2 KORINTUS 9 - BOWOT BOHUA

Pondohop ahkan sosama ulun Kristen

¹ Kotu'uioh eam porulu hino ahku nyurat ahkan ihkam tohou pondohop ijo rahat tongirim ahkan ukup Pohotala ang Yudea.

² Ahku kota'an ihkam kani ndohop, tutang ahku jari monamamoh ihkam, umba ulun-ulun ang Makedonia. Ahku nuhtui ahkan iro ijo tahkan toun ijo nokalou konduang-konduang ang Akhaya ius tahtap ahkan nonga pondohop. Tutang somangat'kam jari ka'a himun somangat sobagian hajo tahkan iro.

³ Huntuh ahku nyuhu Titus tutang koduo konduang rih ahkan'kam, mangat inon ijo ihkai tara-tara tohou ihkam, ara kolou auh puang iou. Jadi, ihkam hondakoh jari sodia, tului ahku nuhtuioh ahkan iro ijo ihkam jari sodia ahkan orih.

⁴ Ahku mihkoh koloujahka anai ulun-ulun Makedonia ijo umba hombo-homboh ahku noin ang ohkot ahku lombut nokuh ihkam. Tutang amat iro nyombangoh ijo ihkam jaha sodia, akai, paham komiaoh ihkai noin, kotului jari nuhtui ijo ihkai porocaya samasino umba'kam! Tutang ihkam bongom-ka, ahkan mia ka'a.

⁵ Orih kotuluioh ahku komo porulu nyuhu iro rih ahkan'kam labih soun mangat ngurus sumbangan ijo ihkam mbowotoh rih. Ahku nguan rih, mangat noin amat ahku lombut, ponongan ihkam orih rih jari sodia. Hawui kolourih, karinah ijo ponongan'kam rih tononga honong sanang ahtoi, tutang eam kotului toropaksa.

⁶ Ingat! Ulun ijo noburan bonyi honjiot-honjiot, ahkan nipun buaoh ijo honjiot ka'a. Tahpi ulun ijo noburan bonyi aro-aro ahkan nipun buaoh ijo aro ka'a.

⁷ Nyinong ulun harus nonga numbun korela ahtoi. Ara io nonga hawui ragu-ragu ata'ai tului toropaksa, kobain Pohotala masi ulun ijo nonga hawui sanang ahtoioh.

⁸ Pohotala bokowasa nonga ahkan ihkam borehkat ijo molowi murai, mangat ihkam toturus anaingina inon ijo ihkam poruluoh; malahan ihkam ahkan labih aro ahkan nguan angpios tutang boamal.

⁹ Ang Surat Borasih tonyurat koloutuh, tohou Pohotala, ‘‘Io noburan-buran ahkan ulun porosbolum; kohinut ahtoi-Oh kototahiu turus-jahamoh.’’

¹⁰ Pohotala ijo nyodia bonyi ahkan ulun pongumo, tutang ukun ahkan ihto. Io ka'a ahkan nyodia tutang mopoaro inon jo ihkam noburanoh, mangat bua komorong ahtoi'kam botambah hino.

¹¹ Honong kodorih ihkam ahkan serba sukup aang kokaro hal, nyiring ihkam turus dahpot nonga hawui murah ahtoi. Tutang pononga-pononga'kam, ijo ihkai magi-magioh, kotuluioh aro ulun ngohawot torimakasih ahkan Pohotala.

¹² Kotului gawi pios ijo ihkam nguaioh tuh, eam tihkas monyukup kotahpas ukup Pohotala iou, tahpi ka'a ahkan kotuluioh aro ulun botorimakasih ahkan Pohotala.

¹³ Tutang tahkan kobajikan ijo ihkam ngorinahoh rih, aro ulun Kristen ang Yudea ahkan monara Pohotala kotului iro nohto kosotia'kam norima Kabar Hinut tohou Kristus ijo ihkam nututoh orih. Ka'a iro monara Pohotala, tului ihkam puna murah ahtoi ahkan mbagi-bagioh ahkan iro, tutang ahkan paring ulun bohkon, inon ijo anai ang ihkam.

¹⁴ Mahka iro ahkan mondo'akan ihkam umba nanyam kasihsayang, tului Pohotala karas hinut ahtoi ahkan'kam.

¹⁵ Hondaklah ihto norimakasih ahkan Pohotala ngosan pononga-Oh ijo luar biasa rih!