2 KORINTUS 6 - BOWOT BOHUA

¹ Tului ihkai bogawi hombo-homboh umba Pohotala, mahka ihkai nyawot hawui tu'u-tu'u, a'ai ihkam mohonou kopios ahtoi Pohotala rih.

² Luwang Surat Borasih, Pohotala nuhtui, ‘‘Ang ohkot ijo tonojorih, Ahku jari ngonih ihko, tutang ang ondou monyolamat, Ahku jari dohop ihko.’’ Ingat pio-pios, uhuntuh, tuhrih ohkot ijo tonojorih rih. Uhuntuh, tuhrih ondou ahkan tonyolamat!

³ Ihkai eam kani, pohalu ihkai tonosalan. Kotului rih ihkai ngurahjalan eam nonga alasan, ahkan ihcobehti ka ahkan nguan hal rih.

⁴ Sobalikoh, a'ang kokaron hal, ihkai ngorinah ijo ihkai anairih jihpon-jihpon Pohotala. Tului, karon mahcam kosusah jari ihkai ngarotoh hawui sabar,

⁵ ihkai tonyiksa, tonyihpir, tutang tongorubut; ihkai bogawi paham, bojoin eam tiruh, tutang bojoin hino eam anai ukun.

⁶ Honong nguan kotulus, kopihtar, sabar tutang hinut ahtoi, ihkai ngorinah, ijo ihkai, anairih jihpon Pohotala. Ka'a hawui bohambin aang pondohop Roh Pohotala, tutang hawui kasih ijo ihlas,

⁷ homboh hawui mborihta kabar ijo tahkan Pohotala, tutang umba kowasan Pohotala, ihkai ngorinah ijo ihkai tuh anairih jihpon-jihpon Pohotala. Ihkai nambit aang kohondak Pohotala, kolou sanjatan ihkai ahkan nyarang, oluka ahkan mombela arop.

⁸ Ihkai tonohoromat, tahpi ihkai dahpot pohina'an ka'a, tonotara, tutang tonopitnah hino. Olu ka ihkai morong, tahpi tonondawa bobalik.

⁹ Ihkai tonongohu eam tongosono tahpi ihkai tongosono bain paring ulun. Ihkai tonongohu mahtoi, tahpi bokorinah ihkai magun bolum. Oluka ihkai tonoporos, ihkai eam mahtoi.

¹⁰ Oluka ahtoi ihkai tongoporos ahtoi, tahpi ihkai hototurus jorih ka'a. Ihkai topahjahoh porosbolum, tahpi ihkai jari nguan aro ulun monjadi tahtou. Topahjahoh ihkai eam anai ngina ino-inon tahpi kotu'ui ihkai jari ngina paring-aangoh.

¹¹ Konduang-konduang ijo tongasih ang Korintus! Ihkai jari torus-torang ahkan'kam. Paring suang ahtoi bua ihkai jari ihkai nuhturoh.

¹² Ihkai eam nuhtup ahtoi ahkan ihkam, tihkas ihkam iou ijo nuhtup ahtoi toharep ihkai.

¹³ Uhuntuh, nauhoh ahku bopander kolou umba karon-anak'ku bongok. Nguap ka'a ahtoi'kam toharep ihkai.

Tingak toharep pongaroh ulun-ulun ijo eam porocaya

¹⁴ A'ai kani monjadi barih ulun-ulun ijo eam porocaya umba Yesus, orihrih eam cocok. Amoh dahpot kopios, hobarih umba koja'at. Eam mungkin koloang hobarih umba kopindong.

¹⁵ Eam duon Kristus hobarih umba Sehtan. Inon kosamaoh holat ulun Kristen, umba ulun eam Kristen?

¹⁶ Inon kobohkon holat Lohpou Tuhan umba lohpou dewa? Ihto tuh Lohpou Tuhan, iorih Pohotala ijo bolum. Pohotala bongoi nuhtui, ‘‘Ahku ahkan mohcon ang tohun-tohun iro, tutang kani bolum hihco umba iro. Ahku ahkan monjadi Pohotalan'ndo, tutang iro ahkan monjadi Ukup-Ku.

¹⁷ Tului orih, Nohtahrih iou ulun-ulun ijo eam ngosono Pohotala rih, tutang pisah ohrih iou arop'mu tahkan iro. Ara hojelut samasino umba ijo pali, mahka Ahku ahkan norima ihko.

¹⁸ Ahku ahkan monjadi Amai'mu, tutang ihkam ahkan monjadi anak-anak-Ku, kolouorih hion Tuhan Ijo Mahakowasa.’’