IBRANI 11 - BOWOT BOHUA

Koporocaya

¹ Koporocaya rimai yahkin tu'u-tu'u ahkan hal-hal ijo tonoharap, rimai anaingina kopastian ahkan hal-hal ijo eam tonohto.

² Tului koporocaya, mahka ulun-ulun jaman nokalou tonojorih bain Pohotala.

³ Tului koporocaya, mahka ihto horahti ijo pindalangit tuh tona'oioh bain auh Pohotala; jadi, inon ijo duon tonohto, nyolung tahkan inon ijo eam dahpot tonohto.

⁴ Kotului porocaya Abel monyorah ahkan Pohotala porahpah ijo paling hinut tahkanumba porahpah Kain. Tului porocayaoh rih, Abel tonorima bain Pohotala, kolou ulun ijo hinut, kotului korinah rih ijo Pohotala norima ponongaoh. Abel ius palus, tahpi tului porocaya rih mahka io magun bopander nyiring huntuh.

⁵ Kotului porocaya, mahka Henoh eam mahtoi, molekan tongahtang tutang tonomin ahkan Pohotala. Eam ihcobehti ka duon nyombang io, tului io jari tongahtang bain Pohotala. Luwang Surat Borasih tonyurat, ijo sounumba Henoh tongahtang io ngojorih ahtoi Pohotala.

⁶ Earo porocaya, eam ihcobehti ka duon ngojorih ahtoi Pohotala. Bain ulun ijo lombut nokuh Pohotala harus porocaya ijo Pohotala tohko, tutang ijo Pohotala nonga balos ahkan ulun ijo ngurah-Oh.

⁷ Kotului porocaya, mahka Noah tonyorihta bain Pohotala tohou hal-hal ijo ahkan nyolung pongohino, ijo eam dahpot tonohto baiuoh. Noah mone'et Pohotala, nyiring io napa ihco bonama ijo pongohino korinah monyolamat aropoh homboh ukupjolahaioh. Honong kolourih kolunon tonohukum, rahat rih Noah bongoi kotului porocayaoh, tongorinah bain Pohotala kolou ulun ijo kopios.

⁸ Kotului porocaya, mahka Abraham mone'et Pohotala, kotihka Pohotala na'ah io, tutang nyuhuoh tulak nokuh tanah, ijo Pohotala mbowot ahkaioh. Turus Abraham tulak honong eam ta'an nokuh umoh ahkan ponulak.

⁹ Honong porocaya, Abraham mohcon kolou ulun bohkonuhtus, ang tanah ijo tonobowot Pohotala ahkai rih. Abraham mohcon ang anan ang luwang kemah. Kolourih hino Isaak tutang Yakub, ijo norima bowot ijo kolou orih tahkan Pohotala.

¹⁰ Kotului Abraham rahat ngindo-ngindoi lowu ijo torocana tutang tonombok bain Pohotala umba galang ijo segah.

¹¹ Kotului porocaya, mahka Abraham tou dahpot lihit tahkan Sarah, uloka Abraham jari dalou oko tutang Sarah bongoi tomanang. Abraham yahkin ijo Pohotala ahkan monyolung bowot-Oh.

¹² Oluka Abraham ang uhun orih, kolou ulun ijo jari mahtoi behtiuoh, tahpi io nuhtuh aro lihit, ijo karaioh eamduon tonorehken – kolou potion-potion ang langit tutang baras ang saran tasik.

¹³ Paring ulun rih tahtap porocaya nyiring mahtoi. Iro eam norima hal-hal ijo tonobowot bain Pohotala, tahpi baya nohto tutang naharangoh tahkan mahcu. Tutang honong rih iro ngorinah, ijo iro baya ulun bohkonuhtus tutang ponomuoi ang kolunon tuh.

¹⁴ Ulun ijo nuhtui kolourih nunjuk honong jelas, ijo iro rahat ngurah lowu, ijo monjadi ahkan tanadanum'ndo.

¹⁵ Bohkon lowu, ijo ius iro nohtahoh rih ijo iro ngena-ngenangoh. Tului amat kolourih, mahka jari aro kosapet ahkan iro, buli nokuh lowui rih.

¹⁶ Tahpi korinahoh, iro rindu umba 'cokobawak lowu ijo labih hinut, iorih lowu ang soruga. Orihrih kotuluioh Pohotala eam mia amat iro ngohawot Io Pohotalan'ndo, bain Pohotala jari nahtap ihcokobawak lowu bagi iro.

¹⁷ Kotului porocaya ka'a, mahka Abraham monyorah Isaak monjadi porahpah kotihka io tonguji Pohotala. Ahkan Abrahamrih Pohotala nonga bowot-Oh, tahpi Abraham rela nonga anakoh ijo baya ihco-ihcooh rih.

¹⁸ Pohotala jari nuhtui umba Abraham, ‘‘Nguha Isaak jituh, ihko ahkan ngondahpot lihit ijo Ahku jari mbowotrih ahkan ihkam.’’

