duon nyombang ihco kosalan ka aang Yesus. Iro tihkas tonih beweu tutang kagum tului putah Yesus orih.

Tohou komonyun tahkan kopahtoi

²⁷ Pira-pira ulun tahkan barih Saduki lombut nokuh Yesus. (Iro anai barih ijo niruk ijo ulun mahtoi eam ahkan bolum huli.) Iro ngisok umba Yesus.

²⁸ ‘‘Amai Guru, Museh nyurat hukum tuh ahkan ihto: Amat ihcobehti bahkas mahtoi, tutang io eam anai anak, mahka konduangoh harus kawin umba baluioh rih mangat nonga koturunan ahkan ulun ijo jari mahtoi rih.

²⁹ Pu'u anai pihtu ulun hokonduang. Ijo pongoko kawin, turus mahtoi eam anai anak.

³⁰ Pongohuli 'jo koduo kawin umba balu rih, tahpi io ka'a eam anai duon anak.

³¹ Hal ijo sama nyolung ka'a umba konduang ijo kotolu tutang hototurusoh johcok ijo kopihtu.

³² Kojoriaioh ulunbawi rih mahtoi ka'a.

³³ Aang ondou ulun mahtoi tonombolum huli, oruh iai bawi rih? Tului kopihtu-pihtuoh uras kawin umba io.’’

³⁴ Yesus mutah, ‘‘Ulun-ulun ijo bolum uhuntuh tuh kawin,

³⁵ tahpi ulun-ulun ijo pahtut ahkan tongombolum uli mahtoi, tutang bolum ang jaman ijo ahkan lombut, iro eam kawin.

³⁶ Iro sama kolou molehkat, tutang eam tou mahtoi. Iro orih paringoh anak-anak Pohotala, tului iro jari tongombolum huli tahkan kopahtoi.

³⁷ Museh bongoi jari nyorihta honong botarang ijo ulun mahtoi ahkan tonombolum huli. A'ang suratoh tohou ruwut ijo ngonjelak rih io ngohowut Tuhan monjadi, ‘Pohotalan Abraham, Pohotalan Isaak, tutang Pohotalan Yakub’.

³⁸ Nah, Pohotala rih, eam Pohotalan ulun ijo mahtoi! Io Pohotalan ulun-ulun ijo bolum! Bain bagi Pohotala paring ulun bolum.’’

³⁹ Pira-pira guru agama homauh, ‘‘Putah Amai Guru morong sama sino.’’

⁴⁰ Tului orih iro eam bahanyi hino ngisok aangihco umba Yesus.

Tohou Lahca Ponyolamat

⁴¹ Yesus ngisok umba iro, ‘‘Koloukuwoh dahpot tonuhtui ijo Lahca Ponyolamat lihit Dawid?

⁴² Padahar Dawid bongoi nuhtui a'ang buhku Masmur, ‘Tuhan nuhtui umba Tuhan'ku: Tuotrih aang sila kotouk-Ku,

⁴³ nyiring Ahku nguan musuh-musuh-Mu monyarah umba Ihko.’

⁴⁴ Jadi amat Dawid ngohawot Lahca Ponyolamat rih ‘Tuhan’ koloukuwoh tou Io lihit Dawid?’’

Pongingat mangat bojaga-jaga toharep guru-guru agama

⁴⁵ Beteng ulun-ulun ngonih Yesus bopander, Io nuhtui umba murid-murid-Oh,

⁴⁶ ‘‘Buah bojagarih toharep guru-guru agama. Iro jolik nyala-nyalan hapan jubah ijo ombu, tutang jolik ngurah horomat ang pasar-pasar. Iro jolik unuk-unuk ijo tomohoromat ang luwang lohpou sombayang tutang ang pesta-pesta.

⁴⁷ Iro nihpu balu-balu tutang ngomin lohpou'ndo. Tutang nuhtup kosalan iro rih, iro bodo'a paham ombu! Hukum ijo bahat notai iro!’’