2 KORINTUS 8 - BOWOT BOHUA

Nyumbang duit tahkan ulun-ulun Kristen

¹ Konduang-konduang ihkai jolik ihkam ngota'an ka'a, tohou koloukuwoh piosoh Pohotala umba ukup-ukup ang Makedonia.

² Iro ius touji umba kosusahan-kosusahan ijo bahat. Tahpi ang tohun-tohun kosusahan-kosusahan rih, iro jorih tutang paham sanang ahtoi a'ang mononga sumbangan ahkan dohop ulun bohkon, oluka iro bongoi porosbolum samasino.

³ Ahku dahpot momastioh ijo iro nonga numbun sodahpot iro, molekan molowi. Hawui eam anai ijo nyuhu iro,

⁴ iro nyawot honong paham umba ihkai, amat tou iro umba dohop nonga sumbangan ahkan ukup Pohotala ang Yudea.

⁵ Iro nonga mahcu labih tahkan ijo ihkai harapoh. Iro pahtu-pahtukoh monyorahoh arop ahkan Tuhan, pongohuli ahkan ihkai ka'a sorurui umba kohondak Pohotala.

⁶ Orih kotuluioh ihkai paham nganjur Titus – ijo nopara usaha tuh – mangat io noturus usaha, ijo pios tuh ang louk ihkam ka'a,

⁷ ihkam unggul a'ang pari-paringoh. Ihkam unggul a'ang hal kaporocaya, a'ang hal ngorinah tiruk, a'ang hal pongotaan, a'ang paring mahcam usaha, tutang a'ang sitan'kam umba ihkai. Kotului orihrih pios ihkam ka'a unggul ang luwang usaha ijo hinut tuh.

⁸ Ahku eam nganjur orih kolou ihco poretah. Tahpi honong ngorinah, eaminon giatoh ulun bohkon dohop sama aropoh, ahku ka'a jolik kota'an nyiring umoh sitan'kam.

⁹ Tului ihkam ngota'an tu'u, ijo ihto karas tonokasih kobain Yesus Kristus Tuhan ihto. Io tahtou, tahpi Io nguan arop-Oh monjadi porosbolum ahkan kogunan ihkam, mangat umba koporosbolum-Oh rih ihkam monjadi tahtou.

¹⁰ Numbun tiruk'ku, aang unukohrih ihkam ngoopah, inon ijo jari ihkam nopara toun houn. Tului ihkam ijo pahtu-pahtuk niruk tutang nopara gawi rih.

¹¹ Ohrih, uhuntuh hondakrih ihkam noturus numbun koduon'kam. Hondakoh ihkam bosomangat ahkan ngoopah usaha rih, koloukuwoh ihkam houn ka bosomangat morocanaoh.

¹² Amat ihkam rela nonga, mahka Pohotala ahkan norima ponongan'kam rih, hogalang inon ijo anai aang ihkam, eam hogalang inon ijo eam anai aangihkam.

^13-14 Ahku samasino eam nohuang, ahkan moliwus ulun bohkon tahkan tanggung-jawab, tutang ngombahat ihkam. Tahpi kotului ihkam huntuh, tuh a'ang koada'an uras sukup, mahka jari sopahtutoh ihkam monyukupoh kotahpas iro. Noin amat ihkam bokotahpas, tutang iro a'ang koada'an uras sukup, mahka iro ahkan dohop ihkam. Honong kodorih kododuooh sama-sama tomohalu.

¹⁵ A'ang Surat Borasih tonyurat, ‘‘Ulun ijo anaipongulihoh aro, eam bokolowiuoh, tutang ulun ijo anaipongulihoh honjiot, eam bokotahpas.’’

Titus tutang injah-injah ijo sonuhu hombo-homboh io

¹⁶ Eaminon torimakasihoh ihkai umba Pohotala, tului Io jari napa Titus sogiat ihkai ahkan dohop ihkam!

¹⁷ Tului Titus eam baya rela numbun sawot ihkai, tahpi io ka'a kodorih giat kani dohop ihkam nyiring ngosan kohondak aiu bongoi, io mutus ahkan tulak nokuh ihkam.

¹⁸ Homboh umba io ihkai ngirim ka'a ihcobehti konduang, ijo tonohoromat ang paring ukup, kotului gawiuoh mborihta Kabar Hinut tahkan Pohotala.

¹⁹ Ang tahtup orihrih, ulun ijoorih jari topihtih ka'a, tutang tonuhkas bain ukup-ukup ahkan jolahan ihkai aang ponyalan 'kai. Kotului ihkai ahkan nguan ponyalan, ahkan ngihtot pononga rih, mangat Tuhan tonohajo, tutang mangat ihkam nohto, ijo ihkai rela dohop.

²⁰ Ihkai paham ati-ati, mangat ara anai ulun ijo monosalan ihkai, a'ang hal ngihtot pononga ijo hajo tuh.

²¹ Ihkai kani botindak bujur eam tihkas ang toharep Tuhan, tahpi ang toharep kolunon ka'a.

²² Hombo-homboh umba Titus tutang konduang orihrih, ihkai ka'a ngirim ihcobehti konduang ijo bohkon. Ihkai jari nguji io papira tikat tutang korinah io turus pohias mondohop. Tutang huntuh, io labi-labih kani mondohop ihkam tului io ngina koharap ijo hajo aangihkam.

²³ Tahou Titus, anairih jolahak'ku, ijo bogawi umba ahku, ahkan dohop ihkam. Tutang tohou koduo konduang rih, ijo hihkas homboh io, iro anairih ulun-ulun ijo sonuhu bain ukup-ukup tutang monjadi kotamam bagi Kristus.

²⁴ Ihkai harap ihkam ngorinah sitan'kam ahkan iro, mangat paring ukup kota'an ijo ihkam ngasih iro, tutang ijo inon ijo ihkai naraoh tohou ihkam anairih morong.