¹⁹ Abraham yahkin ijo Pohotala sanggup mbolum huli Isaak tahkan popahtoi – jadi tou tonohawot Abraham jari norima huli Isaak tahkan popahtoi.

²⁰ Kotului porocaya, mahka Isaak mbowot borehkat ahkan Yakub doro Esau ahkan wayah noharep.

²¹ Kotului porocaya, mahka sounumba Yakub palus, io nonga borehkatoh ahkan anak-anak Yusep – honong nyandar ang kuhung sukahoh tutang nyembah Pohotala.

²² Kotului porocaya, mahka Yusep uhun doni nohtah kolunon – bopander tohou solukaoh ukup Israel tahkan Misir, tutang nohtah pohtoh tohou inon ijo harus konuan iro umba otuioh.

²³ Kotului porocaya ulun oko Museh, monyuhukrih tolu bulan kotahiuoh uli konanak. Iro nohtooh io ihcobehti anak ijo pios, tutang iro eam mihkoh molawan poretah lahca.

²⁴ Kotului porocaya, mahka Museh jari hajo, eam kani konohawot anak tahkan putri lahca Misir.

²⁵ Io labih jolik ngarot, hombo-homboh umba ukup Pohotala, tahkanumba ahkan pondehan ohkot nginyam komangat, tahkan bolum ijo bodusa.

²⁶ Museh komo, ijo mahcu labih borega, ahkan norima tongohina demi Lahca Ponyolamat, ijo tonobowot Pohotala rih, tahkanumba ngondahpot karo ponahtou, tana Misir, tului Museh moharap upah ang ondou pongohuli.

²⁷ Kotului porocaya, mahka Museh nohtah Misir, eam komo kihkoh toharep kosingin lahca Misir. Museh miar nitu titunbaui koloujahka io jari nopahjah Pohotala ijo eam gihtan rih.

²⁸ Kotului porocaya, mahka Museh nguan Paska tutang moretah, mangat ponalit daha aang johin bauntukang, nyinong lohpou ulun Israel, mangat molehkat Popahtoi ara munu anak-anak pongoko iro.

²⁹ Kotului porocaya, mahka ulun-ulun Israel dahpot mitah tasik bohandang, koloujahka iro nyalan ang ngosan tana ijo tojah, rahatoh ulun-ulun Misir tonolon bain tasik rih kotihka iro mocuba mitah ka'a.

³⁰ Kotului porocaya, ulun-ulun Israel nguan dinding kohta Yerikho, bolukang uli iro ngodilingoh kotahin pihtu ondou.

³¹ Kotului porocaya ka'a, mahka Rahab, bawin sundal rih eam kona punu, homboh umba ulun-ulun ijo molawan Pohotala; kotului io norima hawui bojenta, umba pongolahti-pongolahti Israel.

³² Nah, ahku tou iou toturus pander, tahpi ohkot eam sukup ahkak'ku. Bain ahku jaha hino ngohawot Gideon, Barak, Simson, Yepta, Dawid, Samuel, tutang nabi-nabi.

³³ Kotului porocaya, mahka iro jari ngalahoh kolahcan-kolahca'an. Iro nguan inon ijo morong, nyiring norima inon ijo tonobowot Pohotala. Iro mangop nyaman-nyaman singa,

³⁴ mbolop baho ijo hebat, tokila tahkan tewek padang. Iro bolomu tahpi nyolung ba'as; iro bolinga ang poporangan nyiring mopokalah posukan sorodadu uhtus bohkon.

³⁵ Kotului porocaya, mahka ulun-ulun bawi ngonduan hoduli ulun-ulun ijo jari mahtoi. Anai hino ijo rela tonosiksa nyiring mahtoi, tutang nulak ahkan tonoliwus, kotului kani tonombolum hoduli bagi ihco pombolum ijo labih pios.

³⁶ Anai ijo tongonjea-jea, tomahcat, nyuhkui umba ratai, tutang anai ijo ponosolong ahkan luwang sipir.

³⁷ Iro tomukah umbabahtu nyiring mahtoi, anai ijo tonohtok umba gergaji, tutang ijo tomunu umba padang. Iro mongombara hapan hahtin tahkan upak tobiri ata'ai upak kambing; iro porosbolum, tonoporos tutang tonyiksa.

³⁸ Kolunon tuh eam unuk ijo layak bagi iro. Iro mongombara ang padang balambah tutang ang puruk-puruk, hawui mohcon ang luwang guha-guha tutang luwang lowong-lowong tana.

³⁹ Eaminon kohajoioh komanang ijo ngondapot bain paring ulun rih, tului porocaya iro! Tahpi ka'a iro eam norima inon ijo tonombowot Pohotala,

⁴⁰ kotului Pohotala anai rancana ijo labih pios ahkan ihto. Rancana-Oh, iorih ijo tihkas hihco umba ihto, iro ahkan monjadi soporuna.