2 TESALONIKA 3 - BOWOT BOHUA

Bodo'arih ahkan ihkai

¹ Laiuoh, Konduang-konduang, bodo'arih ahkan ihkai. Bodo'a mangat borihta tahkan Tuhan dahpot toturus tayap hawui jion tutang tonorima honong pios, sama kolou ijo jari nyolung aang ihkam soun.

² Bodo'arih ka'a, mangat Pohotala nyolamat ihkai tahkan ulun-ulun ijo bejad tutang ja'at. Kotului eam paring ulun porocaya ahkan borihta tahkan Tuhan rih.

³ Tahpi Tuhan sotia. Io ahkan ngomba'as ihkam tutang nolawang ihkam tahkan Si Ja'at.

⁴ Tutang ihkai porocaya towi ahkan Tuhan tohou ihkam, ijo ihkam rahat nguanrih tutang ahkan turus nguanrih, inon ijo ihkai ngajaroh ahkan ihkam.

⁵ Keleh Tuhan niting ihkam ahkan labih horahti ijo Pohotala ngasi ihkam tutang ijo Kristus nonga kotabah ahkan'kam.

Kopahtut ahkan bogawi

⁶ Konduang-konduang, ngosan kowasa Tuhan Yesus Kristus, ihkai moretah mangat ihkam njayong arop umba Konduang ijo bolum noka-nokas, tutang ijo eam numbun ajaran-ajaran ijo ihkai nongarih ahkan iro.

⁷ Ihkam bongom kota'an, ijo ihkam harus numbun sutun ihkai. Ihkai eam noka-nokas, kotihka ihkai anai ang louk ihkam.

⁸ Ihkai eam kuman ukun ulun tutang honong eam molioh. Sobalikoh, hondou ngolomi ihkai bogawi hapa longon 'kai, mangat ihkai eam nyusah iai ka ka'a tahkan louk ihkam.

⁹ Ihkai nguan orih, eam tului ihkai earo bohak monutut mangat ihkam dohop ihkai. Tahpi kotului ihkai kani monjadi sutu bagi'kam.

¹⁰ Aang ohkot ihkai magun anai ang tohun ihkam, ihkai nonga paraturan tuh: ‘‘Ulun ijo eam kani bogawi, ara io kuman.’’

¹¹ Ihkai mander tuh, kotului ihkai ngonih, ijo anai ulun-ulun ang louk'kam ijo bolum noka-nokas. Iro eam bogawi angihco ka, kocoali deroh nyampur, urusan ulun bohkon.

¹² Ngosan kowasa Tuhan Yesus Kristus ihkai poretahoh ulun-ulun rih tutang nonga pongingat, mangat iro bogawi, honong tentram tutang ngurah bolanja iro bongoi.

¹³ Tahpi ihkam ara peda nguan kopios.

¹⁴ Mihkohhino noin, anai ulun ijo eam kani numbun, inon ijo ihkai nuhtuirih ang surat tuh. Bojaga toharep ulun kolourih, tutang a'ai bogaul umba io, mangat io mia.

¹⁵ Tahpi a'ai nguan io kolou musuh; tihkas ningak io kolou ihcobehti Konduang.

Auh-auh laiu-Oh

¹⁶ Tuhan anairih luwangtohasak kosanang ihto. Keleh Io turus nonga ahkan'kam kojorih ang kokaron hal. Keleh Tuhan hihco Konduang paring-Oh.

¹⁷ Tahbe tahkan ahku, Paulus. Ahku bongok ijo nyurat bagian tuh. Tuhrih tanda ijo ahku ngina ang paring surat aik.

¹⁸ Keleh Tuhan ihto Yesus Kristus, mborehkat Konduang paring-Oh. Horomat ihkai, Paulus