IBRANI 4 - BOWOT BOHUA

¹ Nah, bowot Pohotala magun tohapan, tutang ihto ahkan tononga nondobo'o ijo tonobowot-Oh. Jadi, hondakrih ihto bojaga, mangat ara anai ihcobehti ka tahkan louk ihkam, ijo korinah eam komo nondobo'o-Oh ijo tonobowot orih.

² Kotului Kabar Hinut rih jari tomborihta ahkan ihto, sama kolou ahkan iro. Tahpi ahkan iro borihta rih eam anai gunaioh. Kotului kotihka iro ngonihoh iro eam porocaya.

³ Tahpi ihto ijo porocaya norima nondobo'o ijo tonobowot Pohotala rih. Orih tohorong umba inon ijo tonuhtui Pohotala koloutuh. ‘‘Ahku bosingi tutang nulut. ‘Iro eam ahkan nyolong ahkan norima ponondobo'o homboh Ahku.’ ’’ Pohotala nuhtui koloutuh, oluka gawiu-Oh ius ohpah, tahkan Io naoi kolunon tuh.

⁴ Tului tohou ondou kopihtu, anai tonyurat ang Surat Borasih koloutuh, ‘‘Ang ondou pihtu, Pohotala nondobo'o tahkan paring gawiu-Oh.’’

⁵ Tohou hal orih tonyurat hino koloutuh, ‘‘Iro eam ahkan nyolong nokuh tana rih, ahkan dahpot nondobo'o homboh Ahku.’’

⁶ Jadi iro ijo pahtu-pahtuk-Oh ngonih borihta tohou Kabar Hinut rih, eam norima tondobo'o rih, kotului iro eam porocaya. Amat kolouorih jadi tarang, ijo anai ulun-ulun bohkon, ijo tou norima kotondobo'o rih.

⁷ Kotului Pohotala jari nuhkas ihco ondou ijo bohkon hino, ijo konohawot, ‘‘Ondou Tuh’’. Botoun-toun pongo hino, Pohotala nuhtui tohou hal rih nguha Dawid, a'ang ayatoh ijo ngohtib nanai, ‘‘Amat ang ondou tuh, ihkam ngonih auh Pohotala, ara ihkam ngomahang kuhung.’’

⁸ Amat jahkaoh Josua, jari nonga ulun-ulun rih nondobo'o ijo tonobowot Pohotala, mahka Pohotala eam ahkan mander hino tohou ihco ondou ijo bohkon.

⁹ Jadi bagi ukup Pohotala, magun anai bowot, ahkan nondobo'o, kolou Pohotala jari nondobo'o, ang ondou ijo kopihtu rih.

¹⁰ Tului ulun ijo norima tondobo'o ijo nobowot Pohotala ahkaioh rih, ahkan nondobo'o ka'a, tahkan paring gawiuoh sama kolou Pohotala.

¹¹ Kotului orih, olairih ihto bousaha tu'u-tu'u ahkan norima nondobo'o ijo nobowot Pohotala rih. Ara nyiring ihcobehti ka tahkan ihto gagal kolou iro lomoi, kotului eam porocaya ahkan Pohotala.

¹² Auh Pohotala anairih auh ijo bolum tutang ba'as; labih bonyihi tahkan padang bonyihi hososila. Auh rih nusuk nyiring nokuh tihkas holat homboruan tutang roh; johcok nokuh tihkas holat sambung-sambung tutang tulang utok, nyiring ngota'an kotimbon-timbonoh tiruk tutang niat ahtoi kolunon.

¹³ Eam aro ihco mahluk ka ijo bosuhuk tahkan ponopahjah Pohotala. Kokaron angihco paring hoburang tutang bokuap ang husuk-Oh. Tutang ihto harus nonga tanggung-jawab ahkai-Oh.

Yesus Imam Hajo ijo hajo

¹⁴ Orih rih kotuluioh ihto harus botambit tehen aang pongahkuan koporocayan ihto. Kotului ihto anaitepun Imam Hajo ijo hajo, ijo jari nyolong johcok nokuh husuk Pohotala – Iorih Yesus Anak Pohotala.

¹⁵ Imam hajo ain ihto rih, bohkon tahkan imam ijo eam dahpot umba nginyam kolomun-kolomun ihto. Sobalikoh, Io jari tonihkos a'ang karo hal, sama kolou ihto bongon; tihkas Io eam napa dusa!

¹⁶ Tului rih, olairih ihto umba kotuwi bohanyi noharep Pohotala ijo moretah umba hinut ahtoi. Pohotala ahkan mongasih ihto tutang mborehkat ihto, mangat ihto norima pondohop, metuk aang ohkotoh.