EPESUS 6 - BOWOT BOHUA

Anak-anak umba amai-inai

¹ Anak-anak! Kolou murid ain Kristus, tee-te'et umba ulun oko'kam, tului orihrih ijo pahtut nguaioh.

² ‘‘Horomat rih amai'mu, tutang inai'mu,’’ anairih poretah 'jo pahtukoh tahkan Pohotala hawui bowot,

³ yorih: ‘‘Mangat ihko sanang tutang ombu umur'kam ang tana’’.

⁴ Konduang-konduang ijo monjadi amai! Ara monguan anak-anak'mu numbunorih kolou, nyiring iro monjadi bosingi. Sobalikoh mompohajo iro umba tata-tertib tutang ajaran Tuhan.

Jihpon umba tepui

⁵ Konduang-konduang ijo monjadi jihpon! Numbunrih poretah tepun'kam ijo ang kolunon tuh. Nguan orih orih umba nanyam horomat tutang ponumbun hawui umba tu'u-tu'u, koloujahka ihkam nguai orih ahkan Kristus bongoi.

⁶ A'ai nguan angkodorih tihkas ang ohkot ihkam tonopahjah, tihkas ahkan dahpot tara tahkan ulun. Tahpi hondakrih ihkam nguaioh, kolou jihpon Kristus ijo rahat numbun kohondak Pohotala honong kotuwi ahtoi.

⁷ Gawi ijo ihkam nguai kolou jihpon rih, hondakrih ihkam nguai umba ahtoi ijo jorih, kolou jahka Tuhan ijo ihkam mohaluoh, tutang eam baya ulun iou.

⁸ Ingatrih ijo nyinong ulun, pios jihpon, kanika ulun morodehka, ahkan norima balosoh tahkan Tuhan, ahkan hal-hal pios ijo konuaioh.

⁹ Konduang-konduang ijo monjadi Tepui! Hondakrih ihkam nguan kodorih ka'a toharep jihpon-jihpon'kam. A'ai hino hapa ngancam-mongancam. Ingat ijo ihkam tutang jihpon-jihpon'kam rih sama-sama anaingina ihco tuan, iorih Tuhan ijo ang soruga. Io eam nopahjah baui.

Pokahkas Pohotala ijo sukup

¹⁰ Laiuoh ihkam pios monjadi ba'as, umba koba'as ijo ihkam dahpot tahkan kowasa Tuhan, tului ihkam hihco umba Io.

¹¹ Hapanih paring pokahkas ijo tononga bain Pohotala ahkan'kam, mangat ihkam dahpot tahan molawan siasat-siasat bokolilit ijo paham tahkan Sehtan.

¹² Tului ihto hokolahi eamoh molawan kolunon, molekan molawan koba'as kokaro sehtan-sehtan ijo ngowasa jaman ijo ja'at tuh. Ihto molawan koba'as roh-roh ja'at ijo bokowasa ang pinda langit.

¹³ Tului orih, huntuh, hapanih koparing pokahkas ain Pohotala, mangat aang ondou ijo ja'at, ihkam sanggup molawan sorangan-sorangan musuh. Tutang mangat uli ihkam hokolahi johcok laiuoh, ihkam magun ba'as meteng.

¹⁴ Hondakrih ihkam tahtap bojaga. Hapa kokehtep umba Pohotala, monjadi pohtong kahang'kam, tutang kotulus-ahtoi kolou baju sanaman'kam.

¹⁵ Hondakrih korelaan ahkan mborihta Kabar Hinut ijo ngomin kosanang monjadi soruhpah'kam.

¹⁶ Nyinong ohkot haparih koporocaya'kam umba Tuhan, kolou sonjata pokila; umba koporocaya rih ihkam dahpot mbolop paring anak panah baho tahkan 'jo ja'at.

¹⁷ Ominrih kosolamatan orih monjadi koluhkup baja, tutang tuhtui Pohotala kolou padang tahkan Roh Pohotala.

¹⁸ Nguanohrih paringoh rih sambil bodo'a ahkan nyawot pondohop tahkan Pohotala. Aang nyinong kosapet, bodo'a toturus koloukuwoh Roh Pohotala niting ihkam. Hondakrih ihkam toturus bojaga tutang ara monyorah. Bodo'a toturus ahkan paring ukup Pohotala.

¹⁹ Tutang bodo'a ka'a ahkak'ku mangat ang ohkot ahku mborihta, Pohotala nonga ahkak'ku tuhtui-tuhtui ijo kona. Tutang mangat ahku honong bohanyi dahpot mborihta rahasia Kabar Hinut rih.

²⁰ Tului Kabar Hinut rih, ahku monjadi ihcobehti duta, tutang huntuh anai ang luwang sipir. Bodo'arih mangat ahku bahanyi mander tohou Kabar Hinut rih, koloukuwoh ahku harus manderoh.

Tabe laiuoh

²¹ Tikhikus, konduang ihto, tutang pohalu ijo te'et a'ang gawin Tuhan, ahkan mborihta ahkan'kam, kokaro angihco tohou ahku, mangat ihkam kota'an koada'ak'ku tutang gawik'ku.

²² Orihrih kotuluioh ahku nyuhu io nakuh ihkam, ahkan nyorihta koada'an ihkai, ahkan'kam paringoh, mangat mopohajo ahtoi'kam.

²³ Keleh Pohotala, Amai, Tutang Tuhan Yesus Kristus, duontou paring ukup ahkan hihco, tutang saling hosita hawui porocaya umba Kristus.

²⁴ Keleh Pohotala mborehkat Konduang paring, ijo sita Tuhan ihto Yesus Kristus honong asiu ijo eam dahpot bolop. Horomat ihkai, Paulus