3 YOHANES 1 - BOWOT BOHUA

¹ Konduang Gayus ijo tonokasih! Ahku okon ukup, ijo tu'u-tu'u mongasihi'ko,

² bodo'a, keleh Konduang borigas-rigas tutang paringoh pio-pios honong ihko sama kolou homboruan'mu pio-pios iou ka'a.

³ Ahku sanang samasino, kotihka pira-pira Konduang Kristen johcok tutang mborihta ahkak'ku, eaminon kote'etoh, Konduang toharep Pohotala ijo morong, kotului puna Konduang toturus bolum numbun ajaran Pohotala.

⁴ Eam anai ijo dahpot monyababoh ahku labih jorih, tahkanmba ngonih ijo anak-anak'ku bolum numbun ajaran Pohotala.

Gayus tonara

⁵ Konduang'ku! Konduang kolourih kote'et a'ang gawi ijo Konduang nguai bagi sobat-sobat sosama Kristen; mahi-hino ulun Kristen ijo jaha Konduang ngosono ka, Konduang mohaluoh.

⁶ Iro jari momborihtaoh rih, ahkan ukup ang unuk ihkai, tohou sitan'kam. Dohop iro, mangat dahpot noturus ponyalan iro tutang honong kolourih ngojorih ahtoi Pohotala,

⁷ tului a'ang ponyalan ahkan mohalu Kristus, iro eam norima pondohop inon ka, tahkan ulun-ulun ijo eam kosono Pohotala.

⁸ Tului rih, ihto ulun-ulun Kristen harus ndohop sobat-sobat sama Kristen ijo kolou orih, mangat ihto dahpot umba a'ang usaha iro, ahkan mborihta ajaran ijo morong tahkan Pohotala.

Diotrefes tutang Dimetrius

⁹ Ahku jari nyurat surat ijo iwak ahkan ukup, tahpi Diotrefes ijo jolik monjadi okon, ang luwang ukup eam kani numbun ahku.

¹⁰ Noin amat ahku lombut, ahku ahkan ngarak karon aang'co ijo jari tonguaioh, yorih tohou hal-hal ja'at tutang alik ijo io mander tohou ihkai! Tahpi paringoh rih jaha sukup ahkaioh. Aang ohkot sobat-sobat sosama Kristen rih lombut, io eam kani norima iro. Malah io ngohana ulun-ulun ijo kani norima konduang-konduang rih, tutang io nyuhu ulun-ulun rih, soluka tahkan ukup!

¹¹ Konduang ijo tonokasih ara nyutu inon ijo ja'at. Nyutu iou inon ijo hinut. Ulun ijo nguan kopios anairih ain Pohotala. Tutang ulun ijo nguan koja'at jaha ngosono Pohotala.

¹² Paring ulun monara Dimetrius. Mahihino Pohotala ka monaraoh. Ihkai ka'a naraoh, tutang Konduang kota'an ijo inon, ijo ihkai nyiaroh, dahpot tomorocaya.

Auh tahbe ponuhtup surat

¹³ Aro samasino ijo porulu ahku manderoh ahkan ihkam, tahpi ahku nanyamoh labih pios ara nguha surat.

¹⁴ Ahku moharap eam tahi hino ahkan hosombang umba ihkam tutang ihto ahkan bopander hotoharep.

¹⁵ Keleh Tuhan momborehkat Konduang. Sobat-sobat'kam ang unuk ahku tuh, ngirim tahbe ahkan ihkam. Ngojohcok tehbe'ku ahkan paring sobat-sobat ihto mihco-mihco.