2 TIMOTEUS 4 - BOWOT BOHUA

¹ Kristus Yesus ahkan lombut hino nokuh kolunon tuh, ahkan mosara ulun-ulun ijo bolum tutang ijo mahtoi; tutang Io ahkan lombut ahkan moretah kolou Lahca. Bain kotului rih ahku nyawot hawui paham ahkan'mu ang toharep Pohotala tutang Kristus Yesus.

² Hondakrih ihko monyiaroh, borihta tahkan Pohotala rih, tutang turus hojojuan, mangat ulun ngonihoh, inonrih iro kani ata'ai eam. Hondakrih ihko moyakinoh ulun, nunjuk kosalai, tutang nonga juhung ahkan iro. Ngajarohrih ulun honong kosabar sodahpottou.

³ Tului ahkan johcok ohkotoh, ulun eam hino norima ajaran ijo morong. Tobalikoh, iro ahkan numbun kojolik iro bongoi, tutang mupung aro guru, guna majar hal-hal ijo momih konahan ang tolingan'ndo.

⁴ Iro ahkan mangop tolingai toharep ijo morong, tahpi ahkan nguap tolingaioh toharep solihta-solihta kolimoi.

⁵ Oluka kodorih, ihko harus ngowasaoh arop'mu a'ang koada'an koloukuwoh ka. Tabahrih a'ang kokarot lalusrihiou tugas'mu kolou pomborihta Kabar Hinut rih, tutang molalusoh rih honong ko-hinu-hinutoh, kopahtut'mu ahkan mohalu Pohotala.

⁶ Tohou arop'ku, jari johcok ohkotoh, ahku ahkan mahtoi kolou porahpah ahkan Pohotala. Honjiot hino ahku ahkan nohtah kolunon tuh.

⁷ Ahku jari umba solanja honong sohinu-hinutoh, tutang jari johcok garis laiu. Ahku tohtap te'et umba Kristus, johcok laiu.

⁸ Tutang huntuh hodiah komanang ngindoi ahku. Aang Ondou Kiamat, Tuhan, Hakim ijo adil rih ahkan monyarah hodiah orih ahkak'ku, tului ahku bolum hokopios umba Pohotala. Tutang eam ahku iou ijo ahkan norima hodiah rih, tahpi ka'a paring ulun ijo ngindoi polombut Tuhan hawui paham rindu.

Potunjuk-potunjuk ijo laiu

⁹ Bousaha lombut masap ahku sodahpottou.

¹⁰ Tului Demas jari nohtah ahku, kotului nyayang kolunon tuh. Io ius tulak nokuh Tesalonika. Kreskes jari tulak nokuh Galatia, tutang Titus nokuh Dalmatia.

¹¹ Tihkas Lukas ijo mohcon umba ahku. Omin Markus tutang ngomin io homboh ihko, tului io dahpot dohop a'ang gawik'ku.

¹² Ahku jari nyuhu Tikhikus tulak nokuh Epesus.

¹³ Amat ihko lombut, ngomin mantel ijo ahku nohtah ang Troas, ang lohpou Karpus. Omin ka'a buhku-buhku aik'ku, mombahtang buhku-buhku ijo tonapa tahkan korahtas uhpak.

¹⁴ Aleksander, tuhkang tombaga rih jari nguan hal-hal ijo ja'at samsino toharep ahku. Tuhan ahkan malos io numbun anggawiuoh.

¹⁵ Ihko bongom harus bua-buah toharepoh bain io ngolawan kabar ihto.

¹⁶ Ang ohkot ahku sino tikat, nonga pombela arop'ku, eam anai ihcobehti ka ijo mambai ahku; paringoh nohtah ahku. Mudah-mudahan Pohotala eam nosalan iro a'ang hal tuh!

¹⁷ Tahpi Tuhan mambai ahku, Io nonga koba'as, nyiring ahku sanggup mborihta paring Kabar Hinut rih, mangat konahan bain paring ulun bohkon Yahudi. Tutang ahku liwus tahkan bohaya popahtoi.

¹⁸ Puna Tuhan ahkan moliwus ahku, tahkan nyinong gawi ijo ja'at toharep ahku. Io ahkan ngomin ahku honong solamat, nokuh luwang Kolahca'an-Oh ang soruga. Hondakrih Io tonohajo turus-jahamoh! Amen.

Tahbe ijo laiuoh

¹⁹ Tahbe tahkan ahku ahkan Priskila tutang Akwila tutang ahkan jolahan Onesiforus.

²⁰ Erastus mohcon ang Korintus tutang Trofimus ius ahku nohtahoh a'ang koada'an mondam ang Miletus.

²¹ Bousahaiou sauli-ulihoh ahkan lombut soun tahkan wayah sorongin. Ebulus, Pudes, Linus, tutang Klaudia ngirim taben iro ahkan'kam; kodorih ka'a paring konduang ihcoporocaya ijo bohkonoh.

²² Keleh Tuhan mambai ihko. Keleh Tuhan mborehkat Konduang-konduang! Horomat ihkai, Paulus