EPESUS 4 - BOWOT BOHUA

Kohihcon behti

¹ Bain orih ahku – ihcobehti tonahan, ijo tonahan kotului mohalu Tuhan – nyawot hawui paham umba'kam; bolum sorurui umba ponuot'mu, kolou ulun ijo ius tona'ah bain Pohotala.

² Hondakrih ihkam turus randah ahtoi, bolomu-lembai, tutang sabar. Ngorinahohrih asin'kam, honong hokodohop ihco umba ijo bohkon.

³ Bousaha tu'u-tu'u ahkan bolum honong kobuah, mangat kohihco ijo tona'oi bain Roh Pohotala tohtap tonojaga.

⁴ Tihkas anai ihco bereng tutang ihco Roh. Kodorih ka'a ihkam, tona'ah ahkan ihco koharap ijo sama.

⁵ Tihkas anai ihco Tuhan, ihco koporocaya, ihco pompandus,

⁶ tutang ihco Pohotala ijo monjadi Amai paring ulun. Iorih Tuhan ang-pinda langit, ijo bogawi nguha paringoh, tutang bokowasa ang luwang paringoh.

⁷ Ihto nyino-nyinong norima ihco pononga, numbun inon ijo tononga bain Kristus.

⁸ Ang Surat Borasih tonyurat, ‘‘Kotihka Io nuhkat nokuh unuk ijo diang, Io ngomin aro towanan tutang Io nonga karon-pononga ahkan kolunon.’’

⁹ Nah, amat konohawot ‘‘Io nuhkat’’ rimai Io pahtukoh jari nosuluh johcok nokuh unuk ijo paling pinda ang tana tuh.

¹⁰ Tutang Io ijo jari nosuluh rih, Iorih ka'a ijo nuhkat johcok nokuh unuk ijo mahcu labih diang, tahkan kokaron langit nyiring sohopus pinda langit bosuang umba koanaipolombut-Oh.

¹¹ Iorih ijo ‘‘nonga pononga-pononga ahkan kolunon’’; 'cokobarih tonuot-Oh monjadi rasul, ijo bohkon monjadi nabi, ijo bohkon hino monjadi pomborihta Kabar Hinut rih, tutang ijo bohkon hino tonuot-Oh monjadi guru-guru tutang pohaga ukup.

¹² Tuh tononguai-Oh mangat ukup Pohotala tonyukup paringoh mangat dahpot mohalu Tuhan, tutang mangun bereng Kristus.

¹³ Honong kodorih ihto paringoh monjadi ihco, bain koporocaya ijo sama, tutang kohorahti ijo sama tohou Anak Pohotala. Tutang ihto monjadi ulun-ulun ijo dewasa, ijo mahi tahi mahi botambah kosoporuna kolou Kristus.

¹⁴ Mahka ihto eam monjadi anak-inyam hino ijo kuhtang-kitui tutang hanyu-hanyut konomin ko-anan-ko-ohtoi bain rohusan mahca-mahcam ajar tahkan ulun-ulun ijo lihcik. Iro nyosat ulun umba tihpu muslihat iro.

¹⁵ Eam! Sobalikoh ihto harus ngorinah hal-hal ijo morong, umba ahtoi ijo tuwi pongasih, nyiring a'ang kokaro hal ihto mahi tahi mahi monjadi soporuna, kolou Kristus, ijo monjadi kopala ihto.

¹⁶ Ang pinda totiring-Oh paring ramun behtiu rih tosusun rahpi, tutang saling hotutung bain sambung-sahpanoh nyinong-nyinong. Tutang amat nyino-nyinong ramunbehtiu rih bogawi kolou ijo koharusoh, mahka sohopus behtiu rih ahkan tumbu monjadi dewasa tutang ba'as nguha kasih.

Pombolum ijo bohua ang hihco Kristus

¹⁷ Kotului rih demi aran Tuhan, tuhrih ijo ahkan ahku nuhtui tutang tegas; ara hino bolum kolou ulun-ulun ijo eam kosono Pohotala, tutang niruk ijo eam-eam.

¹⁸ Tiruk iro jari pindong. Iro eam ngosono pombolum ijo tononga bain Pohotala, tului iro samasino eam anaingina pongotaan ino-inon tohou Pohotala. Iro kodorih, tului mahang kuhungoh.

¹⁹ Iro jari eam anaingina anyam mia hino, nyiring iro nutut kokaron kojolik bolai tutang, bolum ngihal sokohondak ahtoioh.

²⁰ Tahpi Kristus Yesus ijo ihkam kosono eam kodorih!

²¹ Ihkam ius ngonih tohou Io! Tutang kolou murid-murid-Oh, ihkam jari tonongajar ka'a tohou sipat-sipat Pohotala ijo anai aang Io!

²² Kotului orih molokakohrih ko-ulun hounumba pola pombolum lomoi, ijo rahat tonorusak bain kojolik-kojolikoh ijo monyosat.

²³ Kohondakrih ahtoi tutang tiruk'kam tobahua koparingoh.

²⁴ Kohondakrih ihkam bolum kolou kolunon bohua ijo tona'oi numbun pola Pohotala; iorih umba tobiat ijo morong, bujur tutang borasih.

²⁵ Tului orih Konduang-konduang paringoh, ara hino bobalik. Nguanrih kobujur, ijo ihco umba ijo bohkonoh, kobain ihto paringoh anairih sama-sama ramun behtin Kristus.

²⁶ Amat ihkam sangit, ararih mohonou kosangit rih, kotuluioh ihkam bodusa. A'airih bosingi sohopus ondou,

²⁷ mangat sehtan a'ai dahpot kosapetoh.

²⁸ Ulun ijo biasa nahkou harus tondo nahkou. Sobalik io harus bogawi mangat ngonduon bolanjaoh honong bujur tutang duon dohop ulun ijo bokotahpas.

²⁹ Amat ihkam pander ara hapa tuhtui-tuhtui ijo ja'at. Hapa iourih tuhtui-tuhtui ijo majar tutang nonga pondohop ahkan ulun bohkon. Tuhtui-tuhtui kolourih ahkan mompolombut komorong ahkan ulun-ulun ijo ngonihoh.

³⁰ A'airih monyedihoh ahtoi Roh Pohotala. Ihkam jari tonyegel umba Roh monjadi ain Pohotala. Roh rih ka'a monjadi jaminan, ijo Ondou Komorodehka ahkan lombut ahkan'kam.

³¹ Dianohrih karon anyam koporos ahtoi, dondam tutang kosingi. A'ai hino bokociak-ciak tutang mongajea-jea. Ara hino anai anyam hiri ata'ai anyam bohkon ijo sama mahcam orih.

³² Sobalikoh, pios ihkam hinut ahtoi tutang tuwi sita-asi 'cobehti toharep ijo bohkon, tutang saling ngapun kolou Pohotala jari ngapun ihkam nguha Kristus.