GALATIA 1 - BOWOT BOHUA

^1-3 Konduang-konduang, ukup-ukup ang wilayah Galatia, Ahku Paulus, tutang paring konduang Kristen ijo homboh ahku, moharap, keleh Pohotala, Amai ihto tutang Tuhan Yesus Kristus nonga borehkat tutang kosanang ahkan'kam. Ahku monjadi rasul bohkon umba katuh kolunon ata'ai tului tonotuot bain ulun, molekan bain Yesus Kristus tutang Pohotala Amai ihto, ijo jari mombolum Io hoduli tahkan popahtoi.

⁴ Mone'et kohondak Pohotala, Amai ihto, Kristus monyorahrih arop-Oh monjadi porahpah bagi dusa-dusan ihto, mangat ihto tonyolamat tahkan jaman ijo ja'at tuh.

⁵ Tonotararih ahkan Pohotala turus-jahamoh! Amen.

Ihco-ihcooh Kabar Hinut

⁶ Ahku helan tohou Konduang-konduang! Ihkam tona'ah Pohotala bain tului ponongaasin Kristus, tahpi huntuh ihkam kodorih jeleng nolihkut Pohotala tutang nutut ‘‘kabar pios’’ ijo bohkon tahkanmba Kabar Hinut ijo tahkan Pohotala.

⁷ Kotu'uioh eam anai ‘‘kabar pios ijo bohkon.’’ Tihkas anai ulun-ulun ijo mborihta ahkan ihkam ‘‘kabar pios’’ tohou Kristus ijo iro mbalik mokilaoh nyiring ngihcuh ihkam.

⁸ Ulun ijo mborihta ‘‘kabar pios’’, ijo bohkon tahkan Kabar Hinut ijo jari ihkai mborihtaoh, nauh io tonohukum Pohotala – oluka ulun rih ihkai bongon ata'ai molehkat tahkan soruga!

⁹ Ihkai jari nuhtuioh lomoi, uhuntuh ahku nuhtuioh sinohino: Ulun ijo mborihta ahkan'kam ‘‘kabar pios’’ ijo bohkon tahkanmba Kabar Hinut ijo jari ihkam torima tahkan ihkai, ulun rih hondakoh tonohukum Pohotala!

¹⁰ Inonrih umba orih topahjah ahku koloujahka moharap tongahku bain kolunon? Samasino eam! Ahku baya moharaprih pongahkuan tahkan Pohotala. Inonkah ahku rahat bousaha ngomin ahtoi ulun, mangat tongojorih ulun? Amat ahku magun nguan kodorih, ahku eam jihpon Kristus.

Koloukuwoh Paulus monjadi rasul

¹¹ Konduang-konduang harus mongota'an ijo Kabar Hinut ijo ahku mborihtarih rih eam asaroh tahkan kolunon.

¹² Ahku eam norima kabar rih tahkan kolunon, tutang eam ihcobehti ka ijo majaroh ahkak'ku. Yesus Kristus bongoi ijo nguaprihoh usin Kabar Hinut rih ahkak'ku.

¹³ Punai ihkam jari ngonih tohou pombolum aik'ku lomoi, kolou ihcobehti ponambit agama Yahudi. Ihkam kota'an koloukuwoh kejamoh ahku hogoguan ukup Pohotala tutang koloukuwoh kopahamoh ahku bousaha molonyuhoh.

¹⁴ A'ang hal molalusrih agama Yahudi, ahku molabih ulun-ulun Yahudi, ijo samaokoi umba ahku. Ahku bosomangat samasino a'ang hal-hal tohou hadat-dasar tahtu ajuh ihkai.

¹⁵ Tahpi kotului kopios ahtoi Pohotala, Io ngopili ahku hounmba ahku konanak, tutang na'ah ahku ahkan mohalu Io.

¹⁶ Pohotala ngorinah Anak-Oh ahkak'ku, mangat Kabar Hinut tohou Anak-Oh dahpot ahku mborihtaoh ahkan ulun-ulun bohkon Yahudi. A'ang ohkot rih, ahku eam tulak ahkan ihcobehti ka ahkan nyawot nasehat.

¹⁷ Ahku eam ka'a tulak ahkan ulun-ulun ang Yerusalem, ijo jari labih soun, tahkan ahku monjadi rasul. Tahpi ahku tulak nokuh tana Arab, turus tahkan anan huli nokuh Damaskus hino.

¹⁸ Tolu toun pongohino, ahku tulak nokuh Yerusalem, ahkan hokosono umba Petrus. Ahku mohcon umba io tihkas limo balas ondou kotahiu.

¹⁹ Ahku eam hosombang umba rasul-rasul ijo bohkon kocoali Yakobus, konduang Tuhan.

²⁰ Inon ijo ahku nyurat tuh puna morong. Pohotala ta'an ijo ahku eam bobalik!

²¹ Uliorih ahku tulak nokuh daerah-daerah ang Siria tutang Kilikia.

²² Nyiring ang kotihka rih ukup-ukup Kristen ang Yudea magun jaha kosono ahku cara hotoharep.

²³ Iro tihkas ngonih ulun nuhtui, ‘‘Ulun ijo lomoi ngoporos ihkai, uhuntuh mborihta koporocaya ijo lomoi kani ponihouoh.’’

²⁴ Mahka iro monara Pohotala tului ahku.