KOLOSE 4 - BOWOT BOHUA

¹ Konduang-konduang ijo monjadi tuan! Hondakrih ihkam moretahgawi jihpon-jihpon'kam umba komorong tutang adil. Ingat, ijo ihkam ka tehpun ihcobehti tuan'kam ijo ang soruga.

Potunjuk-potunjuk

² Hondakoh ihkam bodo'a, hawui tehen tutang jaga-jaga hawui botorimakasih ahkan Pohotala.

³ Bodo'a ka'a ahkan ihkai mangat Pohotala nonga ahkan ihkai kotihka ijo pios ahkan monyiaroh, borihta tohou rahasia Kristus. Kotului hal orihrih mahka ahku huntuh anai ang luwang sipir.

⁴ Bodo'a iou mangat ahku duon monarangoh rahasia orihrih sotarang-tarangoh kolouamoh mustioh.

⁵ Ang luwang kohihco ihkam umba ulun-ulun ijo eam porocaya, hondakrih ihkam bolum pihtar tutang nguna nyinong kosapetan umba sopios-piosoh.

⁶ Hondakrih hal-hal ijo ihkam ngohawotoh toturus monyanang tutang monarik. Hondakrih ihkam kota'an kolouamoh soharusoh ihkam mutah karon-kisok ulun.

Lain surat tutang tahbe

⁷ Tikhikus, konduang ihto ijo tonokasih, ahkan momborihta ahkan ihkam karo angco tohou ahku. Io te'et bogawi hombo-homboh ihkai ahkan Tuhan.

⁸ Ahku nyuhu io nohkuh'kam honong alasan mangat ihkam kota'an koada'an ihkai ohtoi tutang ihkam sanang ahtoi.

⁹ Onesimus ahkan tulak hombo-homboh umba Tikhikus: io ihcobehti tahkan barih ihkam. Io ulun ijo te'et tutang ihkai sita io. Io tutang Tikhikus ahkan mborihta ahkan'kam kakaro-karooh ijo nyolung ang unuk ahku tuh.

¹⁰ Aristarkhus, ijo anai luwang sipir hombo-homboh ahku ngirim tahbe ahkan ihkam. Kodorih ka'a Markus konduang ihcotahtu Barnabas. (Ihkam jari konokirim kabar ahkan naharang io, amat io lombut ahkan'kam.)

¹¹ Tahbe hino tahkan Yesus ijo konohawot Yustus ka'a. Tahkan ulun-ulun Yahudi ijo jari porocaya ahkan Tuhan Yesus, tihkas iro botolu iourih ijo huntuh bogawi homboh umba ahku ahkan nguan gawiu tahkan Pohotala. Iro tu'u-tu'u, paham dohop ahku.

¹² Tahbe tahkan Epafras. Io ka'a tahkan barih'kam. Io jihpon Kristus Yesus ijo toturus bodo'a hawui tehen ahkan ihkam. Io nyawot honong paham ahkan Pohotala, mangat koyahkin'kam monjadi ba'as tutang ihkam moro-morong kolou ulun oko, mangat ihkam hawui soporuna bokehtep umba konohuang Pohotala.

¹³ Ahku nyaksioh bongok ijo io ius bogawi paham ahkan ihkam tutang ahkan ulun-ulun ijo ang Laodekia tutang Hierapolis.

¹⁴ Dokter Lukas ijo ihto sitaoh, tutang Demos ngirim tahbe ahkan ihkam.

¹⁵ Nyapaiohrih tahben ihkai ahkan konduang-konduang Kristen ang Laodekia; ka'a ahkan Nimfa, tutang ahkan ukup ijo sombayang ang lohpouoh.

¹⁶ Ulimba surat tuh tonombasa ahkan'kam bousaha iou mangat orih tonombasa ka'a ahkan ukup ijo ang Laodekia. Kodorih ka'a ihkam bongom, pahtut mbasa surat ijo ahkan konokirim tahkan Laodekia ahkan ihkam.

¹⁷ Tutang nyorihta iou ahkan Arkhipus: ‘‘Ngopah karon gawiu ijo tononga ahkan'kam guna mohalu Tuhan.’’

¹⁸ Tahbe tahkan ahku Paulus. Ahku bongok ijo nyurat bagi tuh. A'ai nolingou ijo ahku magun ang luwang sipir! Keleh Tuhan mborehkat ihkam paringoh. Horomat ihkai, Paulus