2 TIMOTEUS 2 - BOWOT BOHUA

Sorodadu ain Kristus ijo te'et

¹ Timoteus, anak'ku! Hondakrih ihko monjadi ba'as, bain pononganasi ijo tononga ahkan ihto, kotului ihto hihco umba Kristus Yesus.

² Ajaran ijo houn jari ihko ngonih tahkan ahku, ang toharep ulun aro, hondakoh rih ihko porocaya iou hawui ulun-ulun ijo duon tonoharap tutang ijo cahkap ngajar ulun bohkon.

³ Ihko harus umba ngarot kolou sorodadun Kristus Yesus ijo te'et.

⁴ Ihcobehti sorodadu ijo rahat botugas eam ahkan nderohoh aropoh, umba urusan-urusanoh bongoi, kotului io jolik ngojorih ahtoi pokolimaoh.

⁵ Ihcobehti olahragawan eam ahkan monjadi juara ang luwang ihco unuk botanding, amat io eam mone'et poroturan-poroturan.

⁶ Pongumo ijo jari bogawi paham, io ijo sulak-noparaoh bohak norima bua kombulan.

⁷ Ngumang ohrih, inon ijo ahku monyapaioh rih, kotului Tuhan ahkan nonga ahkan'mu kosanggupan ahkan horahti paringoh.

⁸ Ingatrih tuh: Kabar Hinut ijo ahku mborihtaoh rih anairih kabar tohou Yesus Kristus, lihit Dawid; Io rih Kristus ijo jari bolum hoduli tahkan popahtoi.

⁹ Tului mborihta Kabar Hinut orihrih, ahku ngarot; malah nyiring ahku tonoratai kolou 'cobehti ponyilau. Tahpi auh Pohotala eam dahpot tonoratai.

¹⁰ Orihrih kotuluioh ahku tabah ngohtun paringoh rih, bain boguna ahkan ulun-ulun, ijo jari tomitih bain Pohotala, mangat iro ka ngondahpot kosolamatan ijo tononga nguha Kristus Yesus, tutang ijo tonohomboh umba kohajoi ijo abadi.

¹¹ Tu'u-tu'u morong auh tuh: ‘‘Amat ihto jari mahtoi homboh Io, ihto ahkan bolum ka'a homboh Io.

¹² Amat ihto tohtap tabah, ihto ahkan moretah ka'a homboh Io. Amat ihto ngulim Io, Io ka ahkan ngulim ihto.

¹³ Amat ihto eam te'et, Io tohtap te'et, tului eam dahpot Io hokolawan umba arop-Oh bongoi.’’

Gawi ijo dahpot tonara

¹⁴ Hondakrih ihko mopingat ulun-ulun tohou paringoh tuh. Ang toharep Pohotala, ningakohrih iro mangat a'ai somba'an tohou istilah-istilah. Orih eam anai gunaioh, malahan tihkas nderoh ulun-ulun ijo ngonihoh.

¹⁵ Hondakrih ihko bousaha tu'u-tu'u mangat tongahku bain Pohotala, kolou ulun ijo layak bogawi bagi-Oh. Bousaha iou mangat ihko eam mia tohou gawin'mu, molekan majar hawui kona ajaran-ajaran morong tahkan Pohotala.

¹⁶ Ngomahcurih panderan-panderan, ijo eam anai gunaioh tutang ijo mohina Pohotala. Panderan-panderan kolou orih tihkas napa ulun mahi-mahi ja'at.

¹⁷ Ajaran ulun-ulun orih, nyoli kolou ponyahkit kaker ijo bosiak. Ang louk iro, nyolung Himeneus tutang Piletus.

¹⁸ Iro jari nyapang tahkan ajaran ijo morong, tutang monderoh koporocaya 'sobagi ulun. Iro nyorihta ijo komonyun tahkan popahtoi jari nyolung.

¹⁹ Tahpi galang segah ijo tonapa bain Pohotala eam dahpot hungge. Ang ngosanoh tonyurat tuh: ‘‘Tuhan ngosono ulun-ulun ijo aiou-Oh,’’ tutang ‘‘Ulun ijo nuhtui ijo io ain Tuhan, ulun orih harus tondo nguan gawi ijo sala.’’

²⁰ Ang luwang lohpou ijo hajo, todahpot mahca-mahcam pokahkas. Anai ijo tonapa tahkan perak, ata'ai bulou, tahpi anai ka'a ijo tahkan kahju, ata'ai tana. Anai ijo tohapan ahkan gunan ijo mombahtang, tutang anai ka'a tohapan ahkan koporluan bahut.

²¹ Ulun ijo porasih aropoh tahkan paring ijo ja'at, ulun rih tohapan ahkan gunan ijo mombahtang. Io monjadi ain ijo khusus tutang boguna ahkan tuanoh. Io tonahtap ahkan tohapan bagi nyinong gawiu ijo pios.

²² Ngomahcuohrih komangat-komangat ulun biou. Bousaha ahkan bolum numbun kohondak Pohotala, te'et aang ajaran-Oh, tutang hopasi sama arop, hawui anaingina koteneng ahtoi. Bolumrih kodorih hihco iro ijo na'ah nyawot pondohop ahkan Tuhan umba ahtoi ijo borasih.

²³ A'ai umba a'ang kosomba'anauh ulun-ulun uong ijo eam ta'an ino-inon. Ihko ta'an ijo paring orih tihkas mopolombut kolahiauh.

²⁴ Ulun ijo bogawi ahkan Tuhan eam pahtut hojawab, io harus bojenta toharep paring ulun, tutang dahpot majar ulun honong pios tutang sabar.

²⁵ Io harus bolomu lembai majar ulun-ulun ijo rajin hokolawan; mudah-mudahan Pohotala nonga kosapet ahkan ulun-ulun orih ahkan hubah tahkan dusa-dusan iro, tutang ngosono ajaran ijo morong.

²⁶ Honong kodorih iro monjadi borondong hoduli, tutang liwus tahkan sokohtung Sehtan, ijo jari nawan iro, tutang maksa iro numbun konohuangoh.