EPESUS 1 - BOWOT BOHUA

¹ Ukup Pohotala ang Epesus, ijo bokehtep umba Kristus Yesus!

² Ahku, Paulus, rasul Kristus Yesus ngosan kohondak Pohotala, moharap, keleh Pohotala, Amai ihto tutang Tuhan Yesus Kristus nonga borehkat tutang kosanang ahkan ihkam.

Borehkat rohani honong poholat Kristus

³ Tara ahkan Pohotala, Amai Tuhan ihto Yesus Kristus! Io mborehkat ihto umba kokaron borehkat rohani ang luwang soruga, tului ihto hihco umba Kristus.

⁴ Sounumba kolunon tuh tona'oi, Pohotala ius mitih ihto nguha Kristus umba maksud, mangat ihto monjadi ulun-Aiu-Oh ijo khusus, tutang eam cahcat ang toharep-Oh. Tului sitan Pohotala,

⁵ mahka Io ius ngahtuh labih sounlomoi ijo nguha Yesus Kristus, Io ahkan potuot ihto monjadi anak-anak Aiu bongoi. Tutang puna orih rih ijo jolik tononguai-Oh.

⁶ Tonotararih ahkan Pohotala ijo Hajo, kotului nguha Anak-Oh ijo tongasih Io paham ngasih ihto.

⁷ Tului, bain popahtoi Kristus, ihto tomorodehka bain Pohotala, rimai Io jari ngapun ihto tahkan dusa-dusan ihto.

⁸ Io nguan orih tului Io paham ngasih ihto, tutang asiu rih tonosorah-Oh ahkan ihto, honong tuwi kopitar tutang kohorahti.

⁹ Numbun konohuang-Oh bongoi, Pohotala ngorinah ahkan ihto rahasia rancana-Oh; Io ius momuhtusoh ijo rancana-Oh rih ahkan tongopahoh nguha Kristus.

¹⁰ Rancana orih, iorih, mangat kokaron angihco, pios ijo ang soruga, oluka ijo ang tana, monjadi ihco umba Kristus kolou kopala. Tutang hal orihrih ahkan tonongopah bain Pohotala amat ius johcok ohkotoh.

¹¹ Pohotala monguan kokaron aangihco, numbun kojolik-Oh tutang kopuhtusai-Oh bongoi. Tahkan pahtuk Io jari mitih ihto, tului Io jolik mangat ihto monjadi ukup-Oh kotului hihco umba Kristus.

¹² Nauhoh ihto, ijo pahtu-pahtukoh bokoharap umba Kristus, monara Pohotala tului kohajoi-Oh!

¹³ Ihkam ka ius monjadi ukup Pohotala ang ohkot ihkam ngonih pohtoh Pohotala, iorih Kabar Hinut ijo mononga kosolamatan ahkan'kam. Ihkam porocaya umba Yesus Kristus, kotului orih Pohotala nonga tanda Aiu-Oh ahkan'kam, iorih Roh-Oh ijo tonobowot-Oh.

¹⁴ Roh orihrih njaminoh ijo ihto ahkan norima inon ijo jari tonobowot Pohotala ahkan ukup-Oh. Tuh nonga koyakinan ahkan ihto ijo Pohotala ahkan momorodehka ukup-Oh. Tonotararih Pohotala kotului kohajoi-Oh!

Do'a Paulus

¹⁵ Tului rih, tahkan ahku ngonih ijo ihkam porocaya umba Tuhan Yesus, tutang ihkam ngasih paring ukup Pohotala,

¹⁶ ahku eam pahtot-pahtotoh botorimakasih ahkan Pohotala tohou ihkam. Toturus ahku ngohawot aran ihkam ang ohkot ahku bodo'a.

¹⁷ Ahku nyawot mangat Pohotala, Tuhan ihto Yesus Kristus, Amai ijo tonohoromat nonga Roh-Oh ahkan'kam. Roh orih ahkan monjadian ihkam pitar, tutang ahkan mongorinah Pohotala ahkan'kam, nyiring ihkam ngosono Io.

¹⁸ Ahku nyawot mangat Pohotala nguap tiruk'kam nyiring monjadi boloang; mangat ihkam horahti inon ijo ihkam dahpot harapoh tahkan Pohotala ijo na'ah ihkam. Ka'a mangat ihkam ta'an eaminon botusuh borehkat-borehkat ijo bohinoi ijo tonahtap Pohotala ahkan ukup-Oh,

¹⁹ tutang eaminon kohebatoh Pohotala bogawi homboh kotuwi kowasa ang luwang ihto ijo porocaya. Kowasan Pohotala rih, sama kolou kowasa luar biasa,

²⁰ ijo tohapa-Oh kotihka mombolumoh hoduli Kristus tahkan popahtoi tutang nonga ahkai-Oh ponuot pongoisung hihco umba Pohotala ang soruga.

²¹ Ponuot Kristus rih mahco labih isungoh tahkanumba ponuot kokaron pomoretah, kokaron kowasa, kokaron okon, kokaron tuan-tuan tutang iai ka ka'a jari tononga ponuot isung; pios ijo bolum ang jaman tuh, oluka ijo bolum ang jaman ijo ahkan lombut.

²² Pohotala mopopinda paringoh ahkan pinda kowasan Kristus, tutang nonga Kristus ahkan ukup, kolou kopala tahkan kokaron aangihco.

²³ Ukup anai behtin Kristus, tonyoporuna bain Io ijo nyoporuna kokaron aangco ang amoh ka ka'a.