IBRANI 5 - BOWOT BOHUA

¹ Nyinong imam hajo tonopili tahkan louk ukup, tutang tonotuot ahkan mohalu Pohotala kolou wakil iro. Gawiouoh iorih, monyorah ahkan Pohotala pononga-pononga tutang porahpah-porahpah ijo ahkan ngapun dusa.

² Imam hajo rih bongoi bolomu a'ang karo hal, tutang kotului orih io tou nguan kolomu lembai, toharep ulun-ulun ijo eam ta'an ino-inon, tutang ijo sosat jalaioh.

³ Tutang kotului io bongoi bolomu, mahka io harus nyorah porahpah, eam bewe tului dusa-dusan ukup, tahpi ka'a kotului dusa-dusanoh bongoi.

⁴ Eam anai ihcobehti ka, ijo potuot aropoh bongoi, monjadi imam hajo. Ulun monjadi imam hajo, amat Pohotala na'ah io ahkan orih – sama kolou Aron.

⁵ Kodorih ka'a Kristus. Io eam potuot arop bongoi monjadi Imam Hajo. Pohotala bongoirih ijo potuot Io. Pohotala nuhtui umba Io, ‘‘Ihko tuh Anak-Ku aang ondou tuh Ahku monjadi Amai-Mu.’’

⁶ Ang unuk bohkon Pohotala nuhtui ka'a. ‘‘Ihko anairih Imam turus-jahamoh kolou Imam Melkisedek.’’

⁷ Ang wayah Yesus bolum ang kolunon tuh, Io bodo'a tutang nyawot umba auh kombak tutang tangihoh ahkan Pohotala, ijo sanggup monyolamat Io, tahkan popahtoi. Tutang kotului Io tunduk umba Pohotala honong tuwi horomat, mahka Io tongonahanoh.

⁸ Yesus rih anairih Anak Pohotala, tahpi oluka kolourih, Io bolajar monjadi te'et nguha kokarot-Oh.

⁹ Mahka uliius Io tomonjadi ponyolamat ijo soporuna, Io monjadi luwangtohasak solamat ijo kototahiu bagi paring ulun ijo te'et umba Io,

¹⁰ tutang Pohotala ka, ngorinah Io kolou Imam Hajo, kolou Imam Melkisedek!

Pongingat

¹¹ Tohou ponuot Yesus kolou Imam Hajo, anai aro ijo porulu ihkai mborihtarih ahkan'kam, tahpi bohali ahkan monarangoh kotului ihkam borakah sino horahti.

¹² Kotu'uioh jari ohkotoh ahkan'kam ahkan monjadi guru, tahpi korinahoh ihkam puna porulu bolajar tahkan ulun bohkon, tohou asas-asas kopahtuk ajaran tahkan Pohotala. Ihkam jaha dahpot norima ukun ijo mahang, ihkam magun pahtut ngorih susu iou.

¹³ Ulun ijo magun ngorih susu, rimai io magun ngoa, io jaha anai aro pongalamoh, tohou inon ijo morong tutang inon ijo sala.

¹⁴ Ukun ijo mahang tohko ahkan ulun oko, ijo tului pongalaman jari dahpot ngobohkon-bohkon umoh ijo pios tutang umoh ijo ja'at.