LUKAS 16 - BOWOT BOHUA

Pogawai nambit katuh-duit ijo pitar

¹ Yesus nuhtui umba murid-murid-Oh, ‘‘Anai ihcobehti ulun tahtou. Io anai tepun ihcobehti pogawai ngatuhduitoh ijo ngurus ponahtou ponuhanoh. Ulun tahtou rih norima laporan ijo pogawai ngatuhduit rih aro bokora umba duitoh.

² Jadi io na'ah pogawai ngatuhduit orih tutang nuhtui, ‘Inon tuh ijo konahak'ku tohou ihko? Uhuntuh, nyorah ahkak'ku laporan suhkup tohou aangkonuam ngatuh ponahtou'ku. Ihko eam tou huli monjadi pogawai ngatuhduit'ku.’

³ Mahka pogawai ngatuhduit rih niruk, ‘Ahku harus nguan inon huntuh? Tuan'ku kani potondo ahku. Nyangkul, ahku eam ba'as; nyodahkah, ahku mia.

⁴ Ahku anai ahkar; amat ahku jari tonondo, ahku harus anai aro jolahan ijo kani norima ahku ang lohpou iro!’

⁵ Jadi, pogawai ngatuhduit rih na'ah nyinong ulun ijo anai utangoh umba tuanoh orih. Ahkan ijo pahtukoh, io nuhtui, ‘Pira utang'mu umba tuan'ku?’

⁶ Ulun rih mutah, ‘Soratus kasa undus sawit.’ Pogawai rih nuhtui umba io, ‘Tuh nyurat utang'mu. Tuot tutang jeleng nyurat: limo pulu.’

⁷ Pongohino rih io nuhtui umba ulun 'jo koduo, ‘Tutang konduang, pira utang konduang?’ Ulun rih mutah, ‘Sokujan kapil gandum.’ Pogawai ngatuhduit rih nuhtui umba io, ‘Tuh, nyurat utang'mu. Nyuratrih: jalu rahtus.’

⁸ Mahka tuan tahkan pogawai ngatuhduit ijo eam morong rih, monara pogawai orih tului dolang gawin ijo cerdik orih; tului ulun-ulun ang kolunon tuh labih pitar ngatuh urusan aiuoh, tahkan ulun-ulun ijo bolum ang koloang.’’

⁹ Turus Yesus nuhtui hino, hioi-Oh, ‘‘Ngonihrih! Haparih ponahtou kolunon tuh unuk ngurah jolahan, mangat amat ponahtou kolunon tuh jari eam aro regai hino, ihkam ahkan tonorima ang unuk mohcon ijo kototahiuoh.

¹⁰ Ulun ijo duon tomorocaya a'ang hal-hal ijo koik, duon ka'a io tomorocaya a'ang hal-hal hajo. Tahpi ulun ijo eam duon tomorocaya a'ang hal-hal ijo koik, eam duon ka'a tomorocaya a'ang hal-hal hajo.

¹¹ Jadi, amat tohou ponahtou kolunon tuh, ihkam jari eam duon tomorocaya, iai kani momporocaya ahkan'mu ponahtou rohani?

¹² Tutang amat tohou ramu, ijo ain ulun bohkon, ihkam botarang eam duon tomorocaya, iai kani nonga ahkan'mu inon ijo monjadi ain'mu?

¹³ Eam ihcobehti ka duon bogawi ahkan duo Tuan; tului io ahkan labih masi ihco tahkan ijo bohkon, ata'ai io ahkan labih sotia umba Tuan ijo ihco, tahkan ijo bohkon. Kolourih ka'a umba ihkam, ihkam eam duon bogawi ahkan Pohotala, tutang ahkan ponahtou ponuhan ka'a.’’

Auh-auh Yesus

¹⁴ Ulun-ulun Parisi ngonih paring ijo tonuhtui bain Yesus. Turus iro ngota'o Io, tului iro jolik umba duit.

¹⁵ Tahpi Yesus nuhtui umba iro, ‘‘Ihkam tuh ulun ijo ang toharep ulun bohkon, topahjahoh morong, tahpi Pohotala kota'an usin ahtoi'mu. Tului inon ijo tongohu isung bain ulun, topahjahoh pinda bain Pohotala.

¹⁶ Hukum ijo tononga bain Museh tutang ajaran nabi-nabi tahtap nyolung johcok aang uhun Yohanes Popondus. Tahkan ohkot orih Kabar Hinut tohou koloukuwoh Pohotala moretah kolou Lahca borihtaoh toturusoh. Tutang ulun maksa aropoh ahkan monjadi anak ukup ain Pohotala.

¹⁷ Tahpi labih jeleng langit tutang tana nihau, tahkan ihco hurup aang torat Pohotala monjadi eam nyolung.

¹⁸ Iai ijo nulang oruhoh, turus kawin umba bawi bohkon, ulun rih hobandung. Tutang ulun ijo kawin umba ulunbawi ijo jari tunulang bosaioh, io hobandung ka'a.’’

Ulun tahtou tutang Lasarus

¹⁹ ‘‘Anai ihcobehti uluntahtou. Pokajaioh hajolegai, tutang pombolumoh holowi nyinong ondou.

²⁰ Ang baun bauntukang lohpouoh tuot ihcobehti ulunporosbolum arai Lasarus. Behtiuoh tuwi umba kerai-bagai.

²¹ Io jolik nyuang buhtuioh umba papat uhkun ijo nyahtu tahkan meja ulun tahtou rih. Asuka ijo lombut ngonjelap kerai bagaioh rih.

²² Ulun porosbolum rih pongo mahtoi turus tongomin molehkat nokuh unuk tohoromat ang bambai Abraham ang soruga. Ulun tahtou rih mahtoi ka'a tutang tonanom.

²³ Ang lowu liou io mondorihta samasino. Tutang aang ohkot io nopahjah tahkan anan nokuh diang, io nohto Abraham ang unukoh ijo mahcu tutang Lasarus anai ang mambai Abraham,

²⁴ ‘Amai Abraham!’ hion ulun tahtou rih, ‘Ngasirih ahku. Nyuhu Lasarus nguhcom ikingoh ang danum, turus nokuh ngomisa jela'ku. Ahku ngarotkoporos samasino ang luwang baho tuh!’

²⁵ Tahpi Abraham mutah, ‘Mingatrih anak'ku: kotahin umur pombolum'mu, ihko jari ngondahpot paring ijo pio-pios, rahatoh Lasarus ngondahpot ijo ja'at-ja'at. Uhuntuh io sanang ang ohtoi, tutang ihko ngarotkoporos.

²⁶ Bohkontahkan orih, ang holang ihko umba ihkai, jari tonapa ihco luwang ijo hajo, mangat ulun tahkan ohtoi eam duon nokuh anan, tutang ulun tahkan anan eam duon nokuh ohtoi!’

²⁷ ‘Amat kolourih, Amai,’ hion ulun tahtou rih, ‘ahku nyawot honong paham Amai nyuhu Lasarus nokuh lohpou amai'ku.

²⁸ Anai limo konduang'ku ang anan. Nyuhu Lasarus mopingatoh iro, mangat ara nyiring iro ka ngonyahtu nokuh unuk nyiksa tuh.’

²⁹ Abraham mutah, ‘Iro anai ngina torat Museh tutang buhku nabi-nabi! Nauh iro numbun inon ijo sonurat a'ang buhku-buhku orih!’

³⁰ Tahpi ulun tahtou rih mutah, ‘Orih eam sukup Amai Abraham. Tahpi amat anai ulun mahtoi bolum huli tutang lombut ahkan iro, iro ahkan hubah tahkan dusa-dusan'ndo.’

³¹ Tahpi Abraham nuhtui, ‘Amat iro eam mohonau poretah Museh tutang nabi-nabi, musti iro eam ahkan porocaya ka'a, oluka anai ulun mahtoi ijo bolum huli.’ ’’