KOLOSE 1 - BOWOT BOHUA

^1-2 Konduang-konduang ukup Pohotala ang Kolose ijo bokehtep hihco umba Kristus! Kolou Rasul Kristus Yesus – ngosan ponotuot Pohotala – Ahku, Paulus, hombo-homboh umba Konduang ihto Timoteus, bokoharap keleh Pohotala, Amai ihto nonga borehkat tutang kosanang ahkan ihkam.

Do'a torimakasih

^3-4 Ihkai jari ngonih ijo ihkam porocaya ahkan Yesus Kristus tutang ihkam mongasihoh paring ukup Pohotala. Orih rih kotuluioh ang ohkot ihkai bodo'a ahkan'kam, ihkai toturus ngohawot torimakasih ahkan Pohotala, Amai Tuhan ihto Yesus Kristus.

⁵ Ihkam porocaya tutang ihkam pongasih, tului ihkam harap ahkan inon ijo tonyodia ang soruga bain Pohotala ahkan'kam. Ihkam ius ngonih tohou hal orih kotihka Kabar Hinut ijo morong tonyapai ahkan'kam.

⁶ Kabar tahkan Pohotala rih tomborihta nokuh sohopus kolunon, tutang pombolum ulun turus tomborehkat bain kabar rih, sama kolou pombolum'kam tomborehkat, tahkan beteng ihkam ngonih tohou pononganasi Pohotala tutang moro-morong ngumangoh.

⁷ Hal orih tonyapai ahkan Konduang bain Epafras, jolahan ijo ihkai ngasihoh. Io anairih ponggawi Kristus ijo te'et bogawi ahkan kogunan ihto.

⁸ Tahkan iorih ihkai ngonih ijo honong kowasa, tahkan Roh Pohotala ihkam dahpot saling mongasih.

⁹ Orihrih kotuluioh ihkai turus bodo'a ahkan ihkam, tahkan ihkai ngonih tohou ihkam. Ihkai nyawot umba Pohotala mangat Roh Pohotala nonga ahkan'kam kopihtar tutang kohorahti, nyiring ihkam kota'an hawui soporuna inon konohuang Pohotala.

¹⁰ Honong kolouorih ihkam dahpot bolum numbun konohuang Pohotala, tutang turus monyanang ahtoi-Oh, nyiring a'ang kokaro ang'co ihkam dahpot mohasilrih hal-hal ijo pios. Tutang pongotaan ihkam, tohou Pohotala ka ahkan botambah ka'a.

¹¹ Keleh umba kowasa tahkan Pohotala ijo pokohajoi, ihkam tonomba'as, nyiring ihkam duon tahan ngarot kokaro ang'co honong sabar tutang sanang ahtoi,

¹² tutang hawui ngohawot torimakasih ahkan Amai. Kotului Amai orihrih ijo nguan ihkam harus norima inon ijo tonyodia Pohotala ahkan ukup-Oh ang luwang kolahca'ai-Oh ijo boloang.

¹³ Io jari momorodehka ihto tahkan kowasan kopindong, tutang ngahtun ihto nokuh luwang kolahca'an Anak-Oh ijo tonokasih-Oh.

¹⁴ Bain Anak-Oh rih ihto tomorodehka; bororima dusa-dusan ihto jari tonapun.

Kristus tutang gawiu-Oh

¹⁵ Kristus anairih gambar ijo korinah gihtan tahkan behtin Pohotala ijo eam gihtan; Kristus anairih anak ijo poohkooh, labih mombahtang tahkan kokaro ijo tona'oioh.

¹⁶ Tului nguha Iorih Pohotala monaoioh karo ang'co ang soruga tutang ang ngosan tana, karo ang'co ijo gihtan tutang ijo eam gihtan, nyakum ka'a roh-roh ijo bokowasa tutang ijo moretah. Sohopus aangpindalangit tuh tona'oi nguha Kristus tutang ahkan Kristus.

¹⁷ Sounumba kokaron ang'co anai, Kristus ius labih houn anai. Tutang tului Iorih ka'a mahka karo ang'co anai ang unukoh nyino-nyinong.

¹⁸ Iorih kuhung tahkan behtiuoh, yorih ukupoh, kotului Io tohasak pombolum ukup rih. Iorih anak ijo poohkooh ijo pahtuk-pahtuk tonombolum hoduli tahkan popahtoi, mangat Io bongoi iou ijo monjadi boguna tahkan kokaro aang'co.

¹⁹ Pohotala bongoirih ijo mongohondakoh, mangat kokaro ang'co ijo tonyombang aang arop Pohotala, tonyombang ka'a honong sukup ang arop Anak-Oh.

²⁰ Tutang nguha Anak rih hino Pohotala momutusoh ahkan nguan kokaro ang'co hokopios hoduli umba Io, pios kokaro ang'co ijo ang tana, kanika ijo ang soruga. Pohotala nguan orih nguha popahtoi Anak-Oh ang kahju sopolahki.

²¹ Lomoi ihkam mahcu tahkan Pohotala. Ihkam momusuh Io, kotului hadatdasar tutang tiruk'kam ijo ja'at.

²² Tahpi huntuh, umba popahtoi Anak-Oh, Pohotala napa sambung ihkam umba Io, monjadi pios hoduli. Umba cara orih ihkam dahpot tonomin noharep Pohotala a'ang koada'an borasih, molinyou tutang earo salai.

²³ Tahpi kopunai ihkam harus tohtap te'et porocaya tutang tombok tehen aang koporocayan'kam. Ara nyiring ihkam molohkak koharap ijo jari tononga ahkan'kam, kotihka ihkam norima Kabar Hinut tahkan Pohotala. Kabar rih jari tomborihta ahkan nyinong ulun ang hopus kolunon. Tutang ahkan orihrih ka'a ahku Paulus jari monjadi pohalu.

Pohalu Paulus toharep ukup

²⁴ Huntuh ahku sanang mongarot ahkan kogunan ihkam. Tului umba kongarot behtik'ku, ahku nyuhkup inon ijo magun harus tongarot bain Kristus ahkan ukup-Oh yorih behtiu-Oh.

²⁵ Pohotala nyuhu ahku monjadi pohalu ukup-Oh, ahkan kogunan'kam. Ahku harus monyapai borihta tahkan Pohotala, koparingoh;

²⁶ yorih borihta ijo kotahin boabad-abad ijo mohalou; tomorahasia bain Pohotala ahkan paring ulun, tahpi huntuh tongorinah ahkan ukup Aiu.

²⁷ Ahkan ukup Aiu rih, Pohotala kani ngorinahoh eaminon kopiosoh tutang kohajooh rahasia-Oh rih bagi sohopus ukup kolunon. Rahasia orihrih, iorih: Kristus anai luwang arop'kam, ijorimai ihkam ahkan hawui nginyam kohajon Pohotala.

²⁸ Kristus orihrih ijo ihkai mborihtaoh ahkan nyinong ulun. Ihkai mepingatoh tutang majar iro paringoh umba kokaro kopihtar. Titun ihkai iorih, mangat nyinong ulun dahpot tongitot ahkan Pohotala, kolou ulun ijo oko a'ang hal-hal rohani, kotului jari hihco umba Kristus.

²⁹ Ahkan monyapai hal rih, ahku bogawi paham. Ahku molawan honong paring koba'asarop ijo tononga Kristus ahkak'ku, tutang ijo bogawi luwang arop'ku hawui kotuwi kowasa.