2 KORINTUS 7 - BOWOT BOHUA

¹ Konduang-konduang ijo tonokasih! Paring bowot rih tonitu ahkan ihto. Bain kotului orih kohondakoh ihto porasih arop tahkan kokaron ijo ngojilok homboruan behtin ihto. Kohondakoh ihto mihkoh umba Pohotala, mangat ihto tou bolum khusus ahkai-Oh hawui soporuna.

Kojorih ahtoi Paulus

² Naharangrih ihkai ang luwang ahtoi'kam. Ihkai eam bosala umba ihcobehti ka, tutang eam pu'u anai ulun ijo ihkai morugioh. Ihkai samasino eam nguhkut utung tahkan iaika.

³ Ahku nuhtui kodorih, bohkon ahkan nosalan ihkam. Kotului kolou ijo jari ahku nuhtuioh lomoi, ihkai paham ngasi ihkam, tutang ihto tuh anai kawan-kawan hokombolum mahtoi.

⁴ Ahku ngina koporocaya tuwi ahkan'kam. Malah ahku namam samasino toharep'kam! Oluka ihkai nyuru aro kosusah, ahtoi'ku paham konapung tului ihkam. Ahtoi'ku tu'u-tu'u jorih!

⁵ Kotihka ihkai johcok ang Makedonia ka, ihkai samasino eam sapet istirahat. Tahkan kokaro lahpak, ihkai dahpot kosusah; tahkan lahpak bohkon kolahi, tahkan luwang ahtoi bongon kihkoh.

⁶ Tahpi torimakasih, ahkan Pohotala hototurus pohajo ahtoi ulun ijo puhtus asa. Io nyanang ahtoi ihkai umba polombut Titus.

⁷ Ahtoi ihkai dahpot apung eam iou kotului Titus jari lombut, tahpi ka'a kotului io nyorihta, koloukuwoh ahtoioh tomapung bain ihkam. Io mborihta ahkan ihkai, ijo ihkam rindu samasino hosombang umba ahku; ijo ihkam monyasal ahkan gawin'kam lomoi, tutang huntuh rela dohop ahku. Hal rih nguan ahku labih jorih hino.

⁸ Oluka surat'ku nguan ahtoi'mu monjadi sedih, ahku eam monyasal nyurat surat tuh. Puna aang ohkot ahku nohto, ijo surat'ku tuh monjadi ihkam sedih – oluka kosedihan'mu rih baya honjulu – ahku anai ka'a konyasal.

⁹ Tahpi ahtoi'ku sonang huntuh – eam tagal ahtoi'mu monjadi sedih – molekan, kotului kosedihan'kam rih, ngonjorian hadat'kam hubah. Puna kosedihan'kam rih, tohorong umba kohondak Pohotala. Jadi ihkai eam morugi ihkam.

¹⁰ Tului kosedihan kolou orih momua kohubah ahtoi ijo mopolombut solamat. Tutang ulun eam ahkan monyasal ngosan hal orih. Sobalikoh kosedihan ijo baya sorurui umba kohondak kolunon momua popahtoi.

¹¹ Cuba ihkam nohtoani inon buaoh aang'kam, bain kosedihan ijo sorurui umba kohondak Pohotala! Buaoh, iorih ihkam tu'u-tu'u ngurahjalan ahkan nokining kokoruh! Ihkam monjadi bosingi toharep dusa, ihkam mihkoh, ihkam rindu, ihkam monjadi bosomangat, ihkam rela mohukum ijo bosala! A'ang paring persoalan tuh ihkam jari ngorinah, ijo ihkam eam bosala.

¹² Jadi, oluka ahku jari nyurat surat tuh, ahku nyurat eam kotului ulun ijo bosala rih. Eam ka'a kotului ulun ijo ngorot bain kotului kosala'an rih. Ahku nyurat surat rih, mangat ang toharep Pohotala, ihkam borondong bongom, eaminon kohajoioh konohtoani'kam toharep ihkai.

¹³ Orihrih kotuluioh ahtoi ihkai tonapung. Bohkonumba apung rih, ihkai mahi-mahi hino tongojorih kotului nohto kojorih Titus; ahtoioh tonapung bain Konduang paring.

¹⁴ Ahku puna jari kotama-tamam ihkam ahkaioh. Torimakasihrih, ihkam eam mopomia ahku. Paring ijo pu'u ihkai nuhtui ahkan'kam anairih morong. Kodorih ka'a, inon ijo ihkai nama-namamoh tohou ihkam ahkan Titus korinah morong hino.

¹⁵ Huntuh io mahi-mahi ngasih ihkam, tului io ingat koloukuwoh Konduang paringoh kani numbun auh kototiringoh tutang koloukuwoh ihkam norima io hawui horomat tutang te'et.

¹⁶ Ahku sanang samasino, kotului ihkam duon tomorocaya aang kokaro hal.