2 TIMOTEUS 1 - BOWOT BOHUA

^1-2 Timoteus anak'ku ijo tonongasih! Ahku, Paulus, nyurat surat tuh ahkan'mu tutang bokoharap, keleh Pohotala, Amai tutang Tuhan ihto Kristus Yesus nonga borehkat, pononganasi tutang kosanang ahkan'mu. Ngosan konohuang Pohotala, ahku tonotuot monjadi rasul Kristus Yesus, tutang tonyuhu ahkan mborihta, tohou pombolum ijo tonobowot Pohotala. Pombolum orih ihto torima tului kohihco umba Kristus Yesus.

Ngohawot torimakasih tutang anjuran

³ Ahku ngohawot torimakasih ahkan Pohotala, ijo ahku mohaluoh umba ahtoi-bua ijo borasih, kolou ijo konuan tahtu ajuh'ku ijo lomoi. Ahku toturus ngohawot torimakasih ahkan Pohotala, nyinong tikat ahku mingat ihko ang do'a, pios hondou kanika ngolomi.

⁴ Ahku ingat ahkan kosedihan ahtoi'mu. Orihrih kotului-Oh ahku jolik samasino hosombang umba ihko, mangat ahku tou moro-morong monjadi jorih.

⁵ Ahku ingat ahkan koporocayaan'mu ijo tu'u-tu'u umba Kristus, sama kolou koporocayaan ajuh'mu Luis tutang inai'mu Eunike. Tutang ahku yahkin ihko ka porocaya kolou orih.

⁶ Tului orih ahku mingat ihko ahkan mongombolum pononga ijo tononga Pohotala ahkan'mu, ang ohkot ahku ngina longok'ku nokuh ngosan kuhung'mu.

⁷ Kotului Roh ijo Pohotala nonga ahkan ihto, eam rih Roh ijo mawi ihto monjadi pomihkoh. Tobalikoh Roh Pohotala orih nguan ihto monjadi ba'as, tuwi umba kasih tutang dahpot nahan arop.

⁸ Kotului orih ara maha'an nonga kosaksian tohou Tuhan ihto, tutang ara ka'a maha'an tohou ahku, ijo tonohukum tului Io. Sobalikoh, hondakrih ihko umba koba'as tahkan Pohotala, umba karot ahkan Kabar Hinut rih.

⁹ Pohotala monyolamat ihto, tutang na'ah ihto, mangat monjadi ukup-Oh bongoi. Io nguan rih eam hogalang inon ijo ihto jari nguai, molekan hogalang rancana-Oh bongoi, tutang pononganasi-Oh. Io nonga ihto pononganasi-Oh nguha Kristus Yesus sounmba kolunon tuh tona'oi.

¹⁰ Tutang huntuh Pohotala ngorinah pononganasi-Oh rih ahkan ihto, umba polombut Lahca Ponyolamat ihto Kristus Yesus. Yesus ijo mongalah kowasan popahtoi tutang ngomin pombolum ijo abadi nguha Kabar Hinut rih.

¹¹ Ahkan mborihta Kabar Hinut orihrih Pohotala nyuhu ahku monjadi rasul tutang guru.

¹² Orihrih kotuluioh ahku ngarot paringoh tuh, tahpi ahku tahtap yahkin, tului ahku ta'an tu'u, iai ijo ahku porocayaoh. Ahku yahkin, ijo inon ijo jari Io morocayaoh ahkak'ku. Io sanggup ka'a monjagaoh johcok aang Ondou Kiamat.

¹³ Nutut iou umba tu'u-tu'u ajaran morong ijo jari ahku nonga ahkan'mu. Tutang pios ihko tahtap nambit koporocaya tutang kasih ijo monjadi ain ihto tului hihco umba Kristus Yesus.

¹⁴ Umba pondohop tahkan Roh Pohotala ijo bolum ang luwang ihto, hondakrih ihko njaga pio-pios hal-hal borega ijo jari tomorocayarih ahkan ihkam.

¹⁵ Ihko ta'an ijo paring ulun ang wilayah Asia jari nohtah ahku, kodorih ka'a Pigelus tutang Hermogenes.

¹⁶ Tahpi jolahan Onesiforus jari pira-pira tikat ngojorih ahtoi'ku. Keleh Tuhan kani mononga ponunjuk balos kasih umba iro. Oluka ahku ang luwang sipir, Onesiforus eam mia ahkan koada'an'ku rih.

¹⁷ Kodorih johcok ang Ruma, io turus bousaha ngurah ahku, nyiring io sombang umba ahku.

¹⁸ Tutang ihko ta'an ijo ang Epesus, io aro samasino dohop ahku. Keleh Tuhan nunjuk balos kasih ahkaioh aang ondou Tuhan mosara paring ukup kolunon.