IBRANI 3 - BOWOT BOHUA

Yesus labih hajo tahkanumba Museh

¹ Konduang-konduang sosama Kristen ijo jari tona'ah ka'a bain Pohotala! Cuba nirukrih timbon-timbon tohou Yesus tuh! Pohotala nyuhu Io khusus, ahkan monjadi Imam Hajo a'ang agama ijo ihto nambit.

² Io bokehtep umba Pohotala ijo jari ngopili Io ahkan gawi rih, kolou ka'a Museh lomoi bokehtep nguan gawiuoh ang Lohpou Tuhan.

³ Tahpi Yesus pahtut mondahpot kohoromatan ijo labih hajo tahkanumba Museh. Kotului ulun ijo mangun lohpou pahtut duon kohoromatan labih hajo tahkanumba lohpou rih bongoi.

⁴ Puna nyinong lohpou anai ijo mangunoh, tahpi ijo mangun kokaro aang'co anairih Pohotala bongoi.

⁵ Museh bokehtep tehen kolou jihpon ang Lohpou Tuhan, tutang nyiar hal-hal ijo ahkan tomorihtaoh bain Pohotala ang kotihka ijo ahkan lombut.

⁶ Tahpi Kristus bokehtep kolou Anak, ijo botanggung-jawab ngosan Lohpou Pohotala. Tutang ihto tuhrih Lohpou Pohotala, amat ihto tahtap bosomangat tutang tahtap yakin ahkan ngondahpot inon ijo ihto harapoh.

Nondobo'o ahkan ukup ain Pohotala

⁷ Bain rih, kolou hion Roh Pohotala, ‘‘Amat aang ondou tuh ihkam ngonih auh Pohotala,

⁸ ara rih ihko ngomahang kuhung, kolou tahtu ajuh'kam, kotihka iro mborontak toharep Pohotala, tutang nyuba Pohotala ang padang balambah.

⁹ ‘Ang anan tahtu ajuh'kam nihkos Ahku, tutang nyuba Ahku,’ hion Pohotala, ‘podahar iro ius nohto konuak-Ku ohpat pulu toun kotohiuoh.’

¹⁰ Orihrih kotuluioh Ahku bosingi toharep iro tutang Ahku nuhtui, ‘Iro turus eam bokehtep, tutang nohkas mone'et poretah-poretah-Ku.’

¹¹ Ahku bosingi tutang monulut, ‘Iro eam ahkan nyolong nokuh tana rih ahkan dahpot nondobo'o homboh Ahku.’ ’’

¹² Konduang-konduang bua-buah, ara nyiring anai ang louk'kam ihcobehti ijo ahtoioh kolorih koja'at, tutang eam porocaya, nyiring io ngulos tutang ngomahcu Pohotala ijo bolum!

¹³ Jadi, mangat eam anai ihcobehti ka tahkan louk'kam, ijo tonihpu bain dusa nyiring molawan Pohotala, hondakrih ihkam saling hotingak nyinong ondou, kotahin ihto magun bolum, ang jaman ijo konohawot ‘‘Ondou Tuh’’ a'ang Surat Borasih.

¹⁴ Ihto paring anairih injah ihcohokolahi homboh Kristus, asar ihto johcok laiu nambitoh lehket koyakinan ijo ihto tepui tahkan pahtukoh.

¹⁵ Jituhrih ijo tonyurat luwang Surat Borasih, ‘‘Amat aang ondou tuh ihkam ngonih auh Pohotala, ararih ihkam ngomahang kuhung, kolou tahtu ajuh'kam, ohkot iro mborontak toharep Pohotala.’’

¹⁶ Nah, iairih ulun-ulun ijo ngonih Auh Pohotala, turus mborontak toharep-Oh? Orihrih paring ulun, ijo toniting bain Museh soluka tahkan Misir, kowa?

¹⁷ Tutang toharep iairih, Pohotala bosingi ohpat pulu toun kotahiuoh? Toharep iro ijo bodusa, ijo bolihang mahtoi ang padang bolambah, kowa?

¹⁸ Kotihka Pohotala nulut koloutuh, ‘‘Iro eam ahkan nyolong ahkan tana rih ahkan dahpot nondobo'a homboh Ahku’’ – iai hino ijo konohuangoh bain Pohotala? Ijo konohuangoh yorih ulun-ulun ijo mborontak toharep Pohotala, kowa?

¹⁹ Huntuh ihto horahti ijo iro eam dahpot nyolong, tului iro eam porocaya umba Pohotala.