2 KORINTUS 5 - BOWOT BOHUA

¹ Tului ihkai kota'an ijo amat lohpou – orihrih behti-ijo ihto mohconoh ang kolunon tuh konahkas, Pohotala ahkan nyodia bagi ihto ihco lohpou ang soruga, ijo konuan bain Pohotala bongoi tutang ijo tahan turus-jahamoh.

² Ang luwang lohpou ijo huntuh tuh, ihto munguh tului ihto rindu samasino mohcon ang luwang lohpou ihto ijo ang soruga orih.

³ Lohpou orihrih, behtin ihto ijo bohua.

⁴ Kotahin ihto mohcon ang luwang lohpou ijo tahkan tana tuh, ihto munguh kotului puat ihto bahat. Eamoh kotului ihto jolik bolohkak tahkan behtin ihto ijo tahkan tana tuh. Tahpi tului ihto jolik mokehpanoh behtin ihto ijo tahkan soruga rih, mangat behtin ihto ijo tou mahtoi tuh, tongowasa bain ijo bolum.

⁵ Ijo monyodiarih ihto ahkan orihrih, anairih Pohotala bongoi, tutang Io nonga Roh-Oh ahkan ihto kolou jaminan.

⁶ Kotului orih ahtoi ihkai hototurus komo ba'as. Ihkai kota'an, ijo kotahin ihkai magun mohcon ang luwang behtin ihkai tuh, ihkai mahcu tahkan lohpou, ijo ahkan ihkai mohconoh homboh Tuhan.

⁷ Kotului ihkai bolum hogalang porocaya umba Kristus, eam hogalang inon ijo dahpot tonohto,

⁸ orih kotuluioh ahtoi ihkai tabah. Ihkai labih jolik bolohkak tahkan behtin ihkai tuh, mangat jeleng mohcon umba Tuhan.

⁹ Kotului orih ihkai bousaha tu'u-tu'u ahkan nyanang ahtoi-Oh, pios ohkot ihkai magun anai ang luwang lohpou ihkai ang ohtoi, ata'ai ka ang anan.

¹⁰ Kotului musti ihto paringoh ahkan konomin nokuh noharep bosaran Kristus, tutang nyino-nyinong ahkan dahpot balosoh, sorurui umba gawiuoh ang kolunon tuh – gawi pios, ata'ai ka kaja'at.

Hokopios umba Pohotala nguha Yesus Kristus

¹¹ Ihkai kota'an inon rimai mihkoh umba Tuhan; orih kotuluioh ihkai bousaha moyakin ulun tohou arop ihkai. Pohotala ngosono ihkai sotimbon-timbonoh tutang ahku harap ihkam ka, ngosono ihkai ang luwang ahtoi'kam.

¹² Umba tuh ihkai eam nyawot, mangat ihkam monara arop ihkai. Ihkai baya kani nonga ihco alasan ijo pios ahkan'kam, ahkan monjadi tamam toharep ihkai, mangat ihkam ta'an, koloukuwoh ihkam harus mutah auh ulun-ulun ijo mongguna tapan ulun, tutang eam sipatoh.

¹³ Amat ihkai puna topahjahoh jari bobucon, orih anairih demi gunan Pohotala. Tutang amat ihkai gihtanoh waras, orih demi kogunai ahkan ihkam.

¹⁴ Sihtan Kristusih ijo mongowasa ihkai, tutang ihkai borondong, ijo amat ihcobehti jari mahtoi ahkan paring ulun, mahka orihrih rimai ijo paring ulun jari mahtoi.

¹⁵ Kristus mahtoi ahkan paring ulun, mangat paring ulun ijo bolum, eam hino bolum ahkai bongoi, molekan ahkan Kristus ijo jari mahtoi tutang tonombolum hoduli demi kogunan iro.

¹⁶ Bain kotului orih, ihkai eam hino nihpong ulun numbun tihpong kolunon. Puna ihkai pu'u nihpong Kristus tahkan sila kolunon, tahpi huntuh eam hino.

¹⁷ Ulun ijo jari hihco umba Kristus, monjadi kolunon bohua samasino. Ijo tahi jari eam aro hino – paringoh jari monjadi bohua.

¹⁸ Paringoh rih tonapa bain Pohotala. Nguha Kristus, Pohotala nguan ihto hokopios hoduli umba Io, turus nyuhu ihto mangat ulun-ulun bohkon toudahpot hokopios ka'a umba Pohotala.

¹⁹ Ihkai mborihta ijo umba poholat Kristus, Pohotala nguan ulun hokopios huli umba arop-Oh. Pohotala nguan orih earo nutut kosalan-kosalan ijo jari konuan kolunon toharep arop-Oh. Tutang ihkai jari tonyuhu Pohotala ahkan mborihta kabar rih.

²⁰ Jadi ihkai anairih monjadi pohalu-pohalu Kristus. Nguha ihkai Pohotala bongoi ijo nyapai pohtoh-Oh. Ngasan aran Kristus ihkai nyawot hawui paham, torima njuluk longon Pohotala ijo toudahpon ihkam hokopios umba Io.

²¹ Kristus eam bodusa, tahpi Pohotala nguan Io ngohtun dusan ihto, mangat ihto hokopios hoduli umba Pohotala, tului hihco umba Kristus.