LUKAS 18 - BOWOT BOHUA

Porobasa balu tutang hakim

¹ Uliorih Yesus monyorihta ihco porobasa ahkan majar murid-murid-Oh mangat'ndo hototurus bodo'a tutang a'ai putus asa.

² Yesus nuhtui, ‘‘Ang ihco lowu, anai ihcobehti hakim ijo eam mihkoh umba Pohotala, tutang eam poraba umba ia-iai beweu.

³ Ang lowu rih anai hino ihcobehti balu, ijo pira-pira tikat noharep hakim orih, nyawot porokaraoh tongomorong, ‘Dohop ahku noharep musuh aik'ku,’ hion balu rih.

⁴ Pira-pira kotihka kotahiu hakim rih eam kani dohop balu rih. Tahpi ang kolaiouoh hakim rih niruk, ‘Olu ahku eam mihkoh umba Pohotala tutang eam poraba umba ia-iai ka'a,

⁵ tahpi tului balu tuh hototurus ih ngorasi ahku beweu, labih pios ahku ngomorong porokaraoh. Amat eam, io ahkan hototurus lombut tutang ngorasi ahku.’ ’’

⁶ Turus Tuhan nuhtui, ‘‘Nohtoaniohrih, inon ijo tonuhtuioh bain hakim ijo eam adil rih!

⁷ Orih, inon Pohotala eam ahkan ngomorong porokara ukup-Oh bongoi ijo nyawot dohop umba Io hondou tutang ngolomi? Inon Io ahkan nguluh kotihka ahkan ndohop iro?

⁸ Porocayarih: Io ahkan jeleng ndohop porokaran iro! Tahpi amat Anak Ulun lombut, inon magun anai tonyombang ulun ijo porocaya umba-Oh Io ang tana tuh?’’

Porobasa ulun Parisi tutang ponagih pajak

⁹ Yesus monyorihta ka'a porobasa tuh, ijo tonuju-Oh ahkan ulun ijo nopahjah hina ulun bohkon, tahpi yahkin ijo aropoh bongoi pios.

¹⁰ Hion Yesus, ‘‘Anai duo behti ijo tulak nokuh Lohpou Tuhan ahkan bodo'a. Ijo ihco ulun Parisi, ijo bohkonoh ihcobehti ponagih pajak.

¹¹ Ulun Parisi rih tombok bongoi hawui bodo'a, ‘Pohotala, ahku ngohawot torimakasih ahkan-Mu, tului ahku eam kolou ulun bohkon, ijo bokuhu, curang, ata'ai hobandung. Ahku botorimakasih, tului ahku eam kolou ponagih pajak orih rih.

¹² Ahku puasa honduo tikat a'ang ihcominggu, tutang ahku nonga ahkan-Mu sepersopulu tahkan paring ijo pongonduok'ku.’

¹³ Tahpi ponagih pajak rih tombok a'ang unuk mahcu-mahcu tutang molahan eam bohanyi nokara nokuh langit. Hawui nehkap husukoh io nuhtui, ‘Pohotala, ngasirih ahku, ulun bodusa tuh!’ ’’

¹⁴ ‘‘Porocayarih,’’ hion Yesus, ‘‘aang ohkot buli nokuh lohpou ponagih pajak orih ijo tonorima Pohotala, tutang bohkon ulun Parisi rih. Tului nyinong ulun ijo ngondiang aropoh ahkan tongopinda; tutang nyinong ulun ijo ngopinda aropoh ahkan tonongahtang.’’

Yesus mborehkat anak-inyam

¹⁵ Anai ulun-ulun ngomin anak-inyam koik nokuh Yesus mangat Io nambit tutang mborehkat iro. Kotihka murid-murid Yesus nohto orih, iro ngohana ulun-ulun rih.

¹⁶ Tahpi Yesus na'ah anak-inyam rih, turus nuhtui umba murid-murid-Oh, ‘‘Nauhoh dolang anak-inyam lombut nokuh Ahku! Ara baca iro, tului ulun somahcam ituh ijo monjadi anak ukup Pohotala.

¹⁷ Ingatrih! Ulun ijo eam noharep Pohotala kolou ihcobehti anak-inyam, io eam ahkan monjadi anak ukup Pohotala.’’

Tohou ulun tahtou

¹⁸ Ihcobehti okon ulun Yahudi ngisok umba Yesus, ‘‘Amai Guru ijo pios, ahku harus nguan inon mangat duon norima pombolum sojahti tutang kototahiu?’’

¹⁹ ‘‘Ombai ihko ngohawot Ahku pios?’’ kisok Yesus umbaoh. ‘‘Eam anai ijo pios, amatbohkon Pohotala bongoi.

²⁰ Ihko jari ta'an karon-poretah Pohotala: ‘Ara hobandung, ara munu, ara nahkou, ara mander alik, tutang horomat umba amai tutang inai'kam.’ ’’

²¹ ‘‘Paring poretah orih jari ahku molalus tahkan biou,’’ hion ulun tahtou rih.

²² Ngonih orih, Yesus nuhtui, ‘‘Magun anai ihco hal, ijo harus ihko nguaioh: Modagangrih paring ramun'kam, nongarih duitoh ahkan ulun porosbolum, tutang ihko ahkan duon ponahtou ang soruga. Uliorih lombut ngahasu Ahku.’’

²³ Tahpi kotihka ulun orih ngonih auh rih, io porosahtoi tului io tahtou samasino.

²⁴ Yesus kota'an ulun rih porosahtoioh, tului orih io nuhtui, ‘‘Bohali samasino ahkan ulun tahtou monjadi anak ukup ain Pohotala!

²⁵ Labih murah ihcokungan unta nyolong luang doih, tahkan ihcobehti uluntahtou nyolong Kolunon Bohua Ain Pohotala.’’

²⁶ Ulun-ulun ngonih Yesus nuhtui kolourih iro ngisok, ‘‘Amat kolouorih iai ijo tou solamat?’’

²⁷ Yesus mutah, ‘‘Ijo eam aroharapan aang ulun, uras harapan aang Pohotala!’’

²⁸ Turus Petrus nuhtui, ‘‘Topahjahrih! Ihkai jari nohtah lohpou kosalah mangat ngahasu Amai.’’

²⁹ ‘‘Porocayarih!’’ hion Yesus, ‘‘Ulun ijo jari nohtahoh lohpouoh tutang oruhoh ata'ai aring-konduangoh, ata'ai amai-inaioh, ata'ai anak-anakoh tului io mohalu Pohotala,

³⁰ ulun orih ahkan ponalos bolihpet-lihpet aang kotihka tuh, tutang aang jaman ijo ahkan lombut, io ahkan tononga pombolum ijo sojahti tutang ijo kototahiu.’’

Yesus pander ang kotolu tikatoh tohou popahtoi-Oh

³¹ Yesus muhpung koduo balas murid-Oh bongon'ndo, turus nuhtui, ‘‘Ngonihoh tuh! Ihto huntuh nitu Yerusalem. Ang anan, paring ijo sonurat nabi-nabi tohou Anak Ulun ahkan nyolung.

³² Io ahkan tonyarah ahkan ulun-ulun bohkon Yahudi, ijo ahkan tongonjea, mohina tutang ngoluhca Io.

³³ Iro ahkan nyiksa tutang munu Io, tahpi ang ondou tolu Io ahkan monyun.’’

³⁴ Paring orih eam duon tonopaham isut ka bain murid-murid Yesus orih. Rimai tahkan tuhtui-tuhtui Yesus rih tonokulim tahkan iro. Iro eam kota'an Io pander tohou inon.

Yesus ngopios ihcobehti ponyodahkah bobulen

³⁵ Kotihka Yesus kani johcok ang lowu Yerikho, ihcobehti bobulen rahat tuot nyodahkah ang saran jalan.

³⁶ Kotihka io ngonih ulun aro rih nguha. Io ngisok, ‘‘Anai inon?’’

³⁷ ‘‘Yesus ulun Nasaret rih, nguha,’’ hion iro umba io.

³⁸ Mahka ulun bobulen rih ngoriak, ‘‘Yesus, anak Dawid! Masilah ahku!’’

³⁹ Ulun-ulun ijo ang baun nyangit io, tutang nyuhu io tonih. Tahpi io ngoriak paham muhing hino, ‘‘Anak Dawid! Masilah ahku!’’

⁴⁰ Yesus tondo tutang nyuhu ulun ngomin ulun bobulen rih nokuh Io. Ohkot io johcok, Yesus ngisok io,

⁴¹ ‘‘Inon ijo ihko jolik Ahku nguai ahkan'kam?’’ ‘‘Tuan,’’ hion ulun bobulen rih, ‘‘ahku jolik nohto.’’

⁴² ‘‘Amat kolourih, nohtorih! Tului ihko porocaya umba Ahku, ihko pios.’’

⁴³ Kotihka orih ka'a io duon nohto, turus io nutut Yesus hawui ngohawot torimakasih ahkan Pohotala. Kotihka ulun aro nohto hal nyolung rih paringoh monara Pohotala.