IBRANI 2 - BOWOT BOHUA

Kosolamatan ijo hebat

¹ Orihrih kotuluioh ihto harus labih tu'u-tu'u nambit aang ajaran-ajaran ijo jari ihto ngonihoh, mangat ihto ara nohtah koporocayan ihto.

² Pohtoh-pohtoh ijo tonyiar bain molehkat-molehkat ahkan tahtu ajuh ihto korinah morong tutang ulun ijo eam numbunoh ata'ai ngote'etoh, norima hukum ijo sotimpal.

³ Mahihino umba kosolamatan ijo labih hebat tahkan pohtoh-pohtoh rih! Amat ihto eam anai poduli toharep kosolamatan rih, ihto puna botatu eam ahkan luhput tahkan hukuman. Tului Tuhan bongoirih ijo pahtu-pahtukoh mborihta kosolamatan rih, tutang ulun ijo sula-sulak lomoi ngonihoh, jari mombuktioh komorongoh ahkan ihto.

⁴ Ang bambai orih, Pohotala umba ngondehen kosaksian ulun-ulun rih, hawui nahtap karo mahcam tandahelan tutang hal-hal luar biasa honong mbagi-bagioh pononga-pononga tahkan Roh Pohotala numbun konohuang-Oh bongoi.

Nguap jalan bagi kolunon ahkai tonyolamat

⁵ Molehkat-molehkat eam dahpot kowasa tahkan Pohotala ahkan moretah kolunon bohua ijo ahkan lombut, yorih kolunon ijo rahat ihto manderoh tuh.

⁶ Sobalikoh, aang ihco kobagi ang luwang Surat Borasih tonyurat koloutuh, ‘‘Kolunon rih inon, yo Pohotala, nyiring Ihko kani mongingatoh? Kolunon tihkas kolunon iou tahpi Ihko nohtoanioh!

⁷ Ahkan ohkot ijo honjiot ihko ngojorian Io honjiot labih pinda tahkanumba molehkat. Ihko nongaoh ahkaioh, ponuot ijo isung tutang tonohoromat,

⁸ honong ngojorian io pongowasa isun kokaro angihco.’’ Nah, amat tonuhtui ijo Pohotala nguan kolunon, ‘‘pongowasa isun kokaro angihco,’’ orih rimai, ijo eam anai angihco ka, ijo eam ang pinda kuwasan kolunon. Oluka kodorih, ihto eam nohto huntuh ulun bokowasa ngosan karo angihco.

⁹ Tahpi ihto jari nohto Yesus bokowasa! Io tonguan honjiot, labih pinda tahkan molehkat, ahkan ohkot ijo iwak, mangat ngosan kopios ahtoi Pohotala, Io dahpot mahtoi ahkan paring ukup kolunon. Ihto nohto Io uhuntuh, tononga ponuot ijo isung tutang torohoromat, kotului Io jari ngarot nyiring mahtoi.

¹⁰ Puna jari kopahtutoh Pohotala – ijo naoi kokaro angihco ahkan konohuang-Oh bongoi – monapa Yesus ponyolamat ijo soporuna nguha kokarotrih. Honong orih Pohotala dahpot na'ah aro ulun ahkan umba tonohajo homboh Yesus. Tului Io ponguap jalan bagi iro, mangat tou tonyolamat.

¹¹ Yesus muhioh ulunkolunon tahkan dusa-dusan'ndo; tutang Io ijo muhioh, hawui iro ijo tomuhioh rih, sama-sama anaitepun ihco Amai. Orihrih kotuluioh, Yesus eam mia ngahku iro rih kolou konduang-konduang-Oh.

¹² Yesus pander umba Pohotala, ‘‘Ahku ahkan mborihtaoh ahkan konduang-konduang-Ku tohou Ihko. Ahku ahkan monara Ihko ang a'ang puhpung iro.’’

¹³ Yesus pander ka'a, ‘‘Ahku ahkan ngina koharap-Ku ahkan Pohotala.’’ Tutang Io nuhtui ka'a, ‘‘Ituhrih Ahku, homboh anak-anak ijo jari tononga Pohotala ahkak-Ku.’’

¹⁴ Bain kotului ulun-ulun ijo Io ngohawot, anak, rih, anairih mahluk kolunon ijo dahpot mahtoi, mahka Yesus bongoi monjadi sama, umba iro, tutang bolum a'ang koada'an ulun. Io nguan kolorih, mangat umba popahtoi-Oh, Io dahpot moluhtek Sehtan ijo mongowasa popahtoi.

¹⁵ Umba cara orih, Io momordehka ulun-ulun ijo kotahin bolum tohojihpon, tului mihkoh ahkan popahtoi.

¹⁶ Korinahrih ijo eam molehkat ijo todohop-Oh molekan lihit Abraham.

¹⁷ Jituh rimai ijo Io harus monjadi sama umba konduang-konduang-Oh a'ang kokaro hal. Tutang umba orih Io dahpot monjadi Imam Hajo ijo bokehtep tutang pongasiponyayang. Umba pohalu-Oh rih dusan kolunon dahpot tonapun.

¹⁸ Tutang kotului Io bongoi pu'u mongarot tutang tonihkos. Io dahpot ndohop ulun-ulun ijo kona tihkos, kotului Io bongoi pu'u tonihkos tutang mongarot.