IBRANI 9 - BOWOT BOHUA

Cara ponyembah ang kolunon tutang cara ponyembah ang soruga

¹ Bowot ijo pahtuk anaingina poroturan-poroturan sombayang, tutang anaingina ka'a unuk sombayang tapan kolunon.

² Ihcokobawak Kemah tonombok, ijo hila baun, konohawot Ruang Borasih. Ang anan anai owuh unuk polihta, tutang anai ka'a meja hawui ruhte, ijo tonyorah ahkan Pohotala.

³ Ang hila luwangoh, yorih ang lihkut dindingbenang ijo koduo, anai tahkun ijo konohawot Ruang Palingborasih.

⁴ Ang luwang tahkun orih anai mesbeh, ijo tonapa tahkan bulau unuk mahpong garu, tutang anai ka'a Pohti Bowot ijo sohopusoh tonokolap umba bulau. Ang luwang Pohti rih anai koniwa potoran bulau bosuang manna, sukah Arun ijo jari ngondolak tutang duo bindang bahtu surat, ijo ang ngosanoh tonyurat sopulu poretah tahkan Pohotala.

⁵ Ang ngosan tuhtup Pohti rih anai duo Kerub, yorih angbolum boilat ijo ngambar kolombut Pohotala. Ilat tahkan koduo aangbolum rih kolouna'ang ang ngosan tuhtup Pohti, yorih unuk pongapun dusa. Tahpi paringoh rih eam dahpot tonarangrih huntuh socara mihco-mihco.

⁶ Kolourih rih paringoh tosusun. Nyino-nyinong ondou imam-imam nyolong koluwang hila baun kemah rih ahkan molalus gawin iro.

⁷ Ijo nyolong nokuh hila paling luwang tahkan kemah rih, tihkas imam hajo iou. Io molalus rih baya sinotikat ihco toun. Orih tonguaioh, hawui ngomin daha ahkan tonyorahoh, ahkan Pohotala, tului aropoh bongoi, tutang tului dusa-dusa ijo tonguan eam sadar bain ukup-Oh.

⁸ Umba poroturan orihrih, Roh Pohotala ngorinah hawui jelas, ijo kotahin kemah hila baun rih magun tombok, jalan nyolong koluwang Ruang Palingborasih rih jaha tokuap.

⁹ Jituh gambar jaman huntuh; rimai ijo ponyorah-ponyorah tutang porahpah-porahpah ohcin ijo tonyorah ahkan Pohotala, eam duon monyoporunaoh ahtoi bua ulun ijo ngomin ponyorahai.

¹⁰ Bain upacara-upacara rih, tihkas konahomboh umba ukun, korih, tutang mahca-mahcam upacara muhi. Paringoh tihkas poroturan-poroturan ijogihtan, ijo hapan baya johcok ohkotoh Pohotala nguan pombohua.

¹¹ Tahpi Kristus jari lombut kolou Imam Hajo, tahkan hal-hal ijo hinut ijo jari anai. Kemah Tuhan, ang umoh Io nguan gawiu-Oh kolou Imam Hajo, anairih kemah ijo labih hajo, tutang labih soporuna. Orih eam tonguan bain ulun; rimaioh eam boasar tahkan kolunon ijo tona'oioh tuh.

¹² Kristus nyolong Ruang Palingborasih ang luwang kemah rih tihkas sino iou turus-jahamoh. Ang ohkot rih Io eam ngomin dahan kambing dalung ata'ai dahan anak sahpi ahkan tonosorahoh; Io ngomin daha Aiu bongoi, tutang umba orih Io momorodehka ihto ahkan turus-jahamoh.

¹³ Daha tahkan kambing tutang sahpi dalung hawui awu tahkan pononga anak sahpi, hapa ahkan nyahki ulun-ulun ijo pali, numbun poroturan agama, mangat iro monjadi borasih.

¹⁴ Orih, amat daha tutang awu rih, duon ngomuhi kopalin ulun-ulun rih, mahihino dahan Kristus! Nguha Roh ijo abadi, Kristus monyorah arop-Oh bongoi ahkan Pohotala, kolou porahpah ijo soporuna. Daha-Oh muhi ahtoi-bua ihto tahkan upacara agama ijo eam boguna, mangat ihto dahpot mohalu Pohotala ijo bolum.

¹⁵ Orihrih kotuluioh, Kristus monjadi Poholat, ahkan ihco bowot ijo bohua, mangat ulun ijo jari tona'ah bain Pohotala, dahpot norima borehkat-borehkat abadi, ijo jari tonobowot bain Pohotala. Paringoh orih dahpot nyolung, kotului jari anai ijo mahtoi, yorih Kristus; tutang popahtoi-Oh rih morodehka ulun tahkan kosalai-kosalai ijo iro nguaioh ang ohkot bowot ijo pahtuk magun hapan.

¹⁶ Amat anai surat warisan, harus ka'a anai buktioh ijo ulun ijo napa surat rih jari mahtoi.

¹⁷ Kotului surat warisan eam boguna, amat ulun ijo napaoh magun bolum. Surat rih boguna, tihkas limbah ulun rih mahtoi.

¹⁸ Tului rih bowot ijo pahtuk ka harus tonosahrih umba daha.

¹⁹ Sula-sulak Museh nonga paring poretah hukum Pohotala ahkan uhtus Israel. Pongohuli rih Museh ngomin dahan anak sahpi tutang dahan kambing dalung, turus moloukoh umba danum, pongohino nyahkioh aang Buhku Hukum-hukum tahkan Pohotala, tutang aang paring uhtus Israel, hawui hapa pahting hisop tutang bulun tobiri warna bohandang oko.

²⁰ Sambil nguanoh rih Museh nuhtui, ‘‘Tuhrih daha ijo tonosah bowot tahkan Pohotala ijo harus ihkam mone'etoh.’’

²¹ Pongohuli umba cara ijo sama, Museh hobirik daha rih ka'a aang Kemah Tuhan, tutang aang paring pokahkas ahkan sombayang.

²² Puna numbun hukum agama Yahudi, bilak kokaro angihco tomuhiborasih umba daha; tutang dusa tihkas tou tonahpun, amat anai tusuh daha.

Porahpah Yesus ngahpit dusa

²³ Umba cara kolourih, ramu-ramu ijo monggambar hal-hal ijo ang soruga, porulu tomorasih. Tahpi ahkan hal-hal ijo ang soruga rih bongoi, mongguna porahpah ijo mahcu labih hinut.

²⁴ Kotului Kristus eam nyolong nokuh Ruang Borasih tapan kolunon, ijo baya jadi gambar Ruang Borasih ijo kotu'uioh. Kristus nyolong nokuh soruga bongoi; ang anan Io huntuh noharep Pohotala ahkan kogunan ihto.

²⁵ Imam hajo ain Yahudi nyino-nyinong toun nyolong nokuh Ruang Palingborasih ang luwang Lohpou Tuhan hawui ngomin dahan ihcokungan ohcin. Tahpi Kristus eam nyolong ahkan monyorah arop-Oh dulangduli.

²⁶ Tului amat kolourih, orih rimai: Io jari dulangduli ngarot, tahkan kolunon tuh tona'oi. Tahpi korinahoh, huntuh aang jaman laiu tuh, Io lombut sinotikat iou ahkan mongapit dusa hawui monyorah arop-Oh bongoi.

²⁷ Pohotala jari nuhkas ijo ulun mahtoi sinotikat iou tutang iro uli rih tomosara bain Pohotala.

²⁸ Kolourih ka'a, Kristus sinotikat nyorah arop monjadi porahpah ahkan mongapit dusan aro ulun. Io ahkan lombut hino aang koduo tikatoh, eam hino ahkan ngobuah soal dusa, tahpi ahkan nyolamat ulun-ulun ijo ngindoi polombut-Oh.