2 KORINTUS 4 - BOWOT BOHUA

Ponahtou tahkan soruga ang luwang unuk ijo tahkan tana

¹ Ihkai nguan gawi tuh, tului kosayang ahtoi Pohotala. Orih kotuluioh ihkai eam puhtus asa.

² Ihkai eam hapa cara-cara kopindong ijo ngomia. Ihkai eam kani bogawi honong lihcik, ata'ai ngobulak-balik tihtunauh Pohotala. Ihkai mohalu Pohotala umba ahtoi ijo borasih numbun kohondak-Oh. Tului orih, ihkai harapoh paring ulun monilai ihkai honong pios ang luwang ahtoi buaoh.

³ Amat Kabar Hinut ijo ihkai mborihtaoh tuh, magun ka'a jaha tongosonooh, mahka baya ulun-ulun ijo rahat nihtu korusak iou ijo eam mongosonooh.

⁴ Hotala ja'at ijo ngowasa kolunon tuh, nuhtup tiruk ulun-ulun ijo eam porocaya rih. Iorih ijo ngapeng-ngahana iro, mangat iro eam nohto koloang tahkan Kabar Hinut rih, tohou kohajon Kristus ijo hosuhtu gambar Pohotala.

⁵ Borihta ijo ihkai nyiaroh rih, eam borihta tohou ihkai bongon. Borihta rih anai borihta tohou Yesus Kristus; ijo Io anairih Tuhan; tutang ihkai tuhrih jihpon-jihpon'kam kotului Io.

⁶ Pohotala ijo nuhtui, ‘‘Kohondakoh tahkan luwang kopindong lombut koloang,’’ Pohotala orihrih ka'a ijo polombut koloang rih ang luwang ahtoi ihto, mangat tirukihtung ihto monjadi boloang tutang duon ngosono korolondang Pohotala ijo monyingah aang boun Kristus.

⁷ Tahpi ponahtou rohani ijo komok orih, ihkai ngomiuoh ang luwang arop ihkai ijo eam borega tuh, ijo tonapa tahkan tana. Honong kodorih korinah bain kohajon kowasa rih mohcon aang Pohotala tutang eam aang ihkai.

⁸ Ihkai tonyarang tahkan paring pihak, tahpi ihkai eam hahpit. Ihkai torongong, tahpi eam nyiring nihou koharap.

⁹ Aro ijo momusuh ihkai, tahpi eam pu'u ihkai botohtah bongon ihkai. Tutang oluka bojointu'u ihkai ponahcat nyiring tohaot, tahpi ihkai eam mahtoi.

¹⁰ Toturus ihkai tongipa popahtoi Yesus aang behtin ihkai, mangat pombolum-Oh ka monjadi korinah ang behtin ihkai.

¹¹ Kotahin ihkai bolum, ihkai toturus tongipa bain pompohtoi tului Yesus, mangat umba kolourih pombolum Yesus ka tou korinah aang behtin ihkai ijo eambunggut tuh.

¹² Jituh rimai ijo ang luwang arop ihkai popahtoi rahat giat molalus porananoh, tahpi ihkai jorih, ijo pombolumrih ijo rahat giat ang luwang behtin'kam.

¹³ Ang luwang Surat borasih sombang auh tuh, ‘‘Ahku porocaya, orih kotuluioh ahku bopander.’’ Nah, umba somangat porocaya ijo kolourih ka'a, ihkai bopander tului ihkai porocaya.

¹⁴ Ihkai yakin, ijo Pohotala ijo jari ngombolum hoduli Tuhan Yesus, ahkan ngombolum ihkai ka'a honong Yesus, tutang ngomin ihkam tutang ihkai nokuh toharep-Oh.

¹⁵ Paringoh rih anaioh ahkan kogunan'kam. Tului mahi-mahi aro ulun nginyam kasih Pohotala, mahi-mahi aro hino do'a torimakasih ijo tonyapai ahkan Pohotala; honong kodorih Pohotala tonotara.

Bolum honong porocaya

¹⁶ Orihrih kotuluioh, ihkai eam puhtus asa. Sinoka ihkai socara kolunon tuh mahi-mahi ndahang korusakoh, tahpi cara homboruan, ihkai tonapa bohua nyinong ondou.

¹⁷ Tutang kosusah ijo eam sopiraoh tuh, ijo ihkai nyuruoh tihkas pondehan, ahkan momua bagin ihkai ihco kosanang, ijo luar biasa tutang abadi. Kosanang orih mahcu labih hajo amat tonindung umba kosusahan rih bongoi.

¹⁸ Tului ihkai eam nohtoani hal-hal ijo gihtan, molekan ijo eam gihtan. Ijo gihtan puna baya pondehan tahpi ijo eam gihtan rih bunggut nyiring turus-jahamoh.