2 KORINTUS 3 - BOWOT BOHUA

Karon-pohalu bowot ijo bohua

¹ Kuwoh tuh topahjahoh, koloujahka ihkai tara-tara umba-arop 'kai hino? Ata'ai tou tu'u ihkai porulu surat tara ahkan ihkam, ata'ai tahkan ihkam, kolou ijo tomorulu bain ulun-ulun bohkon?

² Konduang bongon ih monjadi surat taran ihkai, ijo tonyurat ang luwang ahtoi ihkai, tutang duon tongota'an tutang tonombasa bain nyinong ulun.

³ Iro bongoi dahpot nohto, ijo Konduang monjadi surat ijo tonyurat Kristus, ijo tonokirim nguha ihkai. Surat rih eam tonyurat umba dawat, tahpi umba Roh Pohotala ijo bolum; eam ka'a ang ngosan bahtu tulis tahpi ang ahtoi ulun.

⁴ Ihkai nuhtui kodorih, tului koyakinan ihkai toharep Pohotala nguha Kristus.

⁵ Ihkai eam tepun aangihco alasan ka, ahkan ngorinah ijo ihkai puna nyanggup nguan gawi tuh, tahpi Pohotala ijo nonga koulih rih ahkan ihkai.

⁶ Io iou ijo nguan ihkai nyanggup monjadi pohalu ahkan ihco bowot ijo bohua, bowot ijo bogatung tahkan Roh Pohotala, bohkon tahkan hukum ijo tonyurat. Tului ijo tonyurat orihrih ngomin popahtoi, rahatoh ijo Roh Pohotala rih nonga pombolum.

⁷ Ang ohkot bowot ijo ngomin popahtoi rih tonapa tutang tomihtik ang bindang bahtu, koloang Pohotala momancar honong ngorolondangsilou ang baun Museh, Koloang-Oh kodorih kosilouoh, nyiring uhtus Israel eam sanggup nopahjah baun Museh, oluka koloang ang bauioh jari nopara kawus ang ohkot rih. Nah, amat gawin bowot, ijo ngonin popahtoi orih ang resmioh umba korolondangsilou ijo kodorih kohajoioh,

⁸ tontu gawin bowot ijo bain Roh Pohotala, ang resmioh honong labih ngorolondangsilou hino.

⁹ Amat bowot ijo mohukum kolunon rih, kodorih ngolondangsilou, tontu labih ngolondangnyilou hino bowot ijo touduon ngopios ulun umba Pohotala.

¹⁰ Tou konohawot, ijo inon ijo lomoi kolondangsilou jari eam ngolondangnyilou hino tului kolondangsilou ijo huntuh tuh.

¹¹ Amat aang'co ijo tahan baya pondehan, kodorih londangsilou, puna aang'co ijo abadi labih ngorolondangnyilou hino.

¹² Bain kotului ihkai anaingina koharap kolourih, mahka ihkai bohanyi bopander kodorih.

¹³ Ihkai eam kolou Museh, ijo nuhtup bouoh umba sondurungoh, mangat uhtus Israel, eam nohto koloang Tuhan, uhun bolop tutang nihou tahkan bouioh.

¹⁴ Tiruk iro jari totutup. Tutang nyiring ang ondou tuh ka tirukihtung iro magun totutup umba sondurung ang ohkot iro mbasa surat-surat tohou bowot ijo tahi rih. Sondurung rih tihkas duon tokuop amat ulun hihco umba Kristus.

¹⁵ Huntuhka, amat iro mbasa surat-surat Museh sondurung rih magun monuhtup tirukihtung iro.

¹⁶ Tahpi amat ihcobehti lombut noharep Tuhan, sondurung rihka konuap tahkan boun ulun rih.

¹⁷ Nah, Tuhan ijo konohuangoh ang ohtoi, anairih Roh. Tutang ang umoh Roh Tuhan anai, ang anan ka'a anai komorodehkaan.

¹⁸ Huntuh boun ihto paringoh eam tonuhtup sondurung, tutang ihto nopulang kolondangsilou Tuhan Yesus. Tutang bain kotului orih ihto hototurus tongubah monjadi kolou Io; mahi tahi ihto monjadi mahi ngolondangsilou. Kolondangsilou rih tahkan Roh, tutang Roh rih anairih Tuhan.