EPESUS 5 - BOWOT BOHUA

Bolum ang luwang koloang

¹ Ihkam anairih anak-anak Pohotala ijo tonokasih-Oh, kobain orih ihkam harus ngurahjalan monutut sutu Pohotala.

² Pombolum'kam kohondakoh bohomboruan bain kasih, kolou Kristus ka ngasih ihto. Io moporahpah arop-Oh ahkan ihto, kolou ihco pononga ijo buanharum tutang monyanang ahtoi Pohotala.

³ Ihkam anairih ukup ain Pohotala. Kobainrih gawi-gawi ijo kihal, tutang ijo eam sanonoh, ata'ai ka kokuhurih ijo eam pahtut anai, ang tohun-tohun'kam. Ara nyiring ulun bohkon anaingina alasan ahkan nuhtui ijo ihkam nguan hal-hal kolourih.

⁴ Eam ka'a pahtut ahkan'mu ngohawot tuhtui-tuhtui ijo kojilok, ijo kihal, tutang ijo eam pantas. Sobalikoh hondakrih ihkam ngohawot torimakasih ahkan Pohotala.

⁵ Nohtoani pio-pios; ulun ijo hadatdasar kihal, ata'ai eam sanonoh, ata'ai bokuhu, (hadatdasar kodorih sama iou umba nyembah dewa) ulun rih eam tou monjadi anak ukup ijo tomoretah bain Kristus tutang Pohotala.

⁶ Ara ihkam tonihpu bain pander-pander ijo buang. Kobain hal-hal atuh, ijo polombut kosangit Pohotala, toharep ulun-ulun ijo eam te'et umba Io.

⁷ Jadi, ara ihkam hojelut samasino umba ulun-ulun kolourih.

⁸ Ihkam bongom lomoi anai ang luwang kopindong. Huntuh ihkam jari monjadi ukup Tuhan, jadi ihkam anai ang luwang koloang. Bain kotului rih ihkam harus bolum ang luwang koloang rih.

⁹ Kobain tahkan koloang rih, lombut karon mahcam angkonuan ijo hinut, bujur tutang tehtek aang topahjah Pohotala.

¹⁰ Ngurahjalan ngosono, inon ijo ngojorih ahtoi Tuhan.

¹¹ A'ai nguan gawi-gawi ijo eam boguna ijo tonguan kobain ulun-ulun ijo bolum ang kopindong. Tobalikoh, hondakrih ihkam momburang hal-hal mahcam orih. (

¹² Kobain hal-hal ijo iro nguai hawui benye-benyem rih, ahkan tomander ka jari komia.)

¹³ Paring angihco ijo tonyingah luwang koloang, ahkan tonopahjah honong korinah.

¹⁴ Bain paring ijo dahpot tonopahjah hawui torang, anairih koloang. Orih kotuluioh tonuhtui, ‘‘Monyun O ihko ijo ngarok, tutang kuat tahkan popahtoi! Kristus ahkan mopoloang ngosan'kam.’’

¹⁵ Tului orih nohtoanioh pio-pios cara pombolum'mu. A'ai bolum kolou ulun-ulun uong; bolum iou kolou ulun-ulun pihtar.

¹⁶ Ngunaohrih sopios-pios nyinong kosapet ijo anai ang ihko, tului huntuh puna kotihka ihco ja'at.

¹⁷ A'ai uong, tahpi nolihti inon ijo tongohondak Tuhan.

¹⁸ Ara ihkam busou bain anggur, kobain rih ahkan morusak ihkam. Sobalikoh, hondakrih ihkam konowasa bain Roh Pohotala.

¹⁹ Hapa tuhtui-tuhtui tahkan Masmur, monyanyi karon-tara tutang lagu rohani a'ang pander-pander'mu. Hondakrih ihkam hawui ahtoi ijo jorih monyanyi karon-tara ahkan Tuhan.

²⁰ Toturus tutang tohou inon ka ka'a, pios ihkam ngohawot torimakasih ahkan Pohotala, Amai, ngosan aran Yesus Kristus Tuhan ihto.

Bosai tutang oruh

²¹ Ahkan mohoromat Kristus pios ihkam tunduk ihco umba ijo bohkon.

²² Oruh, mindarih umba bosai'mu kolou umba Tuhan.

²³ Kotului bosai anai kopala, ngosan oruhoh, sama kolou Kristus monjadi kopala ngosan ukup tutang Io bongoi ka'a Lahca Ponyolamat bagi ukup, ijo monjadi bereng Aiu.

²⁴ Sama kolou ukup ka'a tunduk umba auh Kristus kodorih ka'a aang kokaron hal oruh harus tunduk ahkan bosaioh.

²⁵ Bosai, ngasih oruh'mu, sama kolou Kristus ngasih ukup hawoi nyarah arop-Oh ahkan ukuprih.

²⁶ Kristus nguanohrih, mangat Io duon moporasih ukup rih, umba ajar-Oh tutang nguha danum popondus, mangat pongohuli Io dahpot monyarah-Oh ahkan Pohotala.

²⁷ Honong kolourih Kristus nguan ukup rih tombok hawui ponohajo tutang borasih ang husuk-Oh, earo cahcat ata'ai sala inon ka.

²⁸ Kodorih ka'a bosai harus sita oruhoh kolou io sita aropoh bongoi. (

²⁹ Eam pu'u anai ulun ijo bosingi umba behtin Aiu bongoi. Sobalikoh io mohaga tutang monjagaoh kolou Kristus ka'a mohaga ukup-Oh.

³⁰ Ito kota'an rih, tului ihto anai ramun-ramun behtin Kristus.)

³¹ Luwang Surat Borasih tonyurat, ‘‘Bain orih ulunbahkas ahkan nohtah amai-inaioh ahkan hihco umba oruhoh, tutang kododuooh ahkan monjadi ihco.’’

³² Ayat jorih bosuang rimai ijo timbon. Tutang ahku ngaitoh rih umba tutungoh, holat Kristus tutang ukup.

³³ Tahpi ayat orih rih anai hosambungoh ka'a umba ihkam: Kohondakrih nyinong bosai ngasih oruhoh, kolou io ngasih aropoh bongoi, tutang kohondakrih nyinong oruh bousaha ahkan mohoromat bosaioh.