GALATIA 5 - BOWOT BOHUA

Mopotahanohrih komorodehka'kam

¹ Ihto uhuntuh morodehka! Tului Kristus jari momorodehka ihto! Tului rih potahanohrih komorodehka'kam, tutang ara kani tonojihpon hino.

² Ingat! Amat ihkam nyawot tunyunat orih rimai Kristus eam anai gunaioh bagi ihkam. Ijo nuhtui tuh, anai ahku bongok, Paulus.

³ Sino hino ahku nonga pongingat ahkan ulun ijo nyawot tonyunat, ijo io puna wajib molalus paring hukum agama!

⁴ Amat ihkam ngurahjalan hokopios umba Pohotala, nguha hukum agama orih rimai kohihco'kam umba Kristus jari pahtot. Honong kodorih ihkam bolum ang ruar barih tonganasin Pohotala.

⁵ Tahpi bagi ihkai, ihkai bokoharap, ijo honong pondohop Roh Pohotala tutang hogalang koporocayan ihkai umba Kristus, Pohotala touduonrih ahkan ihkai hokopios umba Io.

⁶ Kobain amat ihto ius hihco umba Kristus Yesus, hal numbun ata'ai eam numbun poroturan sunat, eam monjadi soal hino. Ijo boguna tihkasrih porocaya umba Kristus, tutang orih korinah aang kasih ihto umba ulun bohkon.

⁷ Lomoi ihkam hokolahi honong pios! Huntuh ombai ihkam eam te'et hino umba konohuang Pohotala? Iai jari mbujuk ihkam?

⁸ Musti ijo nguan rih, eamrih Pohotala ijo jari na'ah ihkam!

⁹ ‘‘Ragi ijo honjiot ahkan ngamir paring galapung.’’ hion ulun.

¹⁰ Oluka kodorih ahku magun porocaya ijo ihkam eam nambit podirian bohkon, bain ihto jari ihco umba Kristus. Tutang ahku yahkin, ijo iai ka ijo nderoh tiruk'kam ahkan tonohukum Pohotala.

¹¹ Tohou ahku, Konduang-konduang, ombai ahku toturus iou tongohiri, amat ahku magun mborihta ijo hukum sunat rih perulu? Amat ahku puna mborihta kolouorih, mahka pomborihtak'ku tohou sopolahki Kristus eam polombut persoalan.

¹² Labih pios ulun-ulun ijo nderoh tiruk'kam rih langsung iou bolua sino tahkan ukup!

¹³ Konduang jari tona'ah, ahkan monjadi ulun ijo morodehka. Tahpi ara hapa komorodehka orih ahkan hototurus nguan inon iou ijo ihkam jolik nguai. Sobalikoh ihkam saling mongasih tutang saling mohalu.

¹⁴ Sohopus hukum agama, koloputai a'ang poretah ijo ihco tuh. ‘‘Hondakoh ihkam mongasih sama-sama ulun, kolou ihko ngasih arop'kam bongom.’’

¹⁵ Tahpi amat ihkam saling hokoramak, awas noin ihkam hombo-homboh lonyuh.

Kojolik Roh Pohotala tutang kojolik roh kolunon

¹⁶ Kohondak koloutuh: Nauhoh Roh Pohotala niting ihkam tutang ara bolum numbun kojolik tobiat kolunon.

¹⁷ Tului kojolik kolunon hokolawan umba kojolik Roh Pohotala, tutang kojolik Roh Pohotala hokolawan umba kojolik kolunon. Kododuooh saling hokolawan, nyiring ihkam eam dahpot nguan inon ijo ihkam jolikoh.

¹⁸ Tahpi amat Roh Pohotala ijo niting ihkam, mahka ihkam eam tokowasa bain hukum agama.

¹⁹ Kojolik tobiat kolunon korinah ang karon-gawiu ijo kihal, ja'at tutang eam pahtut;

²⁰ aang nyembah songiangdewa tutang koruhoi, a'ang bomusuh-musuh, hokolahi, hokobohu, jeleng bosingi, tutang kogunan aropoh bongoi; kopusit tutang bopihak-pihak,

²¹ hawui hiri ahtoi, bobusau, pesta borami-rami tutang ijo bohkonoh. Toharep paringoh orih, ahku mopingat ihkam, huntuh koloukuwoh ahku mopingat ihkam lomoi ka'a, ijo ulun-ulun ijo nguan hal-hal kolourih eam ahkan monjadi anak ukup Ain Pohotala.

²² Sobalikoh, amat ulun-ulun toniting bain Roh Pohotala, buaoh iorih: Iro saling hokasih, iro jorih, iro ngina koteneng ahtoi, iro sabar tutang hobudi, iro pios toharep ulun bohkon, iro te'et.

²³ Iro randah ahtoi tutang sanggup ngowasa aropoh. Eam anai hukum agama ijo ngohana hal-hal kolourih.

²⁴ Ulun-ulun ijo ius monjadi ain Kristus Yesus, ulun-ulun rih ius munu tobiat kolunoioh hawui kokaron bolai tutang kojolikoh.

²⁵ Roh Pohotala ius nonga ahkan ihto pombolum ijo bohua; bain kotului rih Io ka'a harus mongowasa pombolum ihto.

²⁶ Ihto eam tou monjadi bojuhu, tutang saling ngoporos ahtoi, honong hiri ahtoi ihco sama ijo-bohkon.