2 TIMOTEUS 3 - BOWOT BOHUA

Ondou-ondou laiu

¹ Ingatrih tuh: Ang ondou-ondou kolaiou ahkan anai aro kosusah.

² Ulun ahkan kogunan aropoh bongoi, sipatoh mahta duitan, bojuhu tutang jolik mombual. Iro rajin mohina ulun, borontak toharep ulun ohko, eam ta'an botorimakasih, tutang bosingi hal-hal rohani.

³ Iro eam mongasi samaarop, eam rajin nonga apun, iro jolik ngonja'at-ngonja'at aran ulun bohkon, rajin hapa kokarasan, iro kejam, tutang eam ngojolik komorong.

⁴ Iro rajin dorhaka, bojuhu ahtoi, tutang eam moniruk ombu. Iro labih rajin aang kosanang kolunon tahkanumba numbun Pohotala.

⁵ Mahika socara koului iro te'et monjalanoh kowajiban agama, namun nulak usiou tahkan agama rih bongoi. Jayongohrih ulun-ulun ijo kolourih.

⁶ Anai ang louk iro, ijo jari nyusup nokuh lohpou-lohpou, turus njorat bawi-bawi bolomu, ijo ngina aro samasino dusai tutang konowasa bain mahca-mahcam kojolik.

⁷ Ulunbawi-ulunbawi rih turus hototurus nyawot tongajar, tahpi eam pu'u dahpot ngosono ajaran ijo morong tahkan Pohotala.

⁸ Samakoloukuwoh rih Yanes tutang Yambres molawan Museh lomoi, kodorihrih ka'a ulun-ulun orihrih molawan ajaran tahkan Pohotala. Tiruk iro jari rusak, tutang koporcaya iro jari sokarah.

⁹ Tahpi iro eam ahkan ngondahpot ino-inon, tului kouong iro ahkan tongota'an bain paring ulun, kolou ijo tonyuru bain Yanes tutang Yambras ka'a.

Tingak-tingak

¹⁰ Tahpi ihko jari nutut ajaran-ajaran tahkan ahku, hadat aik'ku, tutang tihtun pombolum'ku, ihko jari nohto bongom, koloukuwoh ahku tu'u-tu'u porocaya umba Yesus Kristus, tutang ngasih sosama kolunon. Ihko ka'a ta'an kosabaran tutang kotabah'ku.

¹¹ Ihko jari nohto ahku tonoporos tutang ahku ngarot. Ihko ta'an paring ijo nyolung toharep ahku ang Antiokhia, ang Ikonium, tutang ang Listra, tutang ihko ta'an paring ijo ahku ngarot! Tahpi Tuhan monyolamatoh ahku tahkan paringoh rih.

¹² Puna paring ulun ijo kani bolum sombayang tutang bolum hihco umba Kristus Yesus ahkan tongoporos,

¹³ rahatoh ulun-ulun ijo ja'at tutang ulun-ulun ponihpu ahkan mahi-mahi ja'at. Iro nihpu ulun bohkon, padahar iro bongoi ka totihpu ka'a.

¹⁴ Tahpi tohou ihko, Timoteus, hondakrih ihko tohtap nambit aang ajaran-ajaran ijo morong ijo jari tonongajar ahkan'kam tutang ijo ihko porocaya sotuwioh, tului ihko kota'an iai guru-guru'mu.

¹⁵ Ihko harus ingat, ijo tahkan koik, ihko jari kosono Surat Borasih. Surat Borasih rih dahpot nonga ahkan'kam horahti ahkan dahpot solamat, nguha porocaya umba Kristus Yesus.

¹⁶ Paring ijo tonyurat luwang Surat Borasih ijo tonoilham bain Pohotala, tutang boguna ahkan majar ijo morong, ahkan ningak tutang ngobuah ijo sala, tutang ahkan majar ulun mangat bolum numbun konohuang Pohotala.

¹⁷ Umba Surat Borasih rih, ulun ijo mohalu Pohotala dahpot tonyuhkup honong soporuna ahkan kokaron mahcam gawi ijo hinut.