LUKAS 15 - BOWOT BOHUA

Tobiri ihco lahcat

¹ Aang sino ondou, aro ponagih pajak tutang ulun-ulun ijo konohawot eam pios bain ulun aro, lombut ngonih Yesus.

² Ulun-ulun Parisi tutang guru-guru agama nopara bokuhtuk. Iro nuhtui, ‘‘Cis, Ulun tuh norima ulun-ulun bodusa ijo eam pios tutang malah kuman homboh iro!’’

³ Tului orih Yesus monyorihta ahkan iro porobasa tuh.

⁴ ‘‘Jahka ihcobehti tahkan ihkam anai mohaga soratus kungan tobiri, turus io konihou ihcokungan – inon ijo ahkan kononguaioh? Musti io ahkan nohtah tobiri ijo sioi pulu sioi kungan rih ang padang uru, tutang tulak ngurah ijo nihou rih nyiring dahpot.

⁵ Tutang amat io nyombangoh huli tobiri rih, io kolourih jorih, nyiring tongohtunoh tobiri rih ang bahaioh,

⁶ turus ngomiu buli. Pongohuli io na'ah dolang injah tutang jolahaioh kodiling tutang nuhtui, ‘Kanohtoi ihto jori-jorih. Tobiri aik ijo nihou jari sombang huli!’

⁷ Nah, kolourih ka'a ang soruga anai kojorih ijo paling hajo ahkan ihcobehti ulun bodusa ijo hubah, labih tahkan sioi pulu sioi ulun ijo pios tutang eam gunai hubah.’’

Duit ijo nihou

⁸ ‘‘Ata'ai jahka ihcobehti ulunbawi anai anaingina sopulu duit perak, turus nihou ihco kobitap – inon ijo ahkan konuaioh? Io ahkan nutang sumbu tutang mahpas lohpouoh hawui ngurah ang umo-umoh nyiring io nyombangoh duit orih.

⁹ Aang ohkot io nyombangoh duit rih, io na'ah dolang injah-jolahai tutang karon-aring konduang turus nuhtui, ‘Ahku jorih samasino jari nyombang huli duit'ku ijo nihou. Has ihto jori-jorih!’

¹⁰ Kolourih ka'a molehkat-molehkat Pohotala paham kojorihoh amat anai ihcoulun ja'at hubah tahkan dusa-dusan iro. Porocaya bewe!’’

Anak ijo nihou

¹¹ Yesus nuhtui hino, ‘‘Anai ihcobehti amai ijo anaitepun duo behti anak bahkas.

¹² Ijo busu nuhtui umba amaioh, ‘Amai, nonga ahkak'ku huntuh bagik'ku tahkan kotahtou ihto.’ Mahka amaioh magi ponahtouoh rih ahkan koduo anakoh rih.

¹³ Pira-pira ondou pongohino anak busu rih morahkang bagin warisoh rih, turus tulak nokuh lowu ijo mahcu. Ang anan io bokora umba duitoh hawui bolum numbun kojolik ahtoi.

¹⁴ Kotihka duitoh jari ohpah paring, nyolung ang tana orih sino lo'u ijo hajo, nyiring io nopara molarat.

¹⁵ Turus io tulak ngomin upah aang ihcobehti ponduduk ang anan, ijo nyuhu io nokuh umo ngindoi urakoh.

¹⁶ Kolourih io bolo'u nyiring jorik nyuang buhtuioh umba ukun babi-urak rih. Oluka io kolourih kobolo'uoh, eamanai ihcobehti ka'a nunga ukun ahkaioh.

¹⁷ Kojoriaioh io borondong tutang nuhtui, ‘Ulun-ulun ijo bogawi aang unuk amai'ku holowi-lowi uhkuioh, tutang ahku ang ohtoi nyiring mahtoi bolo'u!

¹⁸ Ahku ahkan hihkas tutang nokuh ahkan amai'ku, tutang nuhtui umba io: Amai, ahku jari bodusa tohimo Pohotala tutang tohimo Amai.

¹⁹ Eam pahtut hino ahku konohawot anak Amai, ngohu iou ahku barih kolou ulun ijo pongawi Amai.’

²⁰ Mahka hihkas io buli nokuh amaioh. Magun mahcu tahkan lohpou, io soun tonohto bain amaioh. Honong paham kotoharuoh, amaioh nokoru naharang io ngohawon tutang ngarok io.

²¹ ‘Amai,’ hion anak rih, ‘ahku jari bodusa tohimo Pohotala tutang tohimo Amai. Eam pahtut hino ahku konohawot anak Amai.’

²² Tahpi amaioh na'ah pohalu-pohaluoh tutang nuhtui, ‘Jeleng! Ngomin hatiu ijo paling pios, tutang nokehpanohrih ang io. Posolong tisim ang ikingoh, tutang sopahtu ang tapaoh.

²³ Uliorih ngomin anak sahpi ijo monyak tutang nyombalih orih rih. Ihto ahkan kuman tutang jori-jorih.

²⁴ Tului anak'ku tuh jari mahtoi, huntuh bolum huli; io ijo nihou, huntuh tosombang huli.’ Turus nopara iro bopesta.

²⁵ Pondehan rih anak ijo oko anai ang umo. Kotihka io buli tutang johcok ang doni lohpou, io ngonih auh musik tutang tari-tarian.

²⁶ Io na'ah ihcobehti tahkan pohalu-pohalu rih, turus ngisok io, ‘Anai inon tuh ang lohpou?’

²⁷ Pohalu rih mutah, ‘Ari Tuan buli! Tutang amai Tuan jari nyuhu nyombolih anak sahpi ijo monyak, tului io jari nyombang huli anakoh a'ang koada'ai solamat!’

²⁸ Anak ijo oko rih bosingi samasino, nyiring io eam kani nyolong ahkan lohpou. Turus amaioh soluka tutang ngoto'u io nyolong.

²⁹ Tahpi io nuhtui, ‘Botoun-toun kotahiuoh ahku nguan aang mahto-mahtoi ahkan Amai. Eam pu'u ahku molawan poretah-poretah Amai. Tutang inon ijo Amai nonga ahkak'ku? Ihcokungan kambing ka jaha pu'u Amai nonga ahkak'ku bopesta umba sobat-sobat'ku!

³⁰ Anak Amai rih jari ngopah ponahtou Amai, umba bawi sundal, tahpi kolourih io buli, Amai nyombolih anak sahpi ijo monyak ahkaioh!’

³¹ ‘Anak'ku,’ hion amaioh, ‘ihko turus anai ang ohtoi hihco ahku. Paring ijo ahku tepui anairih ihko tepui ka'a.

³² Tahpi ihto harusbopesta tutang jori-jorih, tului ari'mu orih rih jari mahtoi bolum huli; io jari nihou, tahpi huntuh jari sombang huli.’ ’’