2 KORINTUS 2 - BOWOT BOHUA

¹ Bain kotului orih ahku jari nguan koputusan, ahkan eam lombut hino nokuh'kam umba pasap ijo nguan ihkam sedih.

² Tului amat ahku ngoporos ahtoi'kam, iai hino ijo dahpot mapung ahku amat bohkon ulun-ulun rih, ka'a ijo jari ahku ngoporos ahtoioh?

³ Orih kotuluioh ahku nyurat surat tuh ahkan'kam. Ahku eam kani masap'kam, turus tonoporos ahtoi bain ihkam, podahal ihkam ijo koharusoh ngojorih ahku. Tului ahku yakin ijo amat ahku jorih, mahka Konduang paringoh jorih ka'a.

⁴ Ahku nyurat ahkan'kam hawui ahtoi ijo poros tutang bahat tutang umba aro nusuh danum mahto. Konohuang'ku eam mangat ihkam monjadi poros ahtoi, tahpi mangat ihkam borondong ijo ahku paham ngasih ihkam.

Apun ahkan ijo sala

⁵ Amat anai ulun ijo kotuluioh poros ahtoi, mahka aang rih io nguai eam toharep ahku, molekan toharep Konduang paringoh ata'ai paling eam toharep ihcokabagi tahkan Konduang. Ahku eam kani dalou karas toharep io.

⁶ Bagi ulun ijo mahcam orih, hukum ijo tononyok ahkaioh bain ulunaro ang louk Konduang jari sukup.

⁷ Uhuntuh ihkam harus mapun io tutang nonga juhung hino ahkaioh, mangat io a'ai dalou poros ahtoi nyiring puhtus asa.

⁸ Kotului rih ahku nyawot, mangat ihkam ngorinah hoduli ahkai ijo ihkam tu'u-tu'u ngasih io.

⁹ Ahku nyurat surat tuh ahkan'kam, mangat nohuang ahkan nguji ihkam, inon ihkam turus kani numbun karon-potunjuk tahkan ahku.

¹⁰ Amat ihkam mapun ulun ijo jari nguan kosalan toharep'kam, mahka ahku ka mapun ulun rih. Tului inon ijo jari ahku mapunoh – amat puna anai ijo porulu tonahpun – orih ahku ngapunoh ang toharep Kristus ahkan kopios ihkam.

¹¹ Ahku nguan orih mangat Sehtan ara ngomin kosapetoh ahkan ngowasa ihto; tului ihto kota'an, rancana-rancanaoh.

Kokuatir Paulus ang Troas

¹² Ang ohkot ahku johcok ang Troas, tutang nohuang ahkan mborihta oh Kabar Hinut tohou Kristus, Tuhan jari nguap jalan ahkak'ku ahkan bogawi ang unuk rih.

¹³ Tahpi ahku eam teneng tului eam hosombang umba konduang ihto Titus ang anai. Mahka ahku poromisi umba ulun-ulun ang anan, turus tulak nokuh Makedonia.

Komanang tului Kristus

¹⁴ Torimakasih ahkan Pohotala! Io toturus niting ihkai ahkan umba aang pawai komanang Kristus, tului ihkai bolum hihco umba Io. Pohotala mohapa ihkai, mangat borihta tohou Kristus tosiar kolou buan harum ijo semerbak koumo-umoh.

^15-16 Tului ihkai sama kolou buan manyan ijo harum, ijo tomahpong bain Kristus ahkan Pohotala. Toharep ulun-ulun ijo uhun nitu kolonyuhoh, ihkai tuh kolou buan popahtoi ijo tomunu, tahpi toharep ulun-ulun ijo rahat tunyolamat, ihkai kolou buan harum ijo ngomin pombolum. Nah, iai ijo dahpot nguan gawi tuh?

¹⁷ Ihkai eam kolou aro ulun mohapan borihta tahkan Pohotala monjadi ramun dagang iou. Tihtun-tihtun ihkai anai borasih, tului ihkai tonyuhu bain Pohotala. Tutang Pohotala bongoi nopahjah, ijo ihkai monyiaroh borihta orih, kolou pohalu-pohalu Kristus